ᠳᠡᠭᠡᠰᠤ ᠳᠠᠮᠤᠬᠤ ᠮᠡᠷᠭᠡᠰᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/19
    ᠪᠠᠭᠠᠷᠢᠨᠴᠤᠳ ᠤᠨ ᠳᠡᠭᠡᠰᠤ ᠳᠠᠮᠤᠬᠤ ᠮᠡᠷᠭᠡᠰᠢᠯ ᠨᠢ ᠠᠯᠠᠭ᠎ᠠ ᠪᠠᠷ ᠢᠶᠠᠨ ᠳᠠᠮᠤᠬᠤ ᠪᠤᠶᠤ ᠡᠷᠬᠢᠭᠦᠯᠭᠡ ᠪᠠᠷ ᠨᠡᠶᠢᠳᠭᠡᠳᠡᠭ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠲᠠᠢ᠃     ᠳᠡᠳᠡ ᠳᠡᠭᠡᠰᠤ ᠶᠢ ᠭᠠᠷ ᠤᠨ ᠠᠯᠠᠭ᠎ᠠ ᠪᠠᠷ ᠢᠶᠠᠨ ᠠᠳᠠᠯᠢ ᠪᠤᠰᠤ ᠭᠡᠯᠪᠡᠷᠢ — ᠵᠡᠭᠦᠨ ᠪᠠᠷᠠᠭᠤᠨ᠂ ᠵᠦᠪ ᠰᠤᠯᠤᠭᠠᠢ᠂ ᠨᠠᠷᠢᠨ ᠪᠦᠳᠦᠭᠦᠨ᠂ ᠦᠨᠳᠦᠷ ᠪᠤᠭᠤᠨᠢ ᠮᠡᠳᠤ ᠪᠠᠷ ᠳᠡᠩ ᠦᠩᠭᠡ ᠪᠤᠶᠤ ᠠᠯᠠᠭᠯᠠᠨ ᠰᠤᠯᠢᠵᠤ ᠳᠠᠮᠤᠳᠠᠭ ᠃     ᠭᠡᠷᠡᠭᠴᠡᠭᠡ ᠪᠠᠨ ᠦᠨᠳᠦᠰᠦᠯᠡᠨ ᠰᠠᠶᠢᠬᠠᠨ ᠪᠦᠭᠡᠳ ᠪᠠᠬᠢ ᠶᠢ ᠪᠤᠳᠤᠯᠬᠢᠯᠠᠵᠤ ᠨᠢᠭᠡᠮᠦᠰᠦᠨ᠂ ᠬᠤᠶᠠᠷᠮᠦᠰᠦᠨ᠂ ᠭᠤᠷᠮᠤᠰᠤᠨ ᠢᠶᠠᠷ ᠮᠠᠯ ᠤᠨ ᠭᠦᠵᠦᠭᠦᠪᠴᠢ᠂ ᠨᠤᠭᠳᠤ ᠴᠦᠷᠭᠡ᠂ ᠭᠡᠷ ᠤᠨ ᠤᠭᠤᠰᠤᠷ᠂ ᠵᠡᠭᠡᠭ ᠪᠦᠰᠡᠯᠡᠭᠦᠷ᠂ ᠮᠤᠳᠤᠨ ᠳᠡᠷᠭᠡᠨ ᠤ ᠳᠠᠷᠤᠭᠤᠯᠭ᠎ᠠ᠂ ᠳᠠᠳᠠᠯᠭ᠎ᠠ᠂ ᠬᠤᠳᠠᠷᠭ᠎ᠠ ᠵᠡᠷᠭᠡ ᠶᠢᠨ ᠭᠡᠭᠡᠵᠤ ᠪᠤᠰᠬᠤ᠂ ᠠᠯᠳᠠᠵᠤ ᠠᠰᠠᠬᠠᠬᠤ ᠵᠦᠢᠯ ᠤᠨ ᠪᠤᠭᠤᠯᠳᠠ ᠪᠠᠬᠢᠯᠡᠯᠳᠡ ᠪᠤᠯᠭᠠᠨ᠂ ᠠᠩᠨᠠᠬᠤ᠂ ᠮᠠᠯᠵᠢᠬᠤ᠂ ᠠᠶᠠᠯᠠᠬᠤ ᠳᠠᠭᠠᠨ ᠠᠰᠢᠭᠯᠠᠳᠠᠭ᠃     ᠳᠡᠭᠡᠰᠤ ᠳᠠᠮᠤᠬᠤ ᠪᠠ ᠮᠤᠰᠬᠢᠬᠤ ᠳᠠᠭᠠᠨ ᠮᠠᠯ ᠤᠨ ᠢᠶᠠᠨ ᠤᠩᠭᠠᠰᠤ᠂ ᠬᠢᠯᠭᠠᠰ᠂ ᠠᠷᠠᠰ ᠰᠢᠷᠢ᠂ ᠰᠢᠷᠪᠤᠰᠤ ᠰᠢᠯᠢ ᠶᠢ ᠠᠰᠢᠭᠯᠠᠳᠠᠭ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠳᠤᠷᠤᠰᠤᠳᠤ ᠤᠷᠭᠤᠮᠠᠯ ᠢ ᠠᠰᠢᠭᠯᠠᠵᠤ ᠡᠪᠳᠠᠢ ᠳᠠᠮᠤᠳᠠᠭ᠃     ᠨᠢᠯᠬ᠎ᠠ ᠮᠠᠯ ᠤᠨ ᠡᠳ᠋ᠯᠡᠭᠡᠨ ᠤ ᠳᠡᠭᠡᠰᠤ ᠶᠢ ᠬᠤᠨᠢ᠂ ᠳᠡᠮᠡᠭᠡᠨ ᠤ ᠤᠩᠭᠠᠰᠤ ᠪᠠᠷ ᠳᠠᠮᠤᠵᠤ᠂ ᠨᠢᠭᠡᠮᠦᠰᠦᠨ ᠪᠤᠶᠤ ᠬᠤᠶᠠᠷᠮᠤᠰᠤᠨ ᠢᠶᠠᠷ ᠬᠢᠳᠡᠭ᠃ ᠵᠢᠱᠢᠶᠡᠯᠡᠪᠡᠯ ᠳᠤᠭᠤᠯ ᠤᠨ ᠭᠦᠵᠦᠭᠦᠪᠴᠢ᠂ ᠰᠠᠭᠠᠯᠳᠠ ᠶᠢᠨ ᠳᠠᠳᠠᠭᠤᠷ᠂ ᠤᠨᠠᠭᠠᠨ ᠤ ᠨᠤᠭᠳᠤ᠂ ᠪᠤᠭᠤᠳᠤ ᠶᠢᠨ ᠨᠤᠭᠳᠤ ᠵᠡᠷᠭᠡ ᠶᠢ ᠵᠦᠭᠡᠯᠡᠨ ᠡᠳ᠋ᠯᠡᠯ ᠢᠶᠠᠷ ᠬᠢᠳᠡᠭ ᠪᠦᠭᠡᠳ ᠪᠠᠰᠠ ᠬᠠᠷ᠎ᠠ ᠵᠢᠰᠦᠮ ᠳᠤᠨᠢ ᠴᠠᠭᠠᠨ᠂ ᠤᠯᠠᠭᠠᠨ ᠵᠢᠰᠦᠮ ᠳᠤᠨᠢ ᠬᠠᠷ᠎ᠠ ᠶᠢ ᠳᠠᠭᠠᠷᠠᠭᠤᠯᠵᠤ᠂ ᠡᠯᠳᠡᠪ ᠦᠩᠭᠡ ᠶᠢᠨ ᠪᠦᠰ ᠤᠨ ᠦᠭᠡᠳᠡᠰᠤ ᠬᠠᠪᠴᠢᠭᠤᠯᠤᠨ ᠡᠩᠭᠦᠷᠡᠶᠢᠯᠡᠳᠡᠭ᠃      ᠬᠤᠨᠢᠨ ᠤ ᠬᠤᠯᠪᠤᠭᠠᠰᠤ᠂ ᠤᠨᠠᠭ᠎ᠠ ᠪᠤᠳᠤᠭ᠎ᠠ ᠶᠢᠨ ᠵᠠᠯ᠎ᠠ᠂ ᠠᠷᠭᠠᠮᠵᠢᠶ᠎ᠠ ᠶᠢ ᠴᠦ ᠭᠡᠮ ᠰᠡᠪ ᠪᠤᠯᠬᠤ ᠶᠢ ᠬᠢᠴᠢᠶᠡᠨ ᠤᠩᠭᠠᠰᠤ ᠬᠢᠯᠭᠠᠰᠤ ᠶᠢᠨ ᠳᠡᠭᠡᠰᠤ ᠪᠤᠶᠤ ᠡᠯᠳᠡᠭᠰᠡᠨ ᠰᠤᠷ ᠢᠶᠠᠷ ᠳᠠᠮᠦᠷ ᠡᠷᠬᠢᠭᠦᠯᠭᠡ ᠲᠠᠢ ᠬᠢᠳᠡᠭ᠃      ᠳᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠡᠳ᠋ᠯᠡᠭᠡᠨ ᠤ ᠳᠡᠭᠡᠰᠤ ᠪᠤᠬᠢ ᠪᠠ ᠤᠷᠭ᠎ᠠ ᠳᠠᠰᠢᠭᠤᠷ ᠲᠤ ᠶᠡᠷᠦ ᠤᠯᠤᠰᠤ ᠳᠤᠷᠤᠰᠤᠨ ᠤ ᠵᠦᠢᠯ ᠤᠨ ᠳᠡᠭᠡᠰᠤ ᠶᠢ ᠭᠡᠷᠡᠭᠯᠡᠳᠡᠭ ᠦᠭᠡᠢ᠃ ᠵᠦᠪᠬᠡᠨ ᠨᠠᠮᠤᠭ ᠳᠠᠷᠢᠶ᠎ᠠ ᠳᠠᠷᠢᠬᠤ ᠳᠤ ᠪᠠᠬᠢ ᠶᠢ ᠪᠤᠳᠤᠵᠤ᠂ ᠪᠤᠭᠤᠯᠠᠭ᠎ᠠ ᠶᠢᠨ ᠳᠡᠭᠡᠰᠤ ᠶᠢ ᠳᠡᠷᠡᠰᠤ ᠳᠤᠷᠤᠰᠤ ᠪᠠᠷ ᠳᠠᠮᠤᠵᠤ ᠵᠢᠳᠭᠦᠯᠭᠡ ᠶᠢᠨ ᠳᠡᠭᠡᠰᠤ ᠪᠤᠯᠭᠠᠳᠠᠭ᠃ ᠳᠡᠯᠪᠡᠭᠡ ᠶᠢ ᠵᠠᠪᠠᠯ ᠤᠩᠭᠠᠰᠤ ᠪᠠᠷ ᠳᠠᠮᠤᠳᠠᠭ᠃ ᠳᠠᠳᠠᠯᠭ᠎ᠠ᠂ ᠳᠠᠷᠤᠭᠤᠯᠭ᠎ᠠ᠂ ᠠᠷᠭᠠᠮᠵᠢᠶ᠎ᠠ ᠶᠢᠨ ᠳᠡᠭᠡᠰᠤ ᠶᠢ ᠬᠠᠷᠢᠨ ᠴᠢᠬᠢᠭ ᠰᠢᠭᠦᠳᠡᠷᠢ ᠳᠤ ᠴᠢᠩᠭᠠᠷᠠᠳᠠᠭ ᠤᠯᠤᠰᠤ ᠳᠤᠷᠤᠰᠤ ᠶᠢᠨ ᠳᠡᠭᠡᠰᠤ ᠶᠢ ᠭᠡᠷᠡᠭᠯᠡᠳᠡᠭ᠃     ᠪᠠᠭᠠᠷᠢᠨᠴᠤᠳ ᠤᠨ ᠭᠡᠷᠡᠭᠯᠡᠭᠡᠨ ᠤ ᠳᠡᠭᠡᠰᠤ ᠶᠢᠨ ᠵᠦᠢᠯ ᠪᠠ ᠳᠡᠭᠡᠰᠤ ᠳᠠᠮᠤᠳᠠᠭ ᠠᠷᠭ᠎ᠠ ᠪᠠᠷ ᠨᠢ ᠢᠯᠭᠠᠪᠠᠯ ᠳᠤᠤᠷᠠᠬᠢ ᠮᠡᠳᠤ     ᠤᠩᠭᠠᠰᠤᠨ ᠳᠡᠭᠡᠰᠤ — ᠡᠶᠢᠮᠦ ᠳᠡᠭᠡᠰᠤ ᠶᠢ ᠬᠤᠨᠢ ᠳᠡᠮᠡᠭᠡᠨ ᠤ ᠤᠩᠭᠠᠰᠤ ᠶᠢ ᠰᠡᠪᠭᠡᠶᠢᠳᠡᠯ᠎ᠡ ᠰᠠᠪᠠᠵᠤ ᠲᠦᠭᠦᠳᠡᠭᠯᠡᠨ ᠳᠠᠮᠤᠳᠠᠭ᠃ ᠭᠡᠭᠦ ᠳᠡᠭᠡᠨ ᠶᠠᠭᠤᠨ ᠤ ᠤᠩᠭᠠᠰ ᠪᠠᠷ ᠳᠠᠮᠤᠭᠰᠠᠨ ᠪᠤᠯ ᠳᠡᠷᠡᠭᠦ ᠨᠡᠷ᠎ᠡ ᠪᠠᠷ ᠨᠢ ᠨᠡᠷᠡᠯᠡᠳᠡᠭ᠃ ᠵᠢᠱᠢᠶᠡᠯᠡᠪᠡᠯ᠄ ᠬᠤᠨᠢᠨ ᠳᠡᠭᠡᠰᠤ᠂ ᠳᠡᠮᠡᠭᠡᠨ ᠳᠡᠭᠡᠰᠤ ᠁ ᠭᠡᠭᠦ ᠮᠡᠳᠤ᠃ ᠤᠩᠭᠠᠰᠤᠨ ᠳᠡᠭᠡᠰᠤ ᠎ ᠪᠠᠷ ᠳᠤᠭᠤᠯ ᠤᠨ ᠭᠦᠵᠦᠭᠦᠪᠴᠢ᠂ ᠬᠤᠨᠢᠨ ᠤ ᠬᠤᠯᠪᠤᠭ᠎ᠠ ᠰᠠᠭᠠᠯᠳᠠ᠂ ᠦᠭᠡᠷ ᠤᠨ ᠳᠦᠷᠦ ᠴᠦᠷᠭᠡ᠂ ᠠᠨᠵᠢᠰᠤᠨ ᠎ ᠤ ᠳᠡᠯᠪᠡᠭᠡ᠂ ᠳᠡᠷᠭᠡᠨ ᠤ ᠬᠤᠳᠤᠷᠭ᠎ᠠ᠂ ᠪᠤᠬᠢ᠂ ᠳᠠᠳᠠᠯᠭ᠎ᠠ ᠬᠢᠳᠡᠭ᠃ ᠡᠮᠡᠭᠡᠯ ᠤᠨ ᠤᠯᠤᠩ ᠢ ᠪᠠᠷᠠᠭᠤᠨ ᠰᠤᠯᠤᠭᠠᠢ ᠠᠯᠠᠭᠯᠠᠨ ᠳᠠᠮᠤᠵᠤ ᠤᠶᠤᠭᠠᠳ ᠬᠠᠪᠳᠠᠭᠠᠢ ᠬᠢᠳᠡᠭ᠃    ᠰᠤᠷ ᠳᠡᠭᠡᠰᠤ — ᠪᠠᠰᠠ ᠰᠤᠷᠯᠠᠭ ᠭᠡᠳᠡᠭ᠃ ᠡᠶᠢᠮᠦ ᠳᠡᠭᠡᠰᠤ ᠶᠢ ᠦᠭᠡᠷ ᠤᠨ ᠡᠯᠳᠡᠭᠰᠡᠨ ᠰᠤᠷ᠂ ᠳᠡᠮᠡᠭᠡ ᠎ ᠶᠢᠨ ᠴᠤᠯᠭᠤᠢ ᠰᠢᠷᠢ ᠶᠢ ᠭᠡᠷᠡᠭᠴᠡᠭᠡ ᠶᠢ ᠱᠠᠭᠠᠷᠳᠠᠯᠭ᠎ᠠ ᠪᠠᠷ ᠳᠡᠩᠴᠡᠭᠦᠨ ᠵᠦᠰᠦᠵᠤ ᠳᠤᠰᠤᠯᠠᠭᠠᠳ ᠳ᠋ᠠᠩ ᠰᠤᠷ ᠢ ᠢᠮᠠᠭᠠᠨ ᠡᠪᠡᠷ ᠤᠨ ᠨᠦᠭᠡᠳᠤ ᠭᠡᠪ ᠲᠤ ᠭᠡᠪᠰᠢᠭᠦᠯᠦᠨ ᠰᠠᠶᠢᠨ ᠢ ᠨᠢ ᠮᠤᠷᠢᠨ ᠤ ᠡᠳ᠋ᠯᠡᠯ ᠳᠤ ᠭᠡᠷᠡᠭᠯᠡᠵᠤ᠂ ᠨᠢᠮᠭᠡᠨ ᠢ ᠎ ᠨᠢ ᠬᠤᠶᠠᠷᠮᠤᠰᠤᠨ ᠪᠤᠶᠤ ᠭᠤᠷᠮᠤᠰᠤᠨ ᠮᠤᠰᠬᠢᠵᠤ᠂ ᠴᠢᠳᠦᠷ᠂ ᠳᠠᠳᠠᠯᠭ᠎ᠠ᠂ ᠳᠠᠷᠤᠭᠤᠯᠭ᠎ᠠ ᠵᠡᠷᠭᠡ ᠳᠤ ᠭᠡᠷᠡᠭᠯᠡᠳᠡᠭ᠃ ᠳᠡᠮᠡᠭᠡᠨ ᠰᠢᠷᠢ ᠶᠢ ᠭᠤᠤᠯᠳᠠᠭᠤ ᠴᠤᠯᠭᠤᠢ ᠪᠠᠷ ᠨᠢ ᠵᠦᠰᠦᠵᠤ᠂ ᠬᠠᠨ᠎ᠠ ᠶᠢᠨ ᠦᠳᠡᠭᠡᠷᠢ᠂ ᠳᠠᠳᠠᠯᠭ᠎ᠠ ᠰᠤᠷᠯᠠᠭ ᠬᠢᠳᠡᠭ᠃ ᠰᠤᠷ ᠤᠨ ᠵᠦᠢᠯ ᠤᠨ ᠡᠳ᠋ᠯᠡᠭᠡᠨ ᠤ ᠳᠡᠭᠡᠰᠤ ᠪᠠᠷᠢᠶ᠎ᠠ ᠳᠤ ᠮᠤᠰᠬᠢᠮᠠᠯ᠂ ᠰᠦᠯᠵᠢᠮᠡᠯ᠂ ᠭᠦᠷᠦᠮᠡᠯ ᠭᠡᠵᠤ ᠭᠡᠳᠦᠨ ᠵᠦᠢᠯ ᠪᠠᠶᠢᠳᠠᠭ᠃      ᠬᠢᠯᠭᠠᠰᠤᠨ ᠳᠡᠭᠡᠰᠤ — ᠡᠶᠢᠮᠦ ᠳᠡᠭᠡᠰᠤ ᠶᠢ ᠠᠳᠤᠭᠤᠨ ᠤ ᠳᠡᠯ ᠰᠡᠭᠦᠯ ᠢᠶᠠᠷ ᠳᠠᠮᠤᠳᠠᠭ᠃ ᠳᠡᠯ ᠰᠡᠭᠦᠯ ᠢ ᠰᠠᠶᠢᠬᠠᠨ ᠤᠷᠠᠵᠤ᠂ ᠲᠦᠭᠦᠳᠡᠭᠯᠡᠭᠡᠳ ᠭᠡᠷᠡᠭᠴᠡᠭᠡ ᠳᠡᠭᠡᠨ ᠳᠤᠬᠢᠷᠠᠭᠤᠯᠤᠨ ᠤᠯᠠᠨ ᠵᠦᠢᠯ ᠤᠨ ᠳᠡᠭᠡᠰᠤ ᠤᠭᠤᠰᠤᠷ ᠳᠠᠮᠤᠳᠠᠭ᠃ ᠰᠠᠶᠢᠬᠠᠨ ᠳᠠᠮᠤᠭᠰᠠᠨ ᠬᠢᠯᠭᠠᠰᠤᠨ ᠳᠡᠭᠡᠰᠤ ᠪᠠᠷ ᠳᠡᠭᠡᠪᠦᠷ ᠳᠤᠭᠤᠷᠭ᠎ᠠ ᠶᠢᠨ ᠢᠰᠡᠭᠡᠢ ᠳᠤ ᠭᠦᠪᠡᠭᠡ ᠪᠠᠷᠢᠳᠠᠭ ᠪᠦᠭᠡᠳ ᠪᠤᠷᠤᠭᠤ ᠤᠰᠤᠨ ᠳᠤ ᠵᠠᠷᠤᠬᠤ ᠳᠤ ᠤᠯᠠᠮ ᠴᠢᠩᠭᠠᠷᠠᠳᠠᠭ᠃ ᠬᠢᠯᠭᠠᠰᠤᠨ ᠳᠡᠭᠡᠰᠤ ᠪᠠᠷ ᠮᠤᠩᠭᠤᠯ ᠭᠡᠷ ᠤᠨ ᠤᠭᠤᠰᠤᠷ᠂ ᠪᠦᠰᠡᠯᠡᠭᠦᠷ᠂ ᠳᠡᠷᠭᠡᠨ ᠤ ᠳᠠᠳᠠᠯᠭ᠎ᠠ ᠬᠢᠳᠡᠭ᠃     ᠤᠷᠭᠤᠮᠠᠯ ᠤᠨ ᠳᠡᠭᠡᠰᠤ — ᠤᠷᠤᠨ ᠨᠤᠳᠤᠭ ᠲᠠᠭᠠᠨ ᠤᠷᠭᠤᠳᠠᠭ ᠳᠤᠷᠤᠰᠤᠯᠢᠭ ᠤᠷᠭᠤᠮᠠᠯ᠂ ᠳᠠᠷᠤᠢ ᠵᠡᠷᠯᠢᠭ ᠤᠯᠤᠰᠤ᠂ ᠳᠠᠷᠠᠰᠤ᠂ ᠠᠯᠳᠠᠭᠠᠨ᠎ᠠ ᠶᠢᠨ ᠦᠨᠳᠦᠰᠤ᠂ ᠰᠤᠯᠢ᠂ ᠦᠯᠦᠨ ᠴᠠᠭᠠᠨ ᠮᠡᠳᠤ ᠶᠢ ᠦᠪᠡᠷᠳᠡᠭᠡᠨ ᠪᠤᠯᠪᠠᠰᠤᠷᠠᠭᠤᠯᠤᠨ ᠳᠡᠭᠡᠰᠤ ᠪᠤᠬᠢ ᠳᠠᠮᠤᠵᠤ ᠠᠰᠢᠭᠯᠠᠳᠠᠭ ᠪᠢᠯᠡ᠃ ᠤᠯᠤᠰᠤᠨ ᠳᠡᠭᠡᠰᠤ ᠶᠢ ᠪᠤᠯ ᠭᠡᠭᠡᠷ᠎ᠡ ᠶᠢᠨ ᠤᠯᠤᠰᠤ ᠪᠤᠯᠪᠠᠰᠤᠷᠠᠮᠠᠭᠴᠠ ᠬᠠᠳᠤᠵᠤ ᠠᠪᠤᠭᠠᠳ᠂ ᠦᠷ᠎ᠡ ᠪᠠᠷ ᠨᠢ ᠳᠤᠰᠤ ᠭᠠᠷᠭᠠᠨ᠂ ᠳᠡᠷᠭᠡ ᠪᠠᠨ ᠳᠤᠰᠤᠯᠠᠵᠤ᠂ ᠡᠰᠢ ᠶᠢ ᠨᠢ ᠳᠤᠯᠠᠭᠠᠨ ᠴᠠᠭ ᠲᠤ ᠭᠤᠤᠯ ᠨᠠᠭᠤᠷ ᠲᠤ ᠪᠤᠯᠠᠵᠤ ᠪᠤᠯᠪᠠᠰᠤᠷᠠᠭᠤᠯᠤᠭᠠᠳ ᠬᠠᠯᠢᠰᠤ ᠶᠢ ᠨᠢ ᠰᠠᠯᠪᠠᠷᠠᠭᠤᠯᠤᠨ ᠱᠠᠭᠠᠯᠵᠤ ᠳᠡᠭᠡᠰᠤ ᠳᠦᠷᠦ ᠳᠠᠮᠤᠳᠠᠭ᠃ ᠳᠡᠷᠡᠰᠦᠨ ᠳᠡᠭᠡᠰᠤ ᠪᠤᠯ ᠨᠠᠮᠤᠷ ᠬᠠᠪᠤᠷ ᠤᠨ ᠳᠤᠬᠢᠳᠠᠢ ᠴᠠᠭ ᠲᠤ ᠳᠡᠷᠡᠰᠤ ᠶᠢ ᠬᠠᠳᠤᠵᠤ ᠠᠪᠤᠭᠠᠳ ᠳᠠᠮᠤᠳᠠᠭ᠃ ᠪᠠᠭᠠᠷᠢᠨ ᠳᠤ ᠳᠡᠷᠡᠰᠤ ᠰᠠᠶᠢᠨ ᠤᠷᠭᠤᠳᠠᠭ᠃ ᠨᠡᠩ ᠬᠤᠩᠭᠤᠷ ᠤᠨ ᠦᠬᠢᠨ ᠴᠠᠭᠠᠨ ᠳᠠᠷᠠᠰᠤ ᠭᠡᠪᠡᠯ ᠬᠤᠰᠢᠭᠤ ᠴᠢᠭᠤᠯᠭᠠᠨ ᠳᠤ ᠠᠯᠳᠠᠷ ᠲᠠᠢ᠃ ᠳᠡᠮᠡᠭᠡ ᠤᠷᠤᠭᠠᠳ ᠪᠠᠷ᠎ᠠ ᠦᠭᠡᠢ ᠦᠨᠳᠦᠷ ᠤᠷᠭᠤᠳᠠᠭ᠃ ᠳᠠᠷᠠᠰᠤ ᠪᠠᠨ ᠮᠤᠳᠤ ᠰᠢᠳᠠᠮ ᠢᠶᠠᠷ ᠴᠢᠯᠠᠭᠤᠨ ᠳᠡᠭᠡᠷ᠎ᠡ ᠵᠠᠨᠴᠢᠵᠤ ᠪᠡᠯᠪᠡᠯᠤᠭᠠᠳ ᠤᠰᠤᠨ ᠳᠤ ᠳᠡᠪᠳᠦᠭᠡᠵᠤ᠂ ᠠᠯᠠᠭ᠎ᠠ ᠪᠠᠷ ᠢᠶᠠᠨ ᠳᠡᠭᠡᠰᠤ ᠳᠠᠮᠤᠳᠠᠭ᠃ ᠳᠠᠷᠠᠰᠤᠨ ᠳᠡᠭᠡᠰᠤ ᠨᠢ ᠴᠢᠬᠢᠭ ᠨᠤᠶᠢᠳᠠᠨ ᠳᠤ ᠨᠡᠩ ᠪᠦᠭᠡ ᠪᠠᠶᠢᠳᠠᠭ᠃ ᠳᠠᠷᠠᠰᠤᠨ ᠳᠡᠭᠡᠰᠤ ᠪᠠᠷ ᠨᠠᠮᠤᠭ ᠳᠠᠷᠢᠶ᠎ᠠ ᠶᠢᠨ ᠠᠨᠵᠢᠰᠤᠨ ᠳᠡᠭᠡᠰᠤ᠂ ᠵᠤᠨ ᠨᠠᠮᠤᠷ ᠤᠨ ᠠᠶᠠᠨ ᠳᠡᠷᠭᠡᠨ ᠤ ᠳᠠᠳᠠᠯᠭ᠎ᠠ ᠬᠢᠳᠡᠭ᠃ ᠡᠪᠡᠰᠤ ᠮᠤᠳᠤ ᠳᠡᠭᠡᠭᠡᠭᠦ ᠳᠤ ᠭᠤᠤᠯᠳᠠᠭᠤ ᠳᠠᠷᠠᠰᠤᠨ ᠳᠠᠳᠠᠯᠭ᠎ᠠ ᠎ ᠪᠠᠷ ᠳᠠᠷᠤᠭᠤᠯᠭ᠎ᠠ ᠪᠤᠯᠭᠠᠳᠠᠭ᠃ ᠡᠪᠡᠰᠦᠨ ᠳᠡᠭᠡᠰᠤ ᠶᠢ ᠪᠤᠯ ᠭᠤᠤᠯ ᠤᠨ ᠳᠤᠬᠤᠢ ᠳᠤ ᠤᠷᠭᠤᠳᠠᠭ ᠰᠤᠯᠢ᠂ ᠪᠤᠷᠤ ᠵᠤ ᠭᠠᠵᠠᠷ ᠭᠠᠷᠳᠠᠭ ᠦᠯᠦᠨ ᠴᠠᠭᠠᠨ ︵ᠦᠨᠳᠦᠰᠦ︶᠎ ᠢ ᠨᠤᠭᠤᠭᠠᠨ ᠳᠡᠭᠡᠷ᠎ᠡ ᠨᠢ ᠠᠪᠴᠤ᠂ ᠵᠠᠨᠴᠢᠬᠤ ᠪᠤᠶᠤ ᠢᠩᠳᠡᠵᠤ ᠤᠩᠭᠠᠰᠤᠷᠠᠭᠤᠯᠤᠭᠠᠳ ᠳᠡᠭᠡᠰᠤ ᠳᠠᠮᠤᠵᠤ ᠮᠤᠳᠤᠨ ᠳᠡᠷᠭᠡᠨ ᠳᠤ ᠭᠡᠷᠡᠭᠯᠡᠳᠡᠭ᠃ ᠠᠯᠳᠠᠭᠠᠨ᠎ᠠ ᠶᠢᠨ ᠳᠤᠷᠤᠰᠤᠨ ᠳᠡᠭᠡᠰᠤ ᠪᠤᠯ ᠮᠠᠩᠬᠠᠯᠢᠭ ᠭᠠᠵᠠᠷ ᠤᠷᠭᠤᠳᠠᠭ ᠠᠯᠳᠠᠭᠠᠨ᠎ᠠ ᠶᠢᠨ ᠦᠨᠳᠦᠰᠦᠨ ᠳᠤᠷᠤᠰᠤ ᠶᠢ ᠠᠪᠴᠤ ᠦᠭᠦᠰᠢᠷᠡᠭᠦᠯᠦᠭᠡᠳ ᠳᠠᠮᠤᠵᠤ ᠪᠤᠯᠪᠠᠰᠤᠷᠠᠭᠤᠯᠳᠠᠭ᠃ ᠤᠷᠭᠤᠮᠠᠯ ᠤᠨ ᠳᠡᠭᠡᠰᠤ ᠪᠠᠷ ᠠᠷᠭᠠᠮᠵᠢᠶ᠎ᠠ ᠳᠠᠳᠠᠯᠭ᠎ᠠ ᠬᠢᠳᠡᠭ ᠎ ᠠᠴᠠ ᠪᠢᠰᠢ ᠳᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠤᠶᠠᠭ᠎ᠠ ᠪᠠᠷᠢᠶ᠎ᠠ᠂ ᠭᠡᠷ ᠤᠨ ᠭᠡᠷᠡᠭᠯᠡᠭᠡ ᠶᠢᠨ ᠪᠦᠰᠡᠯᠡᠭᠦᠷ ᠤᠭᠤᠰᠤᠷ᠂ ᠡᠮᠡᠭᠡᠯ᠂ ᠳᠠᠰᠢᠭᠤᠷ᠂ ᠤᠷᠭ᠎ᠠ ᠶᠢᠨ ᠡᠳ᠋ᠯᠡᠯ ᠵᠡᠷᠭᠡ ᠳᠤ ᠤᠭᠳᠤ ᠭᠡᠷᠡᠭᠯᠡᠳᠡᠭ ᠦᠭᠡᠢ᠃ ᠭᠡᠷᠪᠡ ᠤᠯᠤᠰᠤ ᠡᠪᠡᠰᠦᠨ ᠳᠡᠭᠡᠰᠤ ᠶᠢ ᠡᠮᠡᠭᠡᠯ ᠤᠨ ᠡᠳ᠋ᠯᠡᠯ ᠳᠤ ᠤᠷᠤᠭᠤᠯᠪᠠᠯ ︽ᠤᠯᠤᠰᠤᠨ ᠳᠡᠭᠡᠰᠦᠨ ᠤᠭᠤᠰᠤᠷ ᠲᠠᠢ᠂ ᠡᠪᠡᠰᠦᠨ ᠳᠡᠭᠡᠰᠦᠨ ᠦᠵᠦᠭᠦᠷ ᠲᠠᠢ︾᠂ ︽ᠮᠤᠩᠭᠤᠯ ᠢᠶᠠᠨ ᠮᠤᠳᠤᠨ ᠳᠤ ᠡᠯᠭᠦᠭᠰᠡᠳ︾ ᠭᠡᠵᠤ ᠰᠤᠨᠵᠢᠳᠠᠭ᠃       ᠳᠡᠭᠡᠰᠤ ᠭᠡᠳᠦᠶᠢᠪᠡᠷ ᠳᠤᠰᠠᠯᠠᠮᠵᠢ ᠶᠢᠨ ᠭᠡᠷᠡᠭᠰᠡᠯ ᠪᠤᠯᠪᠠᠴᠤ ᠳᠡᠭᠦᠨ ᠢ ᠳᠠᠮᠤᠬᠤ᠂ ᠨᠡᠶᠢᠳᠭᠡᠭᠦ᠂ ᠰᠦᠯᠵᠢᠭᠦ᠂ ᠭᠦᠷᠦᠭᠦ ᠵᠡᠷᠭᠡ ᠳᠤ ᠳᠤᠬᠠᠶᠢᠯᠠᠭᠰᠠᠨ ᠮᠡᠷᠭᠡᠰᠢᠯ ᠪᠠᠶᠢᠳᠠᠭ᠃ ᠶᠡᠷᠦᠩᠭᠡᠢ ᠳᠡᠭᠡᠨ ᠤᠩᠭᠠᠰᠤ ᠬᠢᠯᠭᠠᠰᠤᠨ ᠳᠡᠭᠡᠰᠤ ᠶᠢ ᠪᠦᠰᠡᠭᠦᠶᠢᠴᠤᠳ ᠭᠤᠤᠯᠳᠠᠭᠤ ᠳᠠᠮᠤᠵᠤ᠂ ᠠᠷᠠᠰᠤ ᠰᠢᠷᠪᠤᠰᠤ᠂ ᠡᠪᠡᠰᠤ ᠤᠷᠭᠤᠮᠠᠯ ᠤᠨ ᠳᠡᠭᠡᠰᠤ ᠶᠢ ᠪᠦᠰᠡᠳᠠᠶᠢᠴᠤᠳ ᠦᠢᠯᠡᠳᠴᠤ ᠪᠠᠶᠢᠳᠠᠭ᠃      ᠬᠠᠮᠤᠭ ᠳᠦᠷᠦᠭᠦᠨ ᠳᠤ ᠳᠡᠭᠡᠰᠤ ᠳᠠᠮᠤᠬᠤ ᠮᠠᠲ᠋ᠧᠷᠢᠶᠠᠯ ᠢᠶᠠᠨ ᠰᠠᠶᠢᠬᠠᠨ ᠡᠳ᠋ ᠪᠤᠯᠭᠠᠬᠤ ᠭᠡᠷᠡᠭᠳᠠᠢ᠃ ᠵᠢᠱᠢᠶᠡᠯᠡᠪᠡᠯ  ᠄ ᠤᠩᠭᠠᠰᠤ ᠬᠢᠯᠭᠠᠰᠤ ᠶᠢ ᠪᠤᠷᠴᠠ ᠦᠭᠡᠢ ᠰᠠᠶᠢᠬᠠᠨ ᠰᠠᠪᠠᠵᠤ ᠤᠷᠠᠬᠤ᠂ ᠠᠷᠠᠰᠤ ᠰᠢᠷᠢ ᠶᠢ ᠡᠯᠳᠡᠭᠦ᠂ ᠰᠤᠷ ᠤᠨ ᠵᠤᠵᠠᠭᠠᠨ ᠨᠢᠮᠭᠡᠨ ᠢ ᠳᠡᠩᠴᠡᠭᠦᠯᠭᠦ᠂ ᠤᠯᠤᠰᠤ ᠶᠢ ᠢᠯᠵᠠᠷᠠᠯ ᠦᠭᠡᠢ ᠳᠠᠪᠳᠦᠭᠡᠵᠤ ᠡᠭᠡᠳᠡᠷᠡᠭᠡᠨ ᠦᠭᠡᠢ ᠱᠠᠭᠠᠯᠬᠤ᠂ ᠳᠠᠷᠠᠰᠤ ᠡᠪᠡᠰᠤ ᠶᠢ ᠠᠯᠠᠭ ᠦᠭᠡᠢ ᠰᠠᠶᠢᠬᠠᠨ ᠵᠦᠭᠡᠯᠡᠷᠡᠭᠦᠯᠭᠦ ᠬᠡᠷᠡᠭᠳᠠᠢ᠃ ᠭᠡᠷᠪᠡ ᠡᠳᠡᠭᠡᠷ ᠢ ᠬᠢᠨᠠᠮᠠᠭᠠᠢ ᠰᠠᠶᠢᠬᠠᠨ ᠳᠡᠩᠴᠡᠭᠦᠯᠭᠦ ᠦᠭᠡᠢ ᠪᠤᠯ ᠭᠡᠷᠡᠭᠯᠡᠭᠦ ᠳᠤ ᠭᠡᠪᠡᠷᠡᠭ ᠪᠤᠯᠴᠢᠬᠠᠳᠠᠭ ᠪᠦᠭᠡᠳ ᠦᠵᠡᠭᠦ ᠳᠤ ᠴᠦ ᠮᠠᠭᠤᠬᠠᠢ᠃ ᠵᠢᠱᠢᠶᠡᠯᠡᠪᠡᠯ᠄ ᠬᠤᠶᠠᠷ ᠡᠷᠴᠢᠮ ᠳᠡᠩᠴᠡᠭᠦᠷᠢ ᠦᠭᠡᠢ᠂ ᠳᠦᠭᠦᠳᠡᠭ ᠨᠢ ᠪᠦᠳᠦᠭᠦᠨ ᠨᠠᠷᠢᠨ ᠲᠠᠢ᠂ ᠰᠤᠷ ᠵᠦᠰᠦᠮ ᠎ ᠨᠢ ᠵᠤᠵᠠᠭᠠᠨ ᠨᠢᠮᠭᠡᠨ ᠪᠤᠯ ︽ᠮᠤᠭᠠᠢ ᠮᠡᠯᠡᠭᠡᠢ ᠵᠠᠯᠬᠢᠭᠰᠠᠨ ᠳᠡᠭᠡᠰᠤ︾ ᠭᠡᠵᠤ ᠳᠤᠭᠤᠬᠢᠯᠠᠳᠠᠭ᠃ ᠢᠯᠠᠩᠭᠤᠶ᠎ᠠ ᠭᠡᠳᠦᠨ ᠳᠦᠷᠦᠯ ᠤᠨ ᠮᠠᠯ ᠤᠨ ᠤᠩᠭᠠᠰᠤ ᠨᠤᠤᠰᠤ᠂ ᠬᠢᠯᠭᠠᠰᠤ ᠵᠤᠭᠳᠤᠷ ᠢ ᠬᠤᠯᠢᠵᠤ ᠳᠠᠮᠤᠬᠤ ᠳᠡᠭᠡᠰᠦᠨ ᠤ ᠳᠡᠩᠴᠡᠭᠦᠨ ᠪᠠ ᠠᠯᠠᠭᠯᠠᠯ ᠢ ᠳᠤᠩ ᠠᠩᠬᠠᠷᠳᠠᠭ᠃       ᠳᠡᠭᠡᠰᠦᠨ ᠳᠤ ᠪᠦᠷ ᠪᠦᠳᠦᠭᠦᠨ ᠨᠠᠷᠢᠨ᠂ ᠦᠨᠳᠦᠷ ᠪᠤᠭᠤᠨᠢ ᠶᠢᠨ ᠶᠤᠰᠤ ᠭᠤᠷᠢᠮ᠂ ᠭᠡᠮᠵᠢᠶ᠎ᠡ ᠳᠤᠮᠵᠢᠶ᠎ᠠ ᠎ ᠲᠠᠢ᠃ ᠳᠡᠭᠡᠰᠤ ᠬᠠᠭᠤᠴᠢᠷᠠᠭᠠᠳ ᠲᠠᠰᠤᠷᠠᠪᠠᠯ ᠵᠠᠩᠬᠢᠳᠴᠤ ᠵᠠᠯᠭᠠᠳᠠᠭ ᠦᠭᠡᠢ᠃ ᠬᠤᠶᠠᠷ ᠦᠵᠦᠭᠦᠷ ᠢ ᠰᠦᠭᠦᠮ ᠬᠢᠷᠢ ᠵᠠᠳᠠᠯᠵᠤ ᠬᠤᠩᠬᠤᠴᠢᠯᠠᠨ ᠰᠦᠯᠵᠢᠵᠤ ᠵᠠᠯᠭᠠᠳᠠᠭ᠃ ᠡᠨᠡ ᠨᠢ ᠳᠤᠮᠳᠠ ᠪᠠᠨ ᠪᠠᠮᠪᠠᠶᠢᠳᠠᠭ ᠦᠭᠡᠢ ᠪᠦᠭᠡᠳ ᠦᠵᠡᠭᠦ ᠳᠤ ᠡᠪᠳᠡᠢ᠂ ᠳᠡᠭᠦᠪᠡᠷ ᠢᠶᠠᠨ ᠳᠠᠬᠢᠵᠤ ᠲᠠᠰᠤᠷᠠᠳᠠᠭ ᠦᠭᠡᠢ ᠶᠤᠮ᠃
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠤ ᠲᠡᠦᠬᠡ ᠰᠤᠶᠤᠯ