ᠳᠤᠭᠤᠭ᠎ᠠ ᠨᠡᠷᠡᠭᠦ ᠳᠤᠬᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/19
     ᠪᠠᠭᠠᠷᠢᠨᠴᠤᠳ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ᠨᠡᠷᠡᠭᠦ ᠶᠢ ᠳᠤᠭᠤᠭ᠎ᠠ ᠨᠡᠷᠡᠭᠦ ᠭᠡᠳᠡᠭ᠃ ᠳᠡᠳᠡ ᠭᠡᠭᠦᠦ ᠪᠠᠷᠢᠵᠤ ᠴᠡᠭᠡ ᠭᠠᠷᠭᠠᠬᠤ ᠵᠠᠩᠰᠢᠯ ᠢᠶᠠᠨ ᠪᠠᠷᠤᠭ ᠴᠢᠩ ᠭᠦᠷᠦᠨ ᠤ ᠰᠡᠭᠦᠯᠴᠢ ᠦᠶ᠎ᠡ ᠪᠠᠷ ᠰᠠᠭᠤᠷᠢᠰᠢᠬᠤ ᠪᠤᠯᠤᠭᠰᠠᠨ ᠠᠴᠠ ᠨᠠᠰᠢ ᠵᠤᠭᠰᠤᠭᠰᠠᠨ ᠪᠤᠯᠪᠠᠴᠤ ᠦᠨᠢᠶᠡᠨ ᠰᠦ ᠪᠠᠷ ᠳᠤᠭᠤᠭ᠎ᠠ ᠨᠡᠷᠡᠭᠦ ᠪᠠᠨ ᠳᠠᠰᠤᠭ ᠪᠤᠰᠠᠭ ᠵᠠᠯᠭᠠᠮᠵᠢᠯᠠᠭᠰᠠᠭᠠᠷ ᠢᠷᠡᠵᠠᠢ᠃      ᠪᠠᠭᠠᠷᠢᠨᠴᠤᠳ ᠤᠨ ᠳᠤᠭᠤᠭ᠎ᠠ ᠨᠡᠷᠡᠭᠦ ᠨᠢ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠲᠠᠢ᠃ ᠳᠡᠳᠡᠭᠡᠷ ᠤᠨᠴᠠᠯᠢᠭ ᠢ ᠪᠠᠭᠴᠠᠯᠠᠪᠠᠯ᠄     ᠨᠢᠭᠡ ᠳᠤ᠂ ᠠᠶᠢᠷᠠᠭ ᠪᠦᠯᠢᠵᠤ ᠳᠤᠰᠤ ᠢᠯᠭᠠᠷᠠᠭᠤᠯᠤᠨ ᠠᠭᠠᠷᠴᠠᠨ ᠬᠤᠷᠤᠳ ᠬᠢᠳᠡᠭ ᠦᠭᠡᠢ᠂ ᠳᠦᠭᠦᠭᠡᠢ ᠰᠦ ᠶᠢ ᠴᠢᠯᠠᠭᠤ ᠪᠤᠶᠤ ᠸᠠᠭᠠᠷ ᠤᠨ ᠰᠠᠪᠠ ᠳᠤ ᠳᠠᠯᠪᠢᠵᠤ ᠡᠭᠡᠳᠡᠭᠦᠯᠦᠭᠡᠳ ᠦᠷᠦᠮ᠎ᠡ ︵ᠵᠦᠭᠡᠭᠡᠢ︶᠎ ᠶᠢ ᠨᠢ ᠬᠠᠯᠮᠠᠵᠤ ᠠᠪᠤᠭᠰᠠᠨ ᠤ ᠳᠠᠷᠠᠭ᠎ᠠ ᠵᠦᠭᠡᠯᠡᠨ ᠭᠠᠯ ᠳᠡᠭᠡᠷ᠎ᠡ ᠡᠭᠡᠳᠡᠭᠰᠡᠨ ᠰᠦ ᠶᠢ ᠭᠦᠰᠢᠭᠡᠵᠤ ᠬᠤᠷᠤᠳ ᠬᠢᠳᠡᠭ᠃ ᠬᠤᠷᠤᠳ ᠬᠢᠭᠰᠡᠨ ᠤ ᠳᠠᠷᠠᠭ᠎ᠠ ᠦᠯᠡᠳᠡᠭᠦ ᠰᠢᠷ᠎ᠠ ᠤᠰᠤ ᠶᠢ ᠳᠠᠪᠤᠤ ᠤᠭᠤᠳᠠᠨ ᠳᠤ ᠱᠦᠭᠦᠵᠤ ᠦᠳᠭᠡᠨ ᠢᠶᠠᠷ ᠨᠢ ᠡᠭᠡᠵᠡᠭᠡᠢ᠂ ᠰᠢᠩᠭᠡᠨ ᠢᠶᠠᠷ ᠨᠢ ᠠᠶᠢᠷᠠᠭᠯᠠᠨ᠂ ᠠᠶᠢᠷᠠᠭ ᠢᠶᠠᠷ ᠨᠢ ᠳᠤᠭᠤᠭ᠎ᠠ ᠨᠡᠷᠡᠵᠤ ᠠᠭᠤᠷᠰᠢᠯ ᠢᠶᠠᠷ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ︵ᠮᠠᠯ ᠤᠨ ᠠᠷᠢᠬᠢ ᠴᠦ ᠭᠡᠳᠡᠭ︶ ᠭᠠᠷᠭᠠᠳᠠᠭ᠃ ᠦᠳᠭᠡᠨ ᠢ ᠨᠢ ᠱᠦᠭᠦᠮᠡᠯ ᠢᠶᠠᠷ ᠱᠦᠭᠦᠵᠤ ᠠᠭᠠᠷᠠᠤᠤᠯ ᠪᠠᠵᠢᠵᠤ᠂ ᠰᠢᠩᠭᠡᠨ ᠢ ᠨᠢ ᠭᠠᠩ ᠰᠠᠪᠠ ᠳᠤ ᠰᠠᠪᠠᠭᠠᠯᠠᠭᠠᠳ ᠴᠠᠭ᠎ᠠ ᠪᠤᠯᠭᠠᠳᠠᠭ᠃     ᠬᠤᠶᠠᠷ ᠲᠤ᠂ ᠳᠤᠭᠤᠭ᠎ᠠ ᠨᠡᠷᠡᠭᠦ ᠡᠷᠳᠡᠮ ᠮᠡᠷᠭᠡᠰᠢᠯ ᠢ ᠡᠭᠡᠴᠤᠤᠯ ᠡᠭᠡᠴᠢᠮᠡᠳ ᠤᠨ ᠢᠶᠠᠨ ᠰᠤᠷᠭᠠᠯ ᠢᠶᠠᠷ ᠭᠡᠤᠭᠡᠳ ᠳᠡᠭᠦᠨᠠᠷ ᠨᠢ ᠴᠢᠷᠮᠠᠶᠢᠨ ᠡᠵᠡᠮᠰᠢᠳᠡᠭ ᠪᠤᠯᠬᠤᠷ ᠪᠦᠰᠡᠭᠦᠶᠢᠴᠤᠳ ᠭᠡᠤᠭᠡᠨᠴᠤᠳ ᠳᠤᠭᠤᠭ᠎ᠠ ᠨᠡᠷᠡᠭᠦ ᠳᠤ ᠭᠠᠷᠮᠠᠭᠠᠢ ᠶᠤᠮ᠃ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ᠨᠡᠷᠡᠭᠦ ᠪᠠᠭᠠᠵᠢ ᠭᠡᠷᠡᠭᠯᠡᠭᠦᠷ ᠨᠢ ᠳᠤᠩ ᠳᠦᠭᠦᠮ ᠶᠤᠮ᠃ ᠰᠢᠪᠠᠷ ᠪᠤᠶᠤ ᠳᠡᠮᠦᠷ ᠵᠤᠤᠬ᠎ᠠ ᠳᠤᠯᠭ᠎ᠠ ᠳᠤ ᠠᠷᠭᠠᠯ ᠬᠤᠷᠭᠤᠯ ᠪᠤᠶᠤ ᠳᠦᠯᠡᠭᠡ ᠳᠦᠯᠡᠵᠤ᠂ ᠳᠤᠮᠤ ᠰᠢᠷᠡᠮᠦᠨ ᠳᠤᠭᠤᠭ᠎ᠠ ︵ᠪᠤᠳᠠᠭ᠎ᠠ ᠬᠠᠭᠤᠷᠳᠠᠭ ᠳᠤᠭᠤᠭ᠎ᠠ᠂ ᠳᠠᠪᠤ ᠶᠢᠨ ᠳᠤᠭᠤᠭ᠎ᠠ᠂ ᠭᠦᠷᠦᠩᠭᠡ ᠶᠢᠨ ᠳᠤᠭᠤᠭ᠎ᠠ᠂ ᠬᠤᠨᠢᠨ ᠳᠤᠭᠤᠭ᠎ᠠ ᠴᠦ ᠭᠡᠳᠡᠭ︶᠎ ᠳᠤ ᠠᠶᠢᠷᠠᠭ ᠢᠶᠠᠨ ᠳᠡᠭᠡᠷ᠎ᠡ ᠳᠤᠮᠳᠠᠭᠤᠷ ᠬᠢᠵᠤ ᠳᠤᠭᠤᠭᠠᠨ ᠳᠡᠭᠡᠷ᠎ᠡ ᠪᠠᠨ ᠠᠮᠠᠰᠠᠷ ᠲᠤᠨᠢ ᠵᠤᠬᠢᠴᠠᠭᠰᠠᠨ ᠪᠦᠷᠭᠡᠷ ᠤᠭᠰᠠᠷᠠᠨ᠎ᠠ᠃ ᠪᠦᠷᠭᠡᠷ ᠨᠢ ᠭᠤᠷᠪᠠᠨ ᠳᠦᠭᠡ ᠰᠢᠬᠠᠮ ᠦᠨᠳᠦᠷ ᠭᠦᠨᠳᠡᠢ ᠮᠤᠳᠤ ᠪᠤᠶᠤ ᠰᠢᠨᠠ ᠰᠢᠭᠠᠭᠰᠠᠨ ᠴᠠᠭᠠᠷᠢᠭ ᠲᠠᠢ ᠰᠠᠭᠤᠯᠭ᠎ᠠ ᠶᠢᠨ ᠢᠷᠤᠭᠠᠷ ᠢ ᠠᠪᠴᠤ ᠬᠠᠶᠠᠭᠰᠠᠨ ᠠᠳᠠᠯᠢ ᠤᠷᠳᠤ ᠪᠦᠭᠡᠷᠡᠩᠭᠡᠢ ᠬᠤᠭᠤᠯᠠᠢ ᠪᠤᠯᠤᠨ᠎ᠠ᠃ ᠵᠠᠷᠢᠮ ᠨᠢ ᠭᠠᠤᠯᠢ᠂ ᠵᠡᠰ᠂ ᠴᠠᠭᠠᠨ ᠳᠡᠮᠦᠷ ᠢᠶᠠᠷ ᠪᠦᠷᠭᠡᠷ ᠬᠢᠳᠡᠭ᠃ ᠵᠠᠳᠠᠭᠠᠢ ᠨᠡᠷᠡᠪᠡᠯ ᠳᠤᠰᠤᠭᠤᠷ᠂ ᠰᠤᠪᠢᠯᠠᠭᠤᠷ ᠴᠤᠷᠭᠤ᠂ ᠪᠤᠳᠤᠩ ᠪᠡᠯᠡᠳᠭᠡᠳᠡᠭ᠃ ᠪᠢᠳᠡᠭᠦᠦ ᠨᠡᠷᠡᠪᠡᠯ ᠪᠦᠷᠭᠡᠷ ᠤᠨ ᠠᠮᠠᠰᠠᠷ ᠲᠤ ᠪᠢᠳᠡᠭᠦᠯᠡᠨ ᠳᠠᠯᠪᠢᠭᠰᠠᠨ ᠵᠢᠯᠠᠪᠴᠢᠨ ᠳᠤᠭᠤᠭ᠎ᠠ ᠶᠢᠨ ᠭᠦᠢᠰᠦᠨ ᠳᠤᠤᠷ᠎ᠠ ᠰᠡᠨᠵᠢ ᠤᠭᠤᠰᠤᠷ ᠲᠠᠢ ᠪᠤᠷᠵᠢᠨ ᠯᠤᠩᠬᠤ ᠪᠤᠶᠤ ᠵᠢᠵᠢᠭ ᠪᠤᠳᠤᠩ ᠢ ᠳᠦᠷᠪᠡᠨ ᠬᠤᠷᠤᠭᠤ ᠵᠠᠶᠢᠳᠠᠢ ᠬᠡᠢ ᠳᠡᠭᠦᠵᠢᠯᠡᠨ ᠠᠭᠤᠷᠰᠢᠮᠠᠯ ᠢ ᠳᠤᠰᠤᠳᠠᠭ᠃ ᠠᠶᠢᠷᠠᠭ ᠢ ᠳᠤᠭᠤᠭᠠᠨ ᠳᠠᠭᠠᠨ ᠪᠤᠴᠠᠯᠭᠠᠭᠠᠳ ᠠᠭᠤᠷ ᠭᠠᠷᠬᠤ ᠦᠶ᠎ᠡ ᠳᠤ ᠪᠦᠷᠭᠡᠷ ᠤᠨ ᠪᠦᠷᠭᠦᠪᠴᠢ ᠪᠤᠯᠭᠠᠭᠰᠠᠨ ᠵᠢᠯᠠᠪᠴᠢ ᠳᠤᠭᠤᠭᠠᠨ ᠳᠤ ᠭᠦᠢᠳᠡᠨ ᠤᠰᠤ ᠳᠦᠭᠦᠷᠭᠡᠵᠤ ᠰᠠᠮᠤᠷᠪᠠᠯ᠂ ᠬᠠᠯᠠᠭᠤᠨ ᠭᠦᠢᠳᠡᠨ ᠬᠠᠷᠰᠢᠵᠤ ᠠᠭᠤᠷ ᠨᠢ ᠳᠤᠰᠤᠯ ᠬᠤᠪᠢᠷᠠᠵᠤ ᠠᠷᠢᠬᠢ ᠪᠤᠯᠳᠠᠭ ᠠᠵᠢ᠃ ᠠᠷᠢᠬᠢ ᠨᠡᠷᠡᠭᠦ ᠪᠤᠶᠤ ᠶᠠᠪᠤᠴᠠ ᠶᠢ ︽ᠳᠤᠭᠤᠭ᠎ᠠ ᠨᠡᠷᠡᠯᠳᠡ ᠶᠢᠨ ᠦᠭᠡᠰ︾᠎ ᠠᠴᠠ ᠠᠮᠠᠷᠬᠠᠨ ᠮᠡᠳᠡᠵᠤ ᠪᠤᠯᠤᠨ᠎ᠠ᠃ ᠨᠠᠷ᠎ᠠ ᠬᠤᠷ᠎ᠠ ᠳᠡᠩᠴᠡᠭᠰᠡᠨ                         ᠤᠰᠤ ᠰᠤᠯᠢᠬᠤ ᠵᠢᠯᠠᠪᠴᠢ ᠶᠢ ᠨᠠᠪᠴᠢ ᠳᠡᠯᠭᠡᠷᠡᠭᠰᠡᠨ ᠤᠯᠠᠷᠢᠯ ᠳᠤ                   ᠤᠭᠯᠠᠵᠤ ᠳᠡᠭᠡᠷ᠎ᠡ ᠨᠢ ᠳᠠᠯᠪᠢᠭᠠᠳ ᠦᠨᠢᠶ᠎ᠡ ᠮᠠᠯ ᠤᠨ ᠰᠦ                             ᠭᠦᠪᠦᠩ ᠴᠠᠭᠠᠨ ᠪᠦᠰ ᠢᠶᠠᠷ ᠦᠯᠡᠮᠵᠢ ᠠᠷᠪᠢᠨ ᠰᠠᠭᠠᠵᠤ                          ᠭᠦᠪᠡᠭᠡᠯᠡᠨ ᠭᠤᠷᠪᠠ ᠤᠷᠢᠶᠠᠭᠠᠳ ᠦᠷᠯᠦᠭᠡ ᠦᠳᠡᠰᠢ ᠪᠦᠷᠢ                            ᠭᠦᠭᠵᠢᠭᠦ ᠭᠠᠯ ᠢ ᠦᠷᠳᠡᠭᠦ ᠳᠤ ᠦᠷᠭᠦᠯᠵᠢ ᠳᠤᠭᠤᠭ᠎ᠠ ᠨᠡᠷᠡᠨᠡᠮ᠃                      ᠭᠦᠭᠡᠰᠦᠷᠡᠭᠦ ᠠᠶᠢᠷᠠᠭ ᠠᠭᠤᠷᠰᠢᠭᠠᠳ ᠠᠶᠢᠷᠠᠭ ᠨᠡᠷᠡᠭᠦ ᠳᠤᠭᠤᠭ᠎ᠠ ᠪᠠᠨ                      ᠵᠢᠯᠠᠪᠴᠢ ᠶᠢᠨ ᠤᠰᠤ ᠶᠢ ᠰᠤᠯᠢᠵᠤ ᠠᠮᠠᠰᠠᠷ ᠪᠢᠯᠬᠠᠮ᠎ᠠ ᠳᠦᠭᠦᠷᠭᠡᠭᠡᠳ                     ᠵᠠᠯᠭᠠᠵᠤ ᠭᠤᠷᠪᠠ ᠬᠤᠪᠢᠷᠠᠭᠤᠯᠬᠤ ᠳᠤ ᠠᠮᠠ ᠳᠦᠷᠪᠡᠯᠵᠢᠨ ᠵᠤᠤᠬ᠎ᠠ ᠳᠤ                       ᠬᠠᠩᠬᠤᠯᠠᠬᠤ ᠦᠨᠦᠷ ᠠᠩᠬᠢᠯᠵᠤ ᠠᠷᠭᠠᠯ ᠤᠨ ᠭᠠᠯ ᠢ ᠭᠦᠭᠵᠢᠭᠡᠭᠡᠳ                     ᠬᠠᠯᠠᠭᠤᠨ ᠰᠠᠷᠬᠤᠳ ᠳᠦᠭᠦᠷᠳᠡᠭ ᠤᠳᠠ ᠠᠭᠠᠷᠤ ᠪᠦᠷᠭᠡᠷ ᠢ                            ᠠᠶᠢᠷᠠᠭ ᠰᠦᠨ ᠤ ᠭᠦᠷᠦᠩᠭᠡ ᠤᠭᠰᠠᠷᠠᠵᠤ ᠰᠠᠶᠢᠬᠠᠨ ᠳᠤᠬᠢᠶᠠᠭᠠᠳ                   ᠠᠷᠢᠭᠤᠨ ᠰᠠᠷᠬᠤᠳ ᠤᠨᠳᠤᠷᠳᠠᠭ᠃      ᠠᠷᠢᠬᠢ ᠨᠡᠷᠡᠭᠦ ᠳᠤ ᠤᠯᠠᠨ ᠵᠦᠢᠯ ᠢ ᠬᠢᠴᠢᠶᠡᠨ᠎ᠡ᠃      1. ᠭᠠᠯ ᠳᠡᠩᠴᠡᠭᠦᠯᠭᠦ᠃ ᠭᠠᠯ ᠠᠭᠳᠠᠪᠠᠯ ᠠᠶᠢᠷᠠᠭ ᠬᠤᠰᠤᠮᠳᠠᠵᠤ ᠠᠷᠢᠬᠢ ᠭᠤᠰᠢᠭᠤᠨ ᠪᠤᠯᠳᠠᠭ᠃ ᠭᠠᠯ ᠪᠠᠭᠠᠳᠠᠪᠠᠯ ᠠᠷᠢᠬᠢ ᠰᠢᠪᠠᠷᠠᠨ ᠰᠤᠪᠰᠤ ᠠᠷᠪᠢᠳᠠᠳᠠᠭ᠃      2. ᠪᠦᠷᠭᠡᠷ ᠳᠤᠭᠤᠭ᠎ᠠ ᠶᠢᠨ ᠠᠭᠤᠯᠵᠠᠷ ᠢ ᠶᠠᠪ ᠴᠠᠪ ᠪᠤᠭᠤᠳᠠᠭ᠃ ᠵᠢᠪᠠᠷ ᠨᠡᠪᠳᠡᠷᠡᠵᠤ ᠠᠭᠤᠷ ᠰᠠᠷᠨᠢᠪᠠᠯ ᠠᠷᠢᠬᠢ ᠶᠢᠨ ᠭᠠᠷᠤᠯᠳᠠ ᠪᠠ ᠴᠢᠨᠠᠷ ᠢ ᠨᠦᠯᠦᠭᠡᠯᠡᠳᠡᠭ᠃      3. ᠪᠡᠯᠭᠡ ᠳᠡᠮᠪᠡᠷᠢᠯ ᠢ ᠡᠷᠬᠢᠮᠯᠡᠨ ᠴᠡᠪᠡᠷ ᠴᠡᠭᠡᠷ ᠢ ᠠᠩᠬᠠᠷᠤᠨ ᠪᠤᠵᠠᠷ ᠪᠤᠯᠬᠢ ᠶᠠᠷᠢᠶ᠎ᠠ ᠭᠡᠯᠡᠭᠦ ᠶᠢ ᠤᠨᠴᠠ ᠬᠢᠴᠢᠶᠡᠳᠡᠭ᠃ ᠳᠤᠭᠤᠭ᠎ᠠ ᠨᠡᠷᠡᠭᠦ ᠳᠤ ᠮᠤᠤᠷ ᠨᠤᠬᠠᠢ ᠶᠢ ᠤᠶᠢᠷᠠᠳᠤᠭᠤᠯᠳᠠᠭ ᠦᠭᠡᠢ᠃ ᠠᠷᠢᠬᠢ ᠨᠡᠷᠡᠭᠦ ᠳᠡᠭᠡᠨ ᠵᠠᠷᠢᠮ ᠨᠢ ᠤᠯᠠᠭᠠᠨ᠎ᠠ᠂ ᠳᠤᠯᠤᠨᠤ᠂ ᠢᠯᠠᠮ᠎ᠠ᠂ ᠴᠢᠪᠠᠭ᠎ᠠ ᠵᠡᠭᠡᠷᠭᠡᠨ᠎ᠡ ᠶᠢᠨ ᠦᠷ᠎ᠡ ᠶᠢ ᠬᠠᠮᠳᠤ ᠨᠡᠷᠡᠵᠤ᠂ ᠦᠨᠦᠷ ᠠᠮᠳᠠ ᠶᠢ ᠤᠨᠴᠠ ᠰᠠᠶᠢᠵᠢᠷᠠᠭᠤᠯᠳᠠᠭ᠃      ᠪᠠᠭᠠᠷᠢᠨᠴᠤᠳ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ᠶᠢ ᠠᠷᠠᠵᠠᠯᠠᠵᠤ ᠬᠤᠷᠠᠵᠠᠯᠠᠳᠠᠭ ᠦᠭᠡᠢ᠃ ᠰᠤᠯᠠ ᠭᠠᠷᠤᠭᠰᠠᠨ ᠠᠷᠢᠬᠢ ᠎ ᠶᠢ ᠰᠤᠪᠰᠤ ᠭᠡᠳᠡᠭ᠃ ᠳᠠᠬᠢᠵᠤ ᠨᠢᠭᠡ ᠤᠳᠠᠭ᠎ᠠ ᠨᠡᠷᠡᠭᠦ ᠶᠢ ᠬᠤᠶᠠᠷ ᠬᠠᠷᠢᠭᠤᠯᠤᠭᠰᠠᠨ ᠠᠷᠢᠬᠢ ᠭᠡᠳᠡᠭ᠃ ᠪᠤᠳᠠᠭᠠᠨ ᠎ ᠤ ᠠᠷᠢᠬᠢ ᠶᠢ ᠬᠠᠷ᠎ᠠ ᠠᠷᠢᠬᠢ ᠪᠤᠶᠤ ᠢᠷᠭᠡᠨ ᠠᠷᠢᠬᠢ ᠭᠡᠳᠡᠭ᠃ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ᠶᠢ ᠬᠠᠪᠳᠠᠭᠠᠢ ᠴᠢᠯᠠᠭᠤᠨ ᠯᠤᠩᠭᠬᠤᠨ ᠳᠤ ᠬᠢᠵᠤ ᠮᠤᠩᠭᠤᠯ ᠭᠡᠷ ᠤᠨ ᠳᠤᠭᠤᠨᠤ ᠠᠴᠠ ᠳᠡᠭᠦᠵᠢᠯᠡᠨ ᠭᠡᠶᠢᠴᠢᠨ ᠵᠤᠴᠢᠨ ᠳᠠᠭᠠᠨ ᠪᠠᠷᠢᠳᠠᠭ᠃ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠤᠤᠭᠤᠬᠤ ᠠᠷᠢᠬᠢ ᠪᠠᠨ ᠪᠤᠳᠤᠩ᠂ ᠱᠤᠯᠳᠤᠢ ᠵᠡᠷᠭᠡ ᠳᠤᠮᠤ ᠴᠢᠯᠠᠭᠤᠨ ᠰᠠᠪᠠᠨ ᠳᠤ ᠬᠢᠵᠤ ᠡᠯᠳᠡᠮᠡᠯ ᠭᠦᠵᠡᠭᠡ᠂ ᠳᠠᠪᠤᠰᠠᠩ ᠵᠡᠷᠭᠡ ᠪᠠᠷ ᠠᠮᠠᠰᠠᠷ ᠢ ᠨᠢ ᠪᠢᠳᠡᠭᠦᠦ ᠪᠤᠭᠤᠵᠤ ︵ᠵᠠᠷᠢᠮ ᠨᠢ ᠪᠤᠷᠠᠮ ᠴᠢᠪᠠᠭ᠎ᠠ ᠪᠠᠭ᠎ᠠ ᠬᠤᠯᠢᠵᠤ ︶ ᠳᠤᠯᠭ᠎ᠠ ᠶᠢᠨ ᠢᠶᠠᠨ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠭᠠᠵᠠᠷ ᠮᠠᠯᠳᠠᠵᠤ ᠪᠤᠯᠠᠵᠤ ᠬᠠᠳᠠᠭᠠᠯᠠᠳᠠᠭ᠃ ᠬᠠᠮᠢᠶᠠᠳᠠᠨ ᠰᠠᠳᠤᠨ ᠪᠤᠶᠤ ᠭᠦᠨᠳᠤᠳᠤ ᠵᠤᠴᠢᠨ ᠢᠷᠡᠪᠡᠯ ᠠᠷᠢᠬᠢ ᠭᠠᠷᠭᠠᠳᠠᠭ᠃ ᠶᠡᠷᠦ ᠶᠢᠨ ᠦᠶ᠎ᠡ ᠳᠤ ᠡᠩ ᠤᠨ ᠵᠤᠴᠢᠨ ᠳᠤ ︵ᠨᠠᠰᠤᠳᠠᠨ ᠳᠤ ︶ ᠶᠤᠰᠤᠨ ᠤ ᠳᠡᠳᠦᠢ ᠭᠡᠳᠦᠨ ᠭᠡᠮ ᠪᠠᠷᠢᠳᠠᠭ ᠠᠴᠠ ᠪᠢᠰᠢ ᠳᠠᠷᠠᠰᠤ ᠪᠠᠷ ᠱᠠᠯᠠᠳᠠᠭ ᠦᠭᠡᠢ᠃
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠤ ᠰᠤᠶᠤᠯ ᠲᠡᠦᠬᠡ