ᠦᠮᠴᠢ ᠬᠤᠪᠢ ᠬᠤᠪᠢᠶᠠᠬᠤ ᠵᠤᠷᠰᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/19
     ᠦᠮᠴᠢ ᠬᠤᠪᠢ ᠬᠤᠪᠢᠶᠠᠬᠤ ᠭᠡᠳᠡᠭ ᠨᠢ ᠡᠴᠢᠭᠡ ᠭᠦᠦ᠂ ᠠᠬ᠎ᠠ ᠳᠡᠭᠦᠦ ᠳᠤᠰ ᠳᠤᠰ ᠲᠠᠭᠠᠨ ᠭᠠᠯ ᠭᠤᠯᠤᠮᠳᠠ ᠡᠭᠦᠳᠡ ᠡᠷᠦᠭᠡ ᠲᠠᠢ ᠪᠤᠯᠵᠤ ᠳᠤᠰᠬᠠᠢ ᠠᠮᠢᠳᠤᠷᠠᠬᠤ ᠳᠠᠭᠠᠨ ᠭᠡᠪᠳᠡᠭᠡ ᠪᠤᠰᠤᠭ᠎ᠠ ᠭᠦᠷᠦᠩᠭᠡ ᠪᠠᠨ ᠬᠤᠪᠢᠶᠠᠳᠠᠭ ᠶᠤᠰᠤ ᠶᠢ ᠭᠡᠯᠡᠳᠡᠭ᠃      ᠪᠠᠭᠠᠷᠢᠨᠴᠤᠳ ᠪᠤᠰᠤᠳ ᠶᠠᠰᠤᠳᠠᠳ ᠲᠠᠢ ᠠᠳᠠᠯᠢ ᠪᠠᠷ ᠰᠠᠯᠵᠤ ᠪᠤᠳᠠᠷᠠᠬᠤ᠂ ᠦᠮᠴᠢ ᠭᠦᠷᠦᠩᠭᠡ ᠬᠤᠪᠢᠶᠠᠬᠤ ᠎ ᠶᠢ ᠡᠯᠢᠭᠡ ᠵᠠᠶᠢᠳᠠᠵᠤ ᠡᠪᠴᠢᠭᠦᠦ ᠭᠦᠨᠳᠡᠶᠢᠷᠡᠵᠤ ᠪᠠᠶᠢᠭ᠎ᠠ ᠦᠵᠡᠳᠡᠭ ᠳᠤᠯᠠ ︽ᠪᠦᠳᠦᠨ᠎ᠡ ᠶᠢᠨ ᠵᠤᠯᠵᠠᠭ᠎ᠠ ᠪᠦᠯᠦᠭ ᠎ ᠢᠶᠠᠷ ᠢᠶᠠᠨ ᠳᠡᠭᠡᠷ᠎ᠡ᠂ ᠢᠳᠠᠭᠤ ᠶᠢᠨ ᠵᠤᠯᠵᠠᠭ᠎ᠠ ᠠᠶᠢᠮᠠᠭ ᠢᠶᠠᠷ ᠢᠶᠠᠨ ᠡᠷᠬᠢᠮ︾ ᠭᠡᠵᠤ ᠴᠢᠳᠠᠬᠤᠶᠢᠴᠠ ᠪᠠᠷ ᠬᠠᠮᠳᠤ ᠠᠮᠢᠳᠤᠷᠠᠳᠠᠭ᠃ ᠭᠡᠪᠡᠴᠤ ᠡᠯᠳᠡᠪ ᠰᠢᠯᠳᠠᠭᠠᠨ ᠠᠴᠠ ᠪᠤᠯᠵᠤ ᠠᠷᠭ᠎ᠠ ᠪᠤᠰᠤ ᠦᠮᠴᠢ ᠬᠤᠪᠢ ᠬᠤᠪᠢᠶᠠᠬᠤ ᠳᠤ ᠳᠤᠯᠪᠠᠯ᠂ ᠳᠡᠭᠦᠨ ᠢ ᠵᠢᠭᠤᠷᠠᠯᠳᠤᠭᠠᠨ ᠦᠭᠡᠢ ᠪᠠᠷ ᠵᠤᠬᠢᠰᠳᠠᠢ ᠰᠢᠢᠳᠪᠦᠷᠢᠯᠡᠭᠦ ᠤᠯᠠᠮᠵᠢᠯᠠᠯᠳᠤ ᠶᠤᠰᠤ ᠵᠢᠷᠦᠮ ᠲᠠᠢ ᠪᠢᠯᠡ᠃      ᠭᠡᠤᠭᠡᠳ ᠲᠡᠭᠡᠨ ᠬᠤᠪᠢᠳᠠᠭᠰᠠᠨ ᠭᠦᠷᠦᠩᠭᠡ ᠬᠤᠭᠰᠢᠯ ᠲᠠᠢ ᠪᠤᠯᠭᠠᠬᠤ ᠶᠢ ᠠᠬᠠᠮᠠᠳ ᠨᠢ ᠤᠨᠴᠠ ᠠᠩᠬᠠᠷᠳᠠᠭ ᠃ ᠦᠳᠦᠰᠤ ᠨᠠᠮᠠᠭ᠎ᠠ ᠵᠠᠯᠭᠠᠬᠤ ᠦᠷ᠎ᠡ ᠭᠡᠤᠭᠡᠳ ᠲᠠᠢ ᠪᠤᠯᠤᠮᠠᠭᠴᠠ ᠬᠠᠮᠢᠶᠠᠳᠠᠨ ᠰᠠᠳᠤᠨ ᠨᠢ ᠮᠠᠯ ᠤᠨᠤᠭ᠎ᠠ ᠵᠢᠭᠠᠵᠤ ᠦᠭᠳᠡᠭ᠃ ᠭᠦᠦ ᠳᠡᠭᠡᠨ ᠪᠡᠷᠢ ᠪᠠᠭᠤᠯᠭᠠᠬᠤ᠂ ᠭᠡᠤᠭᠡᠳ ᠢᠶᠠᠨ ᠬᠠᠷᠢ ᠳᠤ ᠮᠤᠷᠳᠠᠭᠤᠯᠬᠤ ᠳᠤ ᠭᠡᠷ ᠤᠨ ᠠᠬᠠᠮᠠᠳ ᠨᠢ ᠵᠠᠪᠠᠯ ᠠᠮᠢᠳᠤᠷᠠᠯ ᠤᠨ ᠬᠢᠷᠢ ᠪᠠᠷ ᠢᠶᠠᠨ ᠴᠢᠷᠮᠠᠶᠢᠵᠤ᠂ ᠭᠦᠦ ᠳᠡᠭᠡᠨ ᠭᠡᠷ ᠤᠨ ᠡᠳ᠋ᠯᠡᠯ᠂ ᠭᠡᠤᠭᠡᠳ ᠳᠡᠭᠡᠨ ᠢᠨᠵᠢ ᠮᠠᠯ ᠪᠡᠯᠡᠳᠭᠡᠵᠤ ᠦᠭᠳᠡᠭ᠃ ᠭᠡᠳᠦᠢ ᠶᠠᠳᠠᠭᠤ ᠠᠶᠢᠯ ᠪᠤᠯᠪᠠᠴᠤ ᠳᠠᠪᠰᠠᠭ ᠠᠪᠳᠠᠷ᠎ᠠ᠂ ᠳᠦᠷᠪᠡᠨ ᠴᠠᠭ ᠤᠨ ᠡᠮᠦᠰᠬᠡᠯ ᠪᠡᠯᠡᠳᠭᠡᠳᠡᠭ᠃      ᠬᠤᠪᠢᠳᠠᠵᠤ ᠨᠡᠷᠡᠯᠡᠭᠰᠡᠨ ᠡᠳ᠋ ᠭᠦᠷᠦᠩᠭᠡ᠂ ᠢᠯᠠᠩᠭᠤᠶ᠎ᠠ ᠮᠠᠯ ᠨᠢ ᠦᠷᠡᠵᠢᠵᠤ ᠦᠰᠦᠭᠰᠡᠨ᠂ ᠬᠤᠳᠠᠯᠳᠤᠵᠤ ᠵᠠᠷᠤᠭᠠᠳ ᠤᠷᠤ ᠪᠤᠰᠬᠠᠭᠰᠠᠨ ᠪᠦᠭᠦᠨ ᠢᠶᠠᠷ ᠢᠶᠠᠨ ᠭᠡᠵᠢᠶ᠎ᠡ ᠴᠦ ᠭᠡᠰᠡᠨ ᠬᠤᠪᠢᠳᠠᠭᠰᠠᠳ ᠤᠨ ᠬᠢ ᠪᠢᠯᠡ᠃ ᠡᠶᠢᠮᠦ ᠎ ᠠᠴᠠ ᠭᠤᠯᠤᠮᠳᠠ ᠨᠢᠭᠡᠳᠠᠢ ᠬᠠᠮᠳᠤ ᠠᠮᠢᠳᠤᠷᠠᠵᠤ᠂ ᠭᠡᠷ ᠤᠨ ᠡᠵᠡᠨ ᠠᠯᠢᠪᠠ ᠶᠢ ᠡᠵᠡᠳᠡᠨ ᠬᠠᠮᠢᠶᠠᠷᠴᠤ ᠪᠠᠶᠢᠭᠰᠠᠨ ᠴᠦ ᠳᠤᠰ ᠳᠤᠰ ᠲᠠᠭᠠᠨ ᠠᠳᠠᠯᠢ ᠪᠤᠰᠤ ᠶᠢᠨ ᠦᠮᠴᠢ ᠭᠦᠷᠦᠩᠭᠡ ᠲᠠᠢ ᠪᠠᠶᠢᠳᠠᠭ᠃ ᠭᠡᠷᠪᠡ ᠦᠮᠴᠢ ᠭᠦᠷᠦᠩᠭᠡ ᠬᠤᠪᠢᠶᠠᠵᠤ᠂ ᠭᠠᠯ ᠭᠤᠯᠤᠮᠳᠠ ᠰᠠᠯᠵᠤ᠂ ᠠᠶᠢᠯ ᠡᠷᠦᠭᠡ ᠪᠤᠯᠬᠤ ᠳᠤ ᠭᠦᠷᠪᠡᠯ᠂ ᠡᠳᠡᠭᠡᠷ ᠮᠠᠯ ᠨᠢ ᠬᠤᠪᠢᠳᠠᠭᠰᠠᠨ ᠡᠵᠡᠨ ᠢᠶᠠᠨ ᠳᠠᠭᠠᠳᠠᠭ᠃ ᠦᠮᠴᠢ ᠬᠤᠪᠢ ᠬᠤᠪᠢᠶᠠᠵᠤ ᠡᠷᠦᠭᠡ ᠭᠡᠷ ᠰᠠᠯᠤᠭᠰᠠᠨ ᠴᠦ ᠦᠰᠢᠶ᠎ᠡ ᠬᠤᠨᠵᠢᠩ ᠡᠪᠦᠷᠯᠡᠵᠤ ᠪᠤᠯᠳᠠᠭ ᠦᠭᠡᠢ᠃      ᠬᠤᠶᠠᠷ ᠭᠦᠦ ᠲᠠᠢ ᠠᠶᠢᠯ ᠬᠤᠶᠠᠭᠤᠯᠠ ᠪᠠᠨ ᠭᠡᠷᠯᠡᠭᠰᠡᠨ ᠪᠤᠯ ᠭᠡᠷ ᠤᠨ ᠠᠬᠠᠮᠠᠳ ᠨᠢ ᠤᠤᠭᠠᠨ ᠭᠦᠦ ᠳᠡᠭᠡᠨ ᠠᠰ ᠲᠤᠨᠢ ᠭᠡᠷ ᠳᠡᠷᠭᠡ ᠪᠡᠯᠡᠳᠭᠡᠨ ᠦᠭᠴᠤ᠂ ᠭᠡᠷ ᠤᠨ ᠪᠦᠷᠢᠯᠳᠦᠭᠦᠨ ᠳᠤ ᠨᠤᠭᠳᠠᠬᠤ ᠮᠠᠯ ᠤᠨ ᠵᠢᠱᠢᠮ ᠢ ᠦᠵᠡᠵᠤ ᠂ ᠠᠩᠬ᠎ᠠ ᠠᠶᠢᠯ ᠪᠤᠯᠵᠤ ᠪᠠᠶᠢᠬᠤ ᠶᠢ ᠪᠤᠳᠤᠯᠬᠢᠯᠠᠨ ᠢᠯᠡᠭᠦᠦ ᠰᠢᠭ ᠬᠤᠪᠢᠶᠠᠵᠤ ᠦᠭᠳᠡᠭ᠃ ᠭᠡᠳᠦᠶᠢᠪᠡᠷ ᠭᠡᠷ ᠡᠷᠦᠭᠡ ᠰᠠᠯᠤᠭᠰᠠᠨ ᠴᠦ ᠵᠢᠭᠠᠨ ᠵᠢᠯᠤᠭᠤᠳᠴᠤ᠂ ᠳᠡᠮᠵᠢᠨ ᠳᠤᠰᠠᠯᠠᠬᠤ ᠶᠢ ᠪᠤᠳᠤᠨ ᠳᠡᠮᠡᠢ ᠬᠤᠯᠠᠳᠠᠭᠤᠯᠳᠠᠭ ᠦᠭᠡᠢ᠃      ᠠᠬ᠎ᠠ ᠳᠡᠭᠦᠦ ᠭᠡᠳᠦᠭᠦᠯᠡ ᠠᠶᠢᠯ ᠡᠷᠦᠭᠡ ᠪᠤᠯᠤᠭᠠᠳ ᠰᠠᠯᠬᠤ ᠳᠤ ᠭᠦᠷᠪᠡᠯ᠂ ᠡᠴᠢᠭᠡ ᠶᠢᠨ ᠢᠶᠠᠨ ᠭᠠᠯ ᠭᠤᠯᠤᠮᠳᠠ ᠶᠢ ᠰᠠᠬᠢᠬᠤ ᠭᠦᠦ ︵ᠤᠳᠬᠤᠨ ᠨᠢ ᠭᠠᠯ ᠭᠤᠯᠤᠮᠳᠠ ᠪᠠᠨ ᠰᠠᠬᠢᠳᠠᠭ︶᠎ ᠨᠢ ᠢᠯᠡᠭᠦᠦ ᠰᠢᠭ ᠦᠮᠴᠢ ᠬᠤᠪᠢ ᠠᠪᠳᠠᠭ᠃ ᠪᠤᠰᠤᠳ ᠨᠢ ᠠᠳᠠᠯᠢ ᠳᠡᠭᠰᠢ ᠪᠠᠷ ᠬᠤᠪᠢᠶᠠᠳᠠᠭ᠃ ᠭᠡᠨ ᠨᠢ ᠴᠦ ᠭᠡᠳ ᠭᠡᠷ ᠤᠨ ᠠᠬᠠᠮᠠᠳ ᠤᠨ ᠦᠭᠡ ᠠᠴᠠ ᠵᠦᠷᠢᠴᠡᠳᠡᠭ ᠦᠭᠡᠢ ᠪᠦᠭᠡᠳ ᠨᠠᠷᠢᠨ ᠳᠡᠩᠰᠠ ᠪᠤᠳᠤᠵᠤ ᠴᠢᠷᠠᠢ ᠬᠤᠪᠢᠯᠭᠠᠳᠠᠭ ᠦᠭᠡᠢ᠃ ᠭᠡᠷᠪᠡ ᠦᠮᠴᠢ ᠬᠤᠪᠢ ᠬᠤᠪᠢᠶᠠᠬᠤ ᠳᠡᠭᠡᠷ᠎ᠡ ᠮᠠᠷᠭᠤᠪᠠᠯ᠂ ᠳᠦᠷᠦᠯ ᠰᠠᠳᠤᠨ ᠠᠶᠢᠯ ᠠᠶᠢᠮᠠᠭ ᠤᠨ ᠳᠤᠮᠤᠭᠠᠳᠠᠨ ᠢ ᠵᠠᠯᠠᠵᠤ ᠡᠪ ᠵᠦᠢᠳᠠᠢ ᠲᠠᠰᠤᠯᠤᠭᠤᠯᠳᠠᠭ᠃ ᠦᠮᠴᠢ ᠬᠤᠪᠢ ᠬᠤᠪᠢᠶᠠᠬᠤ ᠤᠴᠢᠷ ᠢ ᠪᠠᠷᠤᠭ ᠠᠯᠪᠠᠨ ᠤ ᠭᠠᠵᠠᠷ ᠭᠦᠷᠴᠤ ᠰᠢᠢᠳᠪᠦᠷᠢᠯᠡᠭᠦ ᠤᠴᠢᠷ ᠭᠠᠷᠳᠠᠭ ᠦᠭᠡᠢ᠃      ᠡᠴᠢᠭᠡ ᠭᠦᠦ ᠬᠤᠶᠠᠷ ᠰᠠᠯᠪᠠᠯ᠂ ᠡᠴᠢᠭᠡ ᠨᠢ ᠭᠦᠦ ᠳᠡᠭᠡᠨ ᠭᠡᠳᠦᠢ ᠮᠠᠯ ᠭᠦᠷᠦᠩᠭᠡ ᠦᠭᠪᠡᠯ ᠭᠦᠦ ᠨᠢ ᠦᠭᠡ ᠳᠠᠭᠤᠨ ᠦᠭᠡᠢ ᠪᠠᠷ ᠳᠡᠳᠦᠢ ᠶᠢ ᠯᠡ ︽ᠠᠪᠤ ᠶᠢᠨ ᠭᠡᠰᠢᠭ︾ ᠭᠡᠵᠤ ᠮᠦᠷᠭᠦᠨ ᠠᠪᠳᠠᠭ ᠠᠴᠠ ᠪᠢᠰᠢ ᠵᠦᠷᠢᠭᠦᠯᠡᠳᠡᠭ ᠦᠭᠡᠢ᠃ ᠡᠭᠡ ᠭᠦᠦ ᠬᠤᠶᠠᠷ ᠰᠠᠯᠵᠤ ᠰᠠᠭᠤᠬᠤ ᠳᠤ ᠭᠦᠷᠪᠡᠯ ︵ᠳᠦᠷᠦᠭᠰᠡᠨ ᠡᠭᠡ᠂ ᠬᠤᠶᠢᠳᠤ ᠡᠭᠡ ᠢᠯᠭᠠᠯ ᠦᠭᠡᠢ︶ ᠡᠭᠡ ᠳᠡᠭᠡᠨ ᠮᠠᠯ ᠭᠦᠷᠦᠩᠭᠡ ᠶᠢᠨ ᠢᠶᠠᠨ ᠠᠷᠪᠢᠨ ᠢ ᠦᠭᠴᠤ ᠭᠦᠦ ᠨᠢ ᠴᠦᠭᠡᠨ ᠢ ᠠᠪᠳᠠᠭ ᠵᠠᠩ ᠵᠢᠷᠦᠮ ᠲᠠᠢ᠃ ᠡᠭᠡ ᠪᠡᠷᠢ ᠬᠤᠶᠠᠷ ᠰᠠᠯᠪᠠᠯ᠂ ᠮᠠᠯ ᠭᠦᠷᠦᠩᠭᠡ ᠪᠠᠨ ᠤᠷᠤᠢ ᠬᠠᠭᠠᠰ ᠢᠶᠠᠷ ᠬᠤᠪᠢᠶᠠᠳᠠᠭ᠃ ᠪᠡᠷᠢ ᠎ ᠳᠡᠭᠡᠨ ᠪᠠᠰᠠ ᠭᠡᠷ ᠳᠡᠷᠭᠡ ᠪᠡᠯᠡᠳᠭᠡᠵᠤ ᠦᠭᠳᠡᠭ᠃ ᠭᠡᠷᠪᠡ ᠤᠮᠪᠤᠯᠤ ᠭᠡᠤᠭᠡᠳ ᠲᠠᠢ ᠪᠤᠯᠪᠠᠯ ᠡᠮᠡᠭᠡ ᠨᠢ ᠦᠪᠡᠷ ᠤᠨ ᠬᠤᠪᠢ ᠠᠴᠠ ᠪᠠᠨ ︽ᠳᠡᠭᠡᠳᠦᠰ ᠤᠨ ᠴᠢᠨᠢ ᠭᠦᠷᠦᠩᠭᠡ︾ ᠭᠡᠵᠤ ᠦᠭᠳᠡᠭ᠃ ᠳᠡᠷᠡᠴᠢᠯᠡᠨ ᠤᠷᠤᠭᠯᠠᠭᠰᠠᠨ ᠡᠳᠦᠷ ᠰᠠᠷ᠎ᠠ ᠶᠢ ᠦᠨᠳᠦᠰᠦᠯᠡᠨ ᠭᠦᠳᠡᠯᠮᠦᠷᠢ ᠶᠢᠨ ᠬᠠᠷᠠᠮᠵᠢ ᠪᠤᠯᠭᠠᠨ ᠵᠤᠬᠢᠬᠤ ᠳᠤᠭᠠᠨ ᠤ ᠮᠠᠯ ᠦᠭᠳᠡᠭ᠃     ᠡᠷᠭᠦᠭᠰᠡᠨ ᠭᠦᠦ ︵ᠦᠷᠡᠴᠢᠯᠡᠨ ᠳᠡᠵᠢᠭᠡᠭᠰᠡᠨ︶᠂ ᠰᠠᠭᠤᠭᠰᠠᠨ ᠭᠦᠷᠭᠡᠨ ︵ᠭᠦᠴᠦᠨ ᠭᠦᠷᠭᠡᠨ︶᠎ ᠲᠠᠢ ᠭᠡᠨ ᠴᠦ ᠭᠡᠳ ᠦᠮᠴᠢ ᠭᠦᠷᠦᠩᠭᠡ ᠪᠤᠯᠢᠶᠠᠯᠳᠤᠬᠤ ᠶᠤᠰᠤ ᠦᠭᠡᠢ᠃ ᠳᠡᠳᠡ ᠭᠡᠷᠪᠡ ᠡᠴᠢᠭᠡ ᠡᠭᠡ᠂ ᠠᠬ᠎ᠠ ᠳᠡᠭᠦᠤᠰ ᠎ ᠠᠴᠠ ᠪᠠᠨ ᠰᠠᠯᠬᠤ ᠳᠤ ᠭᠦᠷᠪᠡᠯ ᠭᠡᠷ ᠳᠡᠷᠭᠡ ᠪᠡᠯᠡᠳᠭᠡᠵᠤ᠂ ᠠᠮᠢᠳᠤᠷᠠᠯ ᠤᠨ ᠭᠡᠷᠡᠭᠰᠡᠯ ᠪᠦᠷᠢᠨ ᠭᠠᠷᠭᠠᠬᠤ ᠪᠦᠭᠡᠳ ᠢᠯᠡᠭᠦᠦ ᠰᠢᠭ ᠮᠠᠯ ᠦᠭᠳᠡᠭ᠃ ᠡᠷᠭᠦᠭᠰᠡᠨ ᠭᠦᠦ᠂ ᠰᠠᠭᠤᠭᠰᠠᠨ ᠭᠦᠷᠭᠡᠨ ᠰᠠᠯᠬᠤ ᠶᠠᠪᠤᠳᠠᠯ ᠳᠤᠩ ᠴᠦᠭᠡᠨ᠃ ᠭᠡᠷᠪᠡ ᠰᠠᠯᠪᠠᠯ ︽ᠡᠷᠭᠦᠭᠰᠡᠨ ᠭᠦᠦ ᠡᠯᠢᠭᠡ ᠦᠭᠡᠢ᠂ ᠰᠠᠭᠤᠭᠰᠠᠨ ᠭᠦᠷᠭᠡᠨ ᠰᠠᠨᠠᠯ ᠦᠭᠡᠢ︾ ᠭᠡᠵᠤ ᠰᠤᠨᠵᠢᠳᠠᠭ᠃      ᠦᠷ᠎ᠡ ᠭᠡᠤᠭᠡᠳ ᠦᠭᠡᠢ ᠭᠦᠮᠦᠨ ᠤ ᠦᠯᠡᠳᠡᠭᠰᠡᠨ ᠭᠦᠷᠦᠩᠭᠡ ᠬᠤᠭᠰᠢᠯ ᠢ ᠪᠤᠯ ᠡᠵᠡᠨ ᠤ ᠬᠢᠨᠢ ᠭᠡᠷᠢᠶᠡᠰ ᠢ ᠦᠨᠳᠦᠰᠦᠯᠡᠨ᠎ᠡ᠃ ᠬᠠᠮᠤᠭ ᠤᠨ ᠤᠶᠢᠷ᠎ᠠ ᠳᠦᠷᠦᠯ ᠳᠤᠨᠢ ᠦᠭᠭᠦᠨ᠎ᠡ᠃ ᠤᠶᠢᠷ᠎ᠠ ᠳᠦᠷᠦᠯ ᠦᠭᠡᠢ ᠪᠤᠯ ᠦᠷᠭᠦᠯᠵᠢ ᠳᠠᠮᠵᠢᠨ ᠳᠤᠰᠠᠯᠠᠳᠠᠭ ᠭᠦᠮᠦᠨ ᠪᠤᠶᠤ ᠭᠦᠷᠭᠡᠨ ᠭᠡᠤᠭᠡᠨ ᠲᠠᠢ ᠪᠤᠯ ᠬᠤᠪᠢᠶᠠᠵᠤ ᠦᠭᠭᠦᠨ᠎ᠡ᠃ ᠡᠵᠡᠨ ᠨᠢ ᠬᠡᠷᠢᠶᠡᠰ ᠦᠭᠡᠢ᠂ ᠶᠤᠰᠤᠳᠠᠢ ᠢᠳᠡᠮᠡᠷ ᠭᠦᠮᠦᠨ ᠦᠭᠡᠢ ᠪᠤᠯ ᠠᠯᠪᠠᠨ ᠤ ᠭᠠᠵᠠᠷ᠂ ᠰᠦᠮ᠎ᠡ ᠭᠡᠶᠢᠳ ᠤᠨ ᠰᠠᠩ ᠳᠤ ᠳᠤᠰᠢᠶᠠᠬᠤ ᠪᠤᠶᠤ ᠨᠡᠶᠢᠳᠡ ᠳᠤ ᠠᠰᠢᠭᠳᠠᠢ ᠮᠦᠷᠳᠡᠭᠡᠨ ᠳᠤᠷᠠᠰᠬᠠᠯ ᠪᠤᠯᠭᠠᠬᠤ ᠵᠠᠷᠤᠳᠠᠯ ᠳᠤ ᠵᠠᠷᠤᠳᠠᠭ᠃     ᠯᠠᠮᠠ ᠬᠤᠸᠠᠷᠠᠭ ᠭᠦᠮᠦᠨ ᠤ ᠦᠯᠡᠳᠡᠭᠰᠡᠨ ᠭᠦᠷᠦᠩᠭᠡ ᠶᠢ ᠳᠦᠷᠦᠭᠰᠡᠨ ᠭᠡᠷ ᠤᠨ ᠬᠢᠨᠢ ᠭᠡᠤᠭᠡᠳ ᠳᠡᠭᠦᠦ ᠨᠠᠷ ᠎ ᠨᠢ ᠦᠮᠴᠢᠯᠡᠳᠡᠭ᠃ ᠳᠦᠷᠦᠭᠰᠡᠨ ᠭᠡᠷ ᠤᠨ ᠬᠢᠨ ᠤᠪᠤᠭ ᠠᠶᠢᠮᠠᠭ ᠤᠨ ᠬᠢᠨ ᠰᠢᠭᠤᠳ ᠦᠭᠡᠷ᠎ᠡ ᠰᠠᠳᠤᠨ ᠦᠭᠡᠢ ᠪᠤᠯ ᠰᠦᠮ᠎ᠡ ᠶᠢᠨ ᠰᠠᠩ ᠳᠤᠨᠢ ᠳᠤᠰᠢᠶᠠᠳᠠᠭ᠃ ᠠᠯᠪᠠᠨ ᠤ ᠭᠠᠵᠠᠷ ᠪᠤᠶᠤ ᠠᠰᠳᠠᠭᠠᠨ ᠭᠦᠮᠦᠨ ᠭᠠᠷ ᠳᠦᠷᠦᠳᠡᠭ ᠦᠭᠡᠢ᠃
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠤ ᠰᠤᠶᠤᠯ ᠲᠡᠦᠬᠡ