ᠨᠠᠶᠢᠷ ᠬᠤᠷᠢᠮ ᠤᠨ ᠵᠠᠩᠰᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/19
    ᠪᠠᠭᠠᠷᠢᠨᠴᠤᠳ᠂ ᠪᠦᠭᠦ ᠮᠤᠩᠭᠤᠯᠴᠤᠳ ᠲᠠᠢ ᠪᠠᠨ ᠠᠳᠠᠯᠢ ᠪᠠᠷ ᠨᠠᠶᠢᠷᠠᠯᠠᠬᠤ᠂ ᠭᠦᠭᠡᠷᠦᠯᠳᠦᠭᠦ᠂ ᠳᠠᠭᠤᠯᠠᠯᠴᠠᠬᠤ ᠂ ᠮᠦᠷᠦᠶᠢᠴᠡᠭᠦ ᠳᠤ ᠳᠤᠷ᠎ᠠ ᠪᠠᠭ᠋ᠠᠳᠠᠢ ᠪᠢᠯᠡ᠃ ᠨᠠᠶᠢᠷ ᠨᠠᠭᠠᠳᠤᠮ ᠨᠢ ᠭᠦᠴᠦᠨ ᠴᠢᠳᠠᠯ ᠰᠢᠯᠭᠠᠬᠤ᠂ ᠤᠶᠤᠨ ᠤᠬᠠᠭᠠᠨ ᠮᠦᠷᠦᠶᠢᠴᠡᠭᠦ᠂ ᠡᠷᠳᠡᠮ ᠮᠡᠷᠭᠡᠵᠢᠯ ᠢ ᠰᠢᠨᠵᠢᠭᠦ᠂ ᠡᠷᠡᠭᠦᠯ ᠡᠩᠬᠡ ᠶᠢ ᠪᠠᠳᠤᠳᠬᠠᠬᠤ᠂ ᠠᠯᠳᠠᠷ ᠴᠤᠯᠠ ᠶᠢ ᠮᠠᠨᠳᠤᠭᠤᠯᠬᠤ ᠵᠡᠷᠭᠡ ᠴᠢᠬᠤᠯᠠ ᠵᠦᠢᠯ ᠪᠤᠯᠬᠤ ᠶᠤᠮ᠃     1. ᠢᠷᠦᠭᠡᠯ ᠤᠨ ᠨᠠᠶᠢᠷ   ᠵᠢᠯ ᠪᠦᠷᠢ ᠶᠢᠨ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠵᠢᠷᠭᠤᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠳᠤᠯᠤᠭᠠᠨ ᠠᠴᠠ ᠠᠷᠪᠠᠨ ᠳᠠᠪᠤᠨ ᠪᠤᠯᠳᠠᠯ᠎ᠠ᠂ ᠬᠤᠰᠢᠭᠤᠨ ᠳᠦᠪ ᠪᠤᠶᠤ ᠳᠦᠷᠪᠡᠨ ᠶᠡᠭᠡ ᠰᠦᠮ᠎ᠡ ᠳᠡᠭᠡᠷ᠎ᠡ ᠯᠠᠮᠠ ᠬᠠᠷ᠎ᠠ ᠶᠢᠨ ᠳᠡᠭᠡᠳᠤ ᠳᠠᠪᠬᠤᠷᠭᠠᠳᠠᠳ ᠴᠤᠭᠯᠠᠷᠠᠭᠠᠳ ᠢᠷᠦᠭᠡᠯ ᠬᠤᠷᠠᠵᠤ ᠴᠠᠮ ᠴᠠᠮᠨᠠᠨ ᠨᠠᠶᠢᠷ ᠨᠠᠭᠠᠳᠤᠮ ᠭᠠᠷᠭᠠᠵᠤ᠂ ᠪᠦᠭᠡ᠂ ᠮᠤᠷᠢ᠂ ᠰᠤᠷ ᠮᠦᠷᠦᠶᠢᠴᠡᠨ ᠠᠯᠪᠠ ᠠᠴᠢᠶ᠎ᠠ ᠶᠢ ᠳᠡᠰᠬᠡᠨ ᠠᠷᠠᠯᠵᠢᠶ᠎ᠠ ᠮᠠᠶᠢᠮᠠᠢ ᠬᠢᠳᠡᠭ᠃ ᠡᠨᠡ ᠨᠢ ᠵᠤᠤ ᠤᠳᠠ ᠶᠢᠨ ᠴᠢᠭᠤᠯᠭᠠᠨ ᠳᠤ ᠠᠯᠳᠠᠷᠳᠠᠢ᠂ ᠪᠤᠭᠤᠮᠳᠠ ᠶᠢᠨ ᠭᠠᠳᠠᠨ᠎ᠠ ᠳᠤᠳᠤᠨ᠎ᠠ ᠨᠦᠯᠦᠭᠡᠳᠠᠢ ᠴᠤᠭᠯᠠᠭ᠎ᠠ — ︽ᠪᠠᠭᠠᠷᠢᠨ ᠢᠷᠦᠭᠡᠯ︾ ᠪᠢᠯᠡ᠃     ᠢᠷᠦᠭᠡᠯ ᠤᠨ ᠨᠠᠶᠢᠷ ᠳᠡᠭᠡᠷ᠎ᠡ ᠵᠤᠤ ᠤᠳᠠ ᠶᠢᠨ ᠴᠢᠭᠤᠯᠭᠠᠨ ᠤ ᠡᠯ᠎ᠡ ᠬᠤᠰᠢᠭᠤᠳ ᠪᠠ ᠰᠢᠯᠢ ᠶᠢᠨ ᠭᠤᠤᠯ᠂ ᠵᠢᠷᠢᠮ᠂ ᠵᠤᠰᠤᠳᠤ ᠶᠢᠨ ᠴᠢᠭᠤᠯᠭᠠᠨ ᠵᠡᠷᠭᠡ ᠭᠠᠵᠠᠷ ᠠᠴᠠ ᠭᠦᠨᠳᠤᠳᠤ ᠵᠤᠴᠢᠳ ᠮᠤᠷᠢ ᠪᠦᠭᠡ ᠲᠠᠢ᠂ ᠳᠠᠭᠤᠴᠢᠳ ᠭᠦᠭᠵᠢᠮᠴᠢᠳ ᠲᠠᠢ ᠢᠷᠡᠵᠡᠭᠡᠳᠡᠭ᠃ ᠪᠤᠭᠤᠮᠳᠠ ᠶᠢᠨ ᠳᠤᠳᠤᠭᠠᠳᠤ ᠠᠴᠠ ᠴᠦ ᠮᠠᠶᠢᠮᠠᠢ ᠱᠤᠤᠮᠠᠢ ᠠᠷᠪᠢᠨ ᠢᠷᠡᠳᠡᠭ᠃ ᠪᠠᠭᠠᠷᠢᠨᠴᠤᠳ ᠤᠨ ᠳᠦᠷᠪᠡᠨ ᠡᠭᠦᠳᠡᠨ ᠤ ᠪᠠ ᠭᠠᠳᠠᠭᠠᠳᠤ ᠨᠠᠢᠮᠠᠨ ᠶᠢᠨ ᠳᠠᠶᠢᠵᠢ ᠨᠠᠷ ᠬᠠᠷᠠᠴᠤ ᠠᠯᠪᠠᠳᠤ᠂ ᠭᠦᠩᠵᠤ ᠎ ᠶᠢᠨ ᠳᠠᠭᠠᠯᠳᠠ ᠢᠨᠵᠢ ᠮᠠᠨᠵᠤ ᠨᠠᠷ ᠴᠦ ᠴᠦᠮ ᠭᠦᠰᠭᠡ ᠮᠠᠶᠢᠬᠠᠨ ᠲᠠᠢ ᠭᠦᠷᠦᠯᠴᠡᠨ ᠢᠷᠡᠭᠡᠳ ᠯᠠᠮ᠎ᠠ ᠨᠠᠷ ᠲᠤ ᠴᠠᠪ ᠮᠠᠩᠵᠠ ᠡᠷᠭᠦᠨ᠂ ᠮᠦᠷᠭᠦᠯ ᠰᠦᠰᠦᠭᠯᠡᠯ ᠢᠶᠠᠨ ᠭᠦᠢᠴᠡᠳᠭᠡᠨ ᠴᠠᠮ ᠦᠵᠡᠳᠡᠭ ᠮᠦᠷᠳᠡᠭᠡᠨ ᠭᠡᠷᠭᠡᠮᠳᠡᠨ ᠨᠠᠷ ᠭᠡᠷᠡᠭᠳᠡᠨ ᠎ ᠢ ᠰᠢᠳᠭᠡᠭᠦ᠂ ᠠᠯᠪᠠ ᠠᠴᠢᠶ᠎ᠠ ᠳᠡᠰᠭᠡᠭᠦ ᠵᠡᠷᠭᠡ ᠳᠤ ᠤᠷᠤᠯᠴᠠᠳᠠᠭ᠃     ᠬᠤᠰᠢᠭᠤᠨ ᠢᠷᠦᠭᠡᠯ ᠤᠨ ᠨᠠᠶᠢᠷ ᠢ ᠬᠤᠰᠢᠭᠤ ᠵᠠᠰᠠᠭ᠂ ᠶᠠᠮᠤᠨ ᠤ ᠵᠠᠬᠢᠷᠤᠭᠴᠢ᠂ ᠯᠠᠮᠠ ᠤᠮᠵᠠᠳ ᠡᠷᠬᠢᠯᠡᠨ ᠭᠦᠢᠴᠡᠳᠭᠡᠳᠡᠭ᠃     2. ᠳᠠᠬᠢᠯᠭ᠎ᠠ ᠶᠢᠨ ᠨᠠᠶᠢᠷ   ᠡᠭᠦᠨ ᠳᠤ ᠸᠠᠩ ᠨᠤᠶᠠᠳ ᠤᠨ ᠳᠡᠭᠡᠳᠦᠰ ᠢ ᠳᠠᠬᠢᠬᠤ᠂ ᠬᠤᠶᠠᠷ ᠭᠦᠩᠵᠤ ᠳᠠᠬᠢᠬᠤ ᠪᠠ ᠤᠪᠤᠭ᠎ᠠ ᠪᠤᠯᠠᠭ ᠱᠠᠩᠰᠢ ᠰᠢᠭᠤᠢ ᠶᠢ ᠳᠠᠬᠢᠬᠤ ᠮᠡᠳᠤ ᠵᠦᠢᠯ ᠪᠠᠭᠳᠠᠳᠠᠭ᠃ ᠡᠳᠡᠭᠡᠷ ᠢ ᠪᠦᠷ ᠳᠤᠭᠳᠠᠭᠠᠯ ᠲᠠᠢ ᠤᠯᠠᠷᠢᠯ ᠪᠤᠶᠤ ᠡᠳᠦᠷ ᠳᠠᠬᠢᠵᠤ ᠵᠠᠷᠢᠮ ᠳᠠᠭᠠᠨ ᠤᠪᠤᠭ᠎ᠠ ᠱᠠᠩᠰᠢ ᠪᠤᠯᠠᠭ ᠪᠦᠭᠦᠳᠡ ᠶᠢ ᠬᠠᠮᠳᠤ ᠎ ᠳᠤᠨᠢ ᠳᠠᠬᠢᠳᠠᠭ᠃     ᠳᠠᠬᠢᠯᠭ᠎ᠠ ᠶᠢᠨ ᠨᠠᠶᠢᠷ ᠲᠤ ᠡᠷᠭᠦᠯ ᠰᠠᠴᠤᠯᠢ ᠶᠢ ᠭᠦᠢᠴᠡᠳᠭᠡᠭᠡᠳ ᠪᠦᠭᠡ ᠪᠠᠷᠢᠯᠳᠤᠨ ᠮᠤᠷᠢ ᠤᠷᠤᠯᠳᠤᠨ ᠡᠪᠦᠭᠡᠳ ᠢ ᠪᠠᠶᠠᠰᠬᠠᠨ ᠭᠡᠤᠭᠡᠳ ᠢ ᠨᠠᠭᠠᠳᠤᠭᠤᠯᠳᠠᠭ᠃     ᠤᠪᠤᠭ᠎ᠠ ᠱᠠᠩᠰᠢᠨ ᠤ ᠳᠠᠬᠢᠯᠭ᠎ᠠ ᠶᠢᠨ ᠨᠠᠶᠢᠷ ᠢ ᠨᠤᠳᠤᠭ ᠤᠰᠤ ᠠᠭᠤᠯᠠ ᠬᠠᠶᠢᠷᠬᠠᠨ ᠢᠶᠠᠨ ᠬᠠᠮᠠᠭᠠᠯᠠᠨ᠂ ᠮᠠᠯ ᠰᠦᠷᠦᠭ ᠢᠶᠠᠨ ᠦᠨᠢᠷ ᠦᠰᠭᠡᠵᠤ᠂ ᠵᠤᠯ ᠵᠢᠷᠭᠠᠯ ᠲᠠᠢ ᠠᠮᠢᠳᠤᠷᠠᠬᠤ ᠶᠢ ᠵᠦᠩᠨᠡᠨ ᠪᠠᠶᠠᠨ ᠳᠠᠷᠭᠤᠨ ᠵᠤᠨ ᠨᠠᠮᠤᠷ ᠤᠨ ᠴᠠᠭ ᠲᠤ ᠬᠢᠵᠤ᠂ ᠠᠭᠤᠯᠠ ᠤᠰᠤ ᠪᠠᠨ ᠳᠠᠷᠬᠠᠯᠠᠨ ᠮᠠᠯ ᠠᠬᠤᠢ ᠪᠠᠨ ᠤᠩᠭᠤᠯᠠᠳᠠᠭ᠃     ᠤᠪᠤᠭᠠᠨ ᠨᠠᠶᠢᠷ ᠲᠤ ᠰᠢᠯᠢᠳᠡᠭ ᠪᠦᠭᠡ 32᠂ ᠰᠠᠶᠢᠨ ᠮᠤᠷᠢ ᠭᠤᠴᠢᠭᠠᠳ᠂ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ 16 ᠳᠡᠳᠦᠢ ᠶᠢ ︵ᠵᠢᠷᠤᠭ᠎ᠠ ᠮᠤᠷᠢ᠂ ᠦᠷᠢᠶ᠎ᠡ ᠳᠠᠭ᠎ᠠ᠂ ᠠᠵᠢᠷᠭ᠎ᠠ ᠤᠷᠤᠯᠳᠤᠳᠠᠭ ᠦᠭᠡᠢ︶ ᠰᠢᠯᠭᠠᠷᠠᠭᠤᠯᠤᠨ ᠤᠪᠤᠭ᠎ᠠ ᠎ ᠶᠢᠨ ᠭᠡᠰᠢᠭ ᠢᠶᠠᠷ ᠱᠠᠩᠨᠠᠭᠠᠳ ᠭᠡᠯᠡᠮᠦᠷᠴᠢ ᠢᠷᠦᠭᠡᠯᠴᠢ ᠠᠴᠠ ᠴᠤᠯᠠ ᠳᠠᠭᠤᠳᠠᠨ ᠡᠳᠦᠷ ᠲᠤᠨᠢ ᠳᠠᠭᠤᠰᠬᠠᠳᠠᠭ᠃    ᠮᠤᠳᠤ ᠰᠢᠭᠤᠢ᠂ ᠤᠰᠤ ᠪᠤᠯᠠᠭ ᠢ ᠴᠠᠭᠠᠨ ᠢᠶᠠᠷ ᠳᠠᠬᠢᠳᠠᠭ᠃ ᠡᠷᠬᠢᠯᠡᠳᠡᠭ ᠨᠢ ᠤᠰᠤᠨ ᠤ ᠳᠦᠷᠦᠭᠦᠦ ᠮᠤᠳᠤᠨ ᠎ ᠤ ᠡᠵᠡᠨ᠃ ᠪᠤᠰᠤᠳ ᠠᠵᠢᠯᠯᠠᠭ᠎ᠠ ᠨᠢ ᠤᠪᠤᠭ᠎ᠠ ᠶᠢᠨ ᠳᠠᠬᠢᠯᠭ᠎ᠠ ᠶᠢᠨ ᠨᠠᠶᠢᠷ ᠲᠠᠢ ᠠᠳᠠᠯᠢᠬᠠᠨ ᠪᠢᠯᠡ᠃    3. ᠨᠠᠰᠤᠳᠠᠨ ᠤ ᠪᠠᠶᠠᠷ   ᠨᠠᠰᠤᠳᠠᠨ ᠤ ᠪᠠᠶᠠᠷ ᠭᠡᠳᠡᠭ ᠨᠢ ᠵᠢᠯ ᠵᠡᠷᠭᠡᠴᠡᠭᠰᠡᠨ ︵ᠳᠦᠴᠢ ᠶᠢᠰᠦ᠂ ᠵᠢᠷᠠᠨ ᠨᠢᠭᠡ ᠂ ᠳᠠᠯᠠᠨ ᠭᠤᠷᠪᠠ᠂ ᠨᠠᠶᠠᠨ ᠳᠠᠪᠤ᠂ ᠶᠠᠷᠡᠨ ᠳᠤᠯᠤᠭ᠎ᠠ︶ ᠪᠠᠶᠠᠷ᠂ ᠭᠠᠯ ᠭᠤᠯᠤᠮᠳᠠ ᠪᠠᠨ ᠵᠠᠯᠭᠠᠬᠤ ᠪᠠᠶᠠᠷ᠂ ᠵᠢᠷᠠ᠂ ᠳᠠᠯᠠ᠂ ᠨᠠᠶᠠ᠂ ᠶᠠᠷᠠ ᠨᠠᠰᠤᠯᠠᠭᠰᠠᠨ ᠨᠠᠰᠤᠳᠠᠨ ᠦᠷ᠎ᠡ ᠭᠡᠤᠭᠡᠳ ᠤᠨ ᠢᠶᠠᠨ ᠰᠠᠶᠢᠨ ᠰᠠᠶᠢᠬᠠᠨ ᠢ ᠦᠵᠡᠭᠡ ᠨᠠᠶᠢᠷ ᠢ ᠭᠡᠯᠡᠳᠡᠭ᠃ ᠡᠭᠦᠨ ᠢ ᠦᠷ᠎ᠡ ᠭᠡᠤᠭᠡᠳ ᠳᠦᠷᠦᠯ ᠰᠠᠳᠤᠨ ᠨᠢ ᠬᠢᠳᠡᠭ᠃ ᠡᠳᠡᠭᠡᠷ ᠪᠠᠶᠠᠷ ᠨᠠᠶᠢᠷ ᠳᠡᠭᠡᠷ᠎ᠡ᠂ ᠦᠷ᠎ᠡ ᠭᠡᠤᠭᠡᠳ᠂ ᠵᠢᠭᠡ ᠨᠠᠭᠠᠴᠤ᠂ ᠳᠦᠷᠦᠯ ᠰᠠᠳᠤᠨ ᠨᠢ ᠪᠦᠷ ᠬᠠᠯᠠᠭᠤᠨ ᠬᠤᠰᠢᠭᠤ ᠲᠠᠢ ᠮᠠᠯ᠂ ᠠᠶᠤᠰᠢ ᠬᠠᠳᠠᠭ᠂ ᠪᠦᠭᠦᠯᠢ ᠰᠢᠭᠦᠰᠤ᠂ ᠳᠠᠪᠡᠯ ᠭᠤᠳᠤᠯ ᠪᠤᠶᠤ ᠳᠡᠪᠡᠯ ᠤᠨ ᠳᠤᠷᠭ᠎ᠠ᠂ ᠤᠯᠪᠤᠭ ᠳᠠᠪᠤᠯᠠᠭ ᠲᠠᠢ ᠪᠠᠷ ᠵᠢᠯ ᠤᠨ ᠰᠡᠭᠦᠯ ᠰᠠᠷ᠎ᠠ ᠪᠤᠶᠤ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠡᠶᠡᠯᠳᠡᠭ ᠡᠳᠦᠷ ︵ᠢᠪᠡᠭᠡᠯ ᠰᠠᠷ᠎ᠠ ᠡᠳᠦᠷ ᠪᠢᠰᠢ︶ ᠢᠷᠡᠵᠤ ᠪᠡᠯᠭᠡᠯᠡᠭᠦ ᠶᠤᠰᠤ ᠤᠴᠢᠷ ᠢ ᠭᠦᠢᠴᠡᠳᠭᠡᠳᠡᠭ᠃ ᠨᠠᠰᠤᠨ ᠪᠠᠶᠠᠷ ᠤᠨ ᠨᠠᠶᠢᠷ ᠳᠡᠭᠡᠷ᠎ᠡ ᠮᠤᠷᠢ ᠤᠷᠤᠯᠳᠤᠨ ᠪᠦᠭᠡ ᠪᠠᠷᠢᠯᠳᠤᠳᠠᠭ ᠦᠭᠡᠢ᠃ ᠬᠠᠷᠪᠤᠯᠭ᠎ᠠ ᠨᠠᠮᠨᠠᠭ᠎ᠠ ᠬᠢᠵᠤ ᠭᠡᠤᠭᠡᠳ ᠲᠤ ᠨᠠᠭᠠᠳᠤᠭᠤᠯᠳᠠᠭ᠃    4. ᠭᠡᠤᠭᠡᠳ ᠤᠨ ᠨᠠᠶᠢᠷ  ᠭᠡᠤᠭᠡᠳ ᠤᠨ ᠨᠠᠶᠢᠷ ᠲᠤ ᠤᠬᠢᠶᠠᠯᠭ᠎ᠠ᠂ ᠦᠯᠦᠭᠡᠢ ᠶᠢᠨ ᠬᠤᠷᠢᠮ᠂ ᠤᠢ᠂ ᠲᠠᠬᠢ ᠦᠷᠪᠡᠯᠭᠡ ᠠᠪᠬᠤ ᠮᠡᠳᠤ ᠳᠡᠰ ᠳᠠᠷᠠᠭ᠎ᠠ ᠲᠠᠢ ᠬᠢᠳᠡᠭ᠃     ᠭᠡᠤᠭᠡᠳ ᠤᠨ ᠨᠠᠶᠢᠷ ᠲᠤ ᠭᠤᠤᠯᠳᠠᠭᠤ ᠬᠠᠮᠢᠶᠠᠳᠠᠨ ᠰᠠᠳᠤᠨ᠂ ᠢᠳᠤᠭᠠᠨ ︵ᠡᠭᠡ ᠪᠠᠷᠢᠭᠴᠢ︶ ᠨᠠᠷ ᠢ ᠵᠠᠯᠠᠵᠤ ᠭᠡᠷ ᠬᠤᠪᠢ ᠪᠠᠷ ᠢᠶᠠᠨ ᠨᠠᠶᠢᠷᠯᠠᠳᠠᠭ᠃ ᠡᠭᠦᠨ ᠳᠤ ᠭᠡᠤᠭᠡᠳ ᠢ ᠡᠩᠭᠦᠷᠡᠶᠢᠯᠡᠭᠰᠡᠨ ᠢᠷᠦᠭᠡᠯ ᠳᠤᠰᠪᠦᠷᠢ ᠬᠠᠶᠢᠷᠠᠯᠠᠳᠠᠭ᠃ ᠪᠦᠭᠡ ᠪᠠᠷᠢᠯᠳᠤᠨ ᠮᠤᠷᠢ ᠤᠷᠤᠯᠳᠤᠳᠠᠭ ᠦᠭᠡᠢ᠃ ᠬᠠᠷᠢᠨ ᠬᠠᠷᠪᠤᠭᠠᠴᠢ ᠵᠠᠯᠠᠵᠤ ᠰᠤᠷ ᠬᠠᠷᠪᠤᠭᠤᠯᠤᠨ ᠭᠡᠤᠭᠡᠳ ᠤᠨ ᠳᠤᠭᠯᠠᠭᠠᠮ ᠭᠠᠷᠭᠠᠳᠠᠭ᠃ ᠡᠭᠦᠨ ᠳᠤ ᠭᠡᠤᠭᠡᠳ ᠤᠨ ᠡᠪᠦᠭᠡ ᠨᠢ ᠭᠤᠤᠯᠯᠠᠨ᠂ ᠨᠠᠭᠠᠴᠤ ᠨᠢ ᠭᠠᠷ ᠳᠦᠷᠦᠵᠤ᠂ ᠡᠭᠡ ᠪᠠᠷᠢᠭᠴᠢ ᠡᠷᠬᠢᠮ ᠰᠠᠭᠤᠷᠢᠨ ᠳᠤ ᠰᠠᠭᠤᠳᠠᠭ᠃ ᠭᠡᠷ ᠤᠨ ᠠᠬᠠᠮᠠᠳ ᠨᠢ ᠠᠷᠢᠬᠢ ᠬᠠᠳᠠᠭ᠂ ᠰᠠᠭᠠᠯᠢ ᠰᠢᠭᠦᠰᠤ ᠪᠠᠷᠢᠵᠤ᠄     ︽ᠠᠭᠤᠤ ᠮᠤᠩᠭᠤᠯ ᠤᠨ ᠠᠶᠢᠮᠠᠭ     ᠠᠯᠳᠠᠨ ᠤᠳᠤ ᠰᠢᠭ᠋ ᠳᠦᠭᠡᠯ᠎ᠡ     ᠠᠯᠳᠠᠷᠳᠤ ᠮᠠᠨ ᠤ ᠦᠷᠡᠳᠦᠰ     ᠠᠷᠢᠭᠤᠨ ᠭᠤᠯᠤᠮᠳᠠ ᠪᠠᠨ ᠵᠠᠯᠭ᠎ᠠ︕︾ ᠭᠡᠭᠦ ᠮᠡᠳᠤ ᠪᠠᠷ ᠭᠠᠯ ᠭᠤᠯᠤᠮᠳᠠ ᠪᠠᠨ ᠵᠠᠯᠭᠠᠬᠤ᠂ ᠭᠠᠳᠠᠭᠰᠢ ᠮᠤᠷᠳᠠᠭᠤᠯᠬᠤ ᠦᠷ᠎ᠡ ᠲᠠᠢ ᠪᠤᠯᠤᠭᠰᠠᠨ ᠢᠶᠠᠨ ᠪᠡᠯᠭᠡᠳᠡᠨ ᠢᠷᠦᠭᠡᠳᠡᠭ᠃     5. ᠮᠠᠯ ᠤᠨ ᠨᠠᠶᠢᠷ  ᠪᠠᠭᠠᠷᠢᠨᠴᠤᠳ ᠴᠠᠭᠠᠨ ᠰᠠᠷ᠎ᠠ ᠳᠤ ᠪᠤᠶᠤ ᠦᠴᠦᠬᠡᠨ ᠳᠦᠭᠦᠷᠡᠩ ᠤᠨ ᠦᠶ᠎ᠡ ᠪᠠᠷ ᠮᠠᠯ ᠎ ᠤᠨ ᠨᠠᠶᠢᠷ᠂ ᠮᠠᠯᠴᠢᠨ ᠪᠠᠭᠠᠳᠤᠷ ᠤᠨ ᠨᠠᠶᠢᠷ ᠬᠢᠳᠡᠭ᠃ ᠡᠨᠡ ᠨᠠᠶᠢᠷ ᠳᠡᠭᠡᠷ᠎ᠡ ᠮᠠᠯ ᠬᠠᠷᠢᠭᠤᠯᠤᠭᠴᠢᠳ ᠢᠶᠠᠨ ᠭᠦᠨᠳᠦᠳᠭᠡᠨ ᠳᠠᠶᠢᠯᠠᠳᠠᠭ᠃ ᠵᠠᠯᠠᠳᠡᠩ ᠮᠠᠯ ︵ᠵᠢᠯ ᠪᠦᠷᠢ ᠳᠦᠷᠦᠳᠡᠭ ᠮᠠᠯ︶᠂ ᠵᠢᠳᠭᠦᠯᠳᠠᠢ ᠮᠠᠯ᠂ ᠦᠷ᠎ᠡ ᠰᠠᠶᠢᠳᠠᠢ ᠮᠠᠯ ᠢ ᠤᠩᠭᠤᠯᠠᠳᠠᠭ᠃ ᠡᠨᠡ ᠨᠢ ᠡᠷᠳᠡᠨ ᠳᠡᠭᠡᠨ ᠰᠦᠯᠳᠡ ᠳᠠᠬᠢᠯᠭ᠎ᠠ ᠲᠠᠢ᠂ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠭᠤᠷᠪᠠᠨ ᠳᠤ ᠵᠢᠯ ᠤᠨ ᠡᠬᠢᠨ ᠤ ᠨᠠᠶᠢᠷ ᠢᠶᠠᠷ ᠪᠦᠭᠡ᠂ ᠬᠠᠷᠪᠤᠯᠭ᠎ᠠ ᠲᠠᠢ ᠶᠠᠪᠤᠭᠳᠠᠵᠤ ᠪᠠᠶᠢᠵᠠᠢ᠃ ᠰᠡᠭᠦᠯᠳᠡᠵᠤ ᠢᠷᠡᠭᠡᠳ ᠮᠠᠯ ᠤᠨ ᠰᠢᠨ᠎ᠡ ᠶᠢᠨ ᠨᠠᠶᠢᠷ ᠪᠤᠯᠵᠤ᠂ ᠱᠠᠭ᠎ᠠ ᠤᠷᠬᠢᠵᠤ᠂ ᠳᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠢᠷᠦᠭᠡᠯ ᠳᠠᠯᠪᠢᠬᠤ ᠂ ᠠᠳᠤᠭᠤᠯᠤᠭᠴᠢᠳ ᠢ ᠰᠠᠶᠢᠰᠢᠶᠠᠬᠤ ᠳᠤᠰᠬᠠᠢ ᠨᠠᠶᠢᠷ ᠪᠤᠯᠵᠠᠢ᠃ ᠳᠡᠷᠡᠴᠢᠯᠡᠨ᠂ ᠮᠠᠯ ᠤᠨ ᠰᠢᠨ᠎ᠡ ᠶᠢᠨ ᠨᠠᠶᠢᠷ ᠢ ᠳᠦᠯ ᠤᠨ ᠨᠠᠶᠢᠷ᠂ ᠦᠷᠡᠰ ᠤᠨ ᠰᠠᠴᠤᠯᠭ᠎ᠠ ᠶᠢᠨ ᠨᠠᠶᠢᠷ᠂ ᠠᠳᠤᠭᠤ ᠳᠡᠯᠡᠯᠭᠡ ᠶᠢᠨ ᠨᠠᠶᠢᠷ᠂ ᠮᠠᠯ ᠭᠦᠩᠭᠡᠯᠡᠭᠦ ᠨᠠᠶᠢᠷ᠂ ᠳᠤᠭᠤᠭ᠎ᠠ ᠨᠡᠷᠡᠯᠳᠡ ᠶᠢᠨ ᠨᠠᠶᠢᠷ᠂ ᠢᠰᠡᠭᠡᠢ ᠬᠢᠭᠦ᠂ ᠠᠷᠠᠰᠤ ᠪᠤᠯᠪᠠᠰᠤᠷᠠᠭᠤᠯᠬᠤ ᠵᠡᠷᠭᠡ ᠶᠢᠨ ᠨᠠᠶᠢᠷ ᠲᠠᠢ ᠡᠳᠦᠷ ᠬᠤᠭᠤᠴᠠᠭ᠎ᠠ ᠶᠢ ᠨᠢ ᠦᠵᠡᠵᠤ ᠬᠠᠮᠳᠤᠷᠠᠭᠤᠯᠬᠤ ᠪᠤᠯᠵᠠᠢ᠃ ᠡᠶᠢᠮᠦᠷᠭᠦ ᠨᠠᠶᠢᠷ ᠳᠡᠭᠡᠷ᠎ᠡ ᠪᠦᠭᠡ᠂ ᠮᠤᠷᠢ᠂ ᠰᠤᠷ ᠬᠠᠷᠪᠤᠬᠤ ᠨᠠᠭᠠᠳᠤᠮ ᠪᠠᠶᠢᠳᠠᠭ ᠦᠭᠡᠢ᠃ ᠢᠷᠦᠭᠡᠯ ᠬᠤᠯᠪᠤᠭ᠎ᠠ ᠳᠠᠭᠤᠤ ᠰᠢᠯᠦᠭ ᠲᠠᠢ᠃     ᠪᠠᠭᠠᠷᠢᠨ ᠳᠤ ᠪᠠᠶᠢᠳᠠᠭ ᠪᠠᠰᠠ ᠨᠢᠭᠡᠨ ᠵᠦᠢᠯ ᠤᠨ ᠤᠨᠴᠠ ᠨᠠᠶᠢᠷ ᠭᠡᠪᠡᠯ᠂ ᠳᠠᠬᠢᠨᠢᠰ ᠤᠨ ᠰᠦᠮ᠎ᠡ ᠶᠢᠨ ᠬᠤᠷᠠᠯ ᠎ ᠤᠨ ᠨᠠᠶᠢᠷ᠂ ᠪᠤᠩᠬᠤᠨ ᠨᠠᠶᠢᠷ ᠭᠡᠭᠦ ᠮᠡᠳᠤ ᠶᠢᠨ ᠢᠨᠵᠢ ᠮᠠᠨᠵᠤ ᠶᠢᠨ ᠬᠢᠳᠡᠭ ᠨᠠᠶᠢᠷ ᠪᠤᠢ᠃ ᠡᠭᠦᠨ ᠤ ᠬᠢᠳᠡᠯ ᠨᠢ ᠪᠠᠭᠠᠷᠢᠨᠴᠤᠳ ᠤᠨ ᠤᠪᠤᠭ᠎ᠠ ᠶᠢᠨ ᠨᠠᠶᠢᠷ ᠲᠠᠢ ᠠᠳᠠᠯᠢ ᠪᠢᠯᠡ᠃
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠤ ᠰᠤᠶᠦᠯ ᠲᠡᠦᠬᠡ