ᠪᠠᠭᠠᠷᠢᠨᠴᠤᠳ ᠤᠨ ᠤᠷᠤᠨ ᠰᠠᠭᠤᠴᠠ ᠶᠢᠨ ᠵᠠᠩᠰᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/19
                      ᠮᠦᠰᠦᠨ     ᠪᠠᠭᠠᠷᠢᠨ ᠮᠤᠩᠭᠤᠯᠴᠤᠳ ᠨᠢ ᠠᠯᠢ ᠡᠷᠳᠡᠨ ᠠᠴᠠ ᠠᠪᠤᠭᠠᠳ ᠡᠪᠦᠯ ᠵᠤᠨ ᠤ ᠳᠦᠷᠪᠡᠨ ᠤᠯᠠᠷᠢᠯ ᠳᠤ ᠦᠰᠴᠤ ᠳᠦᠷᠦᠭᠰᠡᠨ ᠨᠤᠳᠤᠭ ᠲᠠᠭᠠᠨ ᠤᠰᠤᠨ ᠤ ᠳᠤᠩᠭᠠᠯᠠᠭ ᠢ ᠰᠤᠩᠭᠤᠵᠤ᠂ ᠡᠪᠡᠰᠦᠨ ᠤ ᠰᠠᠶᠢᠨ ᠢ ᠰᠢᠯᠢᠵᠤ᠂ ᠨᠠᠷᠠ ᠎ ᠲᠠᠢ ᠭᠠᠵᠠᠷ ᠭᠡᠷ ᠢᠶᠠᠨ ᠪᠠᠷᠢᠵᠤ ᠨᠠᠪᠴᠢ ᠲᠠᠢ ᠭᠠᠵᠠᠷ ᠮᠠᠯ ᠢᠶᠠᠨ ᠮᠠᠯᠵᠢᠳᠠᠭ᠃ ᠨᠡᠭᠦᠳᠡᠯ ᠮᠠᠯᠵᠢᠯ ᠢᠶᠠᠷ ᠭᠤᠤᠯ ᠪᠤᠯᠭᠠᠵᠤ᠂ ᠠᠩ ᠭᠦᠷᠦᠭᠡ ᠬᠢᠵᠤ ᠠᠶᠠᠨ ᠭᠦᠰᠭᠡ ᠳᠤ ᠶᠠᠪᠤᠵᠤ᠂ ᠠᠵᠤ ᠳᠦᠷᠦᠨ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠠᠵᠢᠯᠴᠢ ᠪᠤᠷᠤᠭᠵᠢᠭᠤᠨ ᠮᠤᠩᠭᠤᠯ ᠤᠨ ᠨᠢᠭᠡ ᠤᠭᠰᠠᠭ᠎ᠠ ᠠᠶᠢᠮᠠᠭ ᠶᠤᠮ᠃     ᠪᠠᠭᠠᠷᠢᠨᠴᠤᠳ ᠤᠨ ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠠᠮᠢᠳᠤᠷᠠᠯ ᠤᠨ ᠭᠡᠷᠡᠭᠴᠡᠭᠡ ᠳᠤ ᠳᠤᠬᠢᠷᠠᠭᠰᠠᠨ ᠭᠡᠷ ᠰᠠᠭᠤᠴᠠ ᠨᠢ ᠳᠠᠷᠤᠢ ᠡᠷᠳᠡ ᠳᠡᠭᠡᠳᠤ ᠠᠴᠠ ᠪᠠᠨ ᠤᠯᠠᠮᠵᠢᠯᠠᠭᠳᠠᠭᠰᠠᠭᠠᠷ ᠢᠷᠡᠭᠰᠡᠨ ᠮᠤᠩᠭᠤᠯ ᠭᠡᠷ ᠪᠤᠯᠤᠨ᠎ᠠ᠃     ᠪᠠᠭᠠᠷᠢᠨ ᠤ ᠳᠠᠯ᠎ᠠ ᠨᠤᠳᠤᠭ ᠲᠤ ᠡᠪᠦᠯ ᠬᠠᠪᠤᠷ ᠤᠨ ᠰᠠᠯᠬᠢ ᠰᠢᠭᠤᠷᠭ᠎ᠠ ᠤᠨᠴᠠ ᠭᠡᠴᠡᠭᠦᠦ ᠪᠠᠶᠢᠳᠠᠭ ᠴᠦ ᠮᠠᠯᠴᠢᠳ ᠤᠨ ᠮᠤᠩᠭᠤᠯ ᠭᠡᠷ ᠨᠢ ᠶᠡᠷᠦ ᠠᠴᠠ ᠠᠵᠢᠭ ᠴᠦ ᠦᠭᠡᠢ ᠭᠡᠪ ᠢᠶᠠᠷ ᠢᠶᠠᠨ ᠪᠠᠶᠢᠳᠠᠭ᠃ ᠤᠴᠢᠷ ᠨᠢ ᠮᠤᠩᠭᠤᠯ ᠭᠡᠷ ᠨᠢ ᠳᠦᠭᠦᠷᠢᠭ ᠭᠡᠯᠪᠡᠷᠢᠳᠠᠢ ᠪᠤᠯᠬᠤᠷ ᠰᠠᠯᠬᠢ ᠰᠢᠭᠤᠷᠭᠠᠨ ᠤ ᠭᠦᠴᠦᠨ ᠤ ᠴᠢᠭᠯᠡᠯ ᠢ ᠬᠠᠯᠢᠷᠠᠭᠠᠳ ᠭᠦᠯ ᠳᠤᠭᠳᠠᠵᠤ ᠴᠢᠳᠠᠬᠤ ᠦᠭᠡᠢ ᠬᠤᠶᠠᠷ ᠳᠡᠰᠢ ᠪᠠᠨ ᠵᠠᠳᠠᠷᠠᠨ ᠦᠩᠭᠡᠷᠡᠭᠦ ᠳᠤᠯᠠ ᠰᠠᠯᠬᠢᠨ ᠤ ᠭᠦᠴᠦᠨ ᠭᠡᠳᠦᠢ ᠶᠡᠭᠡ ᠪᠠᠶᠢᠭᠰᠠᠨ ᠴᠦ ᠮᠤᠩᠭᠤᠯ ᠭᠡᠷ ᠨᠢ ᠠᠵᠢᠭ ᠦᠭᠡᠢ ᠭᠡᠪ ᠢᠶᠠᠷ ᠢᠶᠠᠨ ᠪᠠᠶᠢᠳᠠᠭ᠃ ᠡᠶᠢᠮᠦ ᠠᠴᠠ ᠮᠠᠯᠴᠢᠳ ︽ᠠᠷᠪᠠᠨ ᠳᠡᠰ ᠤᠨ ᠬᠠᠷ᠎ᠠ ᠰᠠᠯᠬᠢᠨ ᠳᠤ ᠠᠵᠢᠶᠠᠷᠬᠤ ᠴᠦ ᠦᠭᠡᠢ ᠮᠤᠩᠭᠤᠯ ᠭᠡᠷ︾ ᠭᠡᠵᠡᠭᠡᠳᠡᠭ᠃     ᠮᠤᠩᠭᠤᠯ ᠭᠡᠷ ᠢ ᠪᠠᠷᠢᠬᠤ ᠳᠤ ᠡᠪᠦᠯ ᠵᠤᠨ ᠤ ᠤᠯᠠᠷᠢᠯ᠂ ᠭᠦᠯᠳᠡᠭᠦᠦ ᠭᠦᠢᠳᠡᠨ ᠭᠠᠵᠠᠷ᠂ ᠡᠯᠡᠰᠤ ᠮᠠᠩᠬ᠎ᠠ᠂ ᠳᠤᠪᠤ ᠭᠦᠳᠦᠯ ᠭᠡᠵᠤ ᠢᠯᠭᠠᠳᠠᠭ ᠦᠭᠡᠢ᠃ ᠭᠠᠭᠴᠠᠭᠦ ᠰᠠᠯᠬᠢᠨ ᠤᠷᠤᠭᠤ ᠠᠰ ᠡᠮᠦᠨᠡᠰᠢ ᠪᠤᠶᠤ ᠵᠡᠭᠦᠨ ᠡᠮᠦᠨ᠎ᠡ ᠰᠢᠭ ᠬᠠᠨᠳᠤᠭᠤᠯᠤᠨ ᠪᠤᠰᠬᠠᠳᠠᠭ ︵ᠪᠠᠭᠠᠷᠢᠨ ᠨᠤᠳᠤᠭ ᠲᠤ ᠡᠪᠦᠯ ᠬᠠᠪᠤᠷ ᠪᠤᠯᠪᠠᠯ ᠬᠤᠶᠢᠨ᠎ᠠ ᠠᠴᠠ ᠪᠤᠶᠤ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠠᠴᠠ ᠰᠠᠯᠬᠢᠨ ᠰᠠᠯᠬᠢᠯᠠᠳᠠᠭ ᠨᠢ ᠶᠡᠷᠦᠳᠡ ᠶᠢᠨ ᠭᠡᠷᠡᠭ︶᠃ ᠮᠤᠩᠭᠤᠯ ᠭᠡᠷ ᠢ ᠪᠠᠷᠢᠬᠤ ᠳᠤ ᠳᠦᠷᠭᠡᠨ᠂ ᠪᠠᠭᠤᠯᠭᠠᠬᠤ ᠳᠤ ᠠᠮᠠᠷᠬᠠᠨ᠂ ᠠᠴᠢᠶᠠᠯᠠᠬᠤ ᠳᠤ ᠬᠢᠯᠪᠠᠷᠬᠠᠨ᠂ ᠨᠡᠭᠦᠳᠡᠯ ᠰᠠᠭᠤᠳᠠᠯ ᠳᠤ ᠭᠦᠩᠭᠡᠨ ᠪᠤᠯᠬᠤᠷ ᠮᠠᠯᠴᠢᠳ ᠎ ᠤᠨ ᠨᠡᠭᠦᠳᠡᠯ ᠤᠨ ᠠᠮᠢᠳᠤᠷᠠᠯ ᠳᠤ ᠮᠠᠰᠢ ᠳᠤᠬᠢᠷᠠᠭᠰᠠᠨ ᠤᠷᠤᠨ ᠰᠠᠭᠤᠴᠠ ᠪᠤᠯᠬᠤ ᠰᠠᠨ᠃ ᠮᠤᠩᠭᠤᠯ ᠭᠡᠷ ᠢ ᠦᠢᠯᠡᠳᠭᠦ ᠪᠠ ᠰᠠᠯᠪᠢᠨ ᠵᠠᠰᠠᠬᠤ ᠳᠤ ᠴᠦ ᠳᠦᠭᠦᠮ᠃ ᠮᠤᠩᠭᠤᠯ ᠭᠡᠷ ᠤᠨ ᠪᠦᠳᠦᠴᠡ ᠳᠤ ᠬᠠᠨ᠎ᠠ᠂ ᠤᠷᠤᠢ ᠭᠡᠵᠤ ᠬᠤᠶᠠᠷ ᠶᠡᠭᠡ ᠭᠡᠰᠡᠭ ᠢᠶᠠᠷ ᠪᠦᠷᠢᠯᠳᠦᠳᠡᠭ᠃ ᠮᠤᠩᠭᠤᠯ ᠭᠡᠷ ᠲᠤ ᠳᠦᠷᠪᠡᠨ ᠬᠠᠨᠠᠳᠤ᠂ ᠵᠢᠷᠭᠤᠭᠠᠨ ᠬᠠᠨᠠᠳᠤ᠂ ᠨᠠᠢᠮᠠᠨ ᠬᠠᠨᠠᠳᠤ ᠪᠤᠶᠤ ᠡᠭᠦᠨ ᠠᠴᠠ ᠶᠡᠭᠡ ᠴᠦ ᠪᠤᠢ᠃ ᠡᠳᠡᠭᠡᠷ ᠨᠢ ᠶᠡᠭᠡ ᠪᠠᠭ᠎ᠠ ᠪᠠᠭᠳᠠᠭᠠᠮᠵᠢ ᠨᠢ ᠠᠳᠠᠯᠢ ᠦᠭᠡᠢ ᠤᠯᠠᠨ ᠶᠠᠩᠵᠤ ᠶᠢᠨ ᠪᠠᠶᠢᠳᠠᠭ ᠴᠦ ᠭᠡᠯᠪᠡᠷᠢ ᠮᠠᠶ᠋ᠢᠭ ᠨᠢ ᠪᠦᠷ ᠯᠡ ᠠᠳᠠᠯᠢᠬᠠᠨ ᠱᠤᠪᠤᠭᠤᠷ ᠤᠷᠤᠢ ᠲᠠᠢ᠂ ᠪᠦᠮᠪᠦᠭᠡᠷ ᠭᠡᠯᠪᠡᠷᠢᠳᠠᠢ᠂ ᠢᠰᠡᠭᠡᠢ ᠪᠦᠷᠢᠶᠡᠰᠤ ᠲᠠᠢ ᠪᠤᠶᠤ ᠳᠡᠷᠡᠰᠦᠨ ᠪᠦᠷᠢᠶᠡᠰᠤ ᠲᠠᠢ ᠴᠦ ᠪᠠᠶᠢᠳᠠᠭ᠃ ᠢᠯᠠᠩᠭᠤᠶ᠎ᠠ ᠪᠠᠭᠠᠷᠢᠨ ᠎ ᠳᠤ ᠳᠠᠷᠠᠰᠤ ᠤᠨᠴᠠ ᠤᠷᠭᠤᠳᠠᠭ ᠪᠠᠶᠢᠭᠠᠯᠢ ᠶᠢᠨ ᠨᠦᠭᠦᠴᠡᠯ ᠢ ᠠᠰᠢᠭᠯᠠᠵᠤ ᠳᠠᠷᠠᠰᠤ ᠪᠠᠷ ᠳᠡᠭᠡᠪᠦᠷᠢᠯᠡᠭᠰᠡᠨ ᠮᠤᠩᠭᠤᠯ ᠭᠡᠷ ᠮᠠᠰᠢ ᠤᠯᠠᠨ ᠬᠠᠷᠠᠭᠳᠠᠳᠠᠭ᠃ ᠡᠶᠢᠮᠦ ᠵᠡᠷᠭᠡᠯᠡᠳᠡᠭ ᠭᠦᠷᠰᠢ ᠬᠤᠰᠢᠭᠤᠳ ᠤᠨ ᠬᠢᠨ ᠴᠦ ︽ᠳᠠᠷ ᠲᠠᠢ ᠪᠠᠭᠠᠷᠢᠨ᠂ ᠳᠠᠷᠠᠰᠤᠨ ᠭᠡᠷ ᠲᠠᠢ ᠪᠠᠭᠠᠷᠢᠨ︾ ᠭᠡᠵᠤ ᠱᠤᠭ ᠪᠠᠷᠢᠳᠠᠭ᠃ ᠡᠨᠡ ᠨᠢ ᠪᠠᠭᠠᠷᠢᠨ ᠤ ᠮᠤᠩᠭᠤᠯ ᠭᠡᠷ ᠤᠨ ᠪᠠᠰᠠ ᠨᠢᠭᠡ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠬᠤ ᠶᠤᠮ᠃ ᠪᠠᠭᠠᠷᠢᠨᠴᠤᠳ ᠤᠨ ᠡᠩ ᠤᠨ ᠮᠤᠩᠭᠤᠯ ᠭᠡᠷ ᠤᠨ ᠦᠨᠳᠦᠷ ᠎ ᠨᠢ ᠪᠠᠷᠤᠭ ᠠᠷᠪᠠᠨ ᠭᠤᠷᠪᠠᠨ ᠳᠤᠬᠤᠢ ᠢᠯᠡᠭᠦᠦ᠂ ᠬᠠᠨ᠎ᠠ ᠶᠢᠨ ᠦᠨᠳᠦᠷ ᠨᠢ ᠳᠦᠷᠪᠡ ᠳᠠᠪᠤᠨ ᠳᠤᠬᠤᠢ ᠯᠡ ᠪᠠᠶᠢᠳᠠᠭ᠃ ᠳ᠋ᠢᠶᠠᠮᠧᠲᠷ ᠨᠢ ᠳᠤᠯᠤᠭ᠎ᠠ ᠨᠠᠢᠮᠠᠨ ᠳᠤᠬᠤᠢ ᠶᠢᠨ ᠤᠷᠴᠢᠮ ᠪᠠᠶᠢᠳᠠᠭ᠃ ᠮᠤᠩᠭᠤᠯ ᠭᠡᠷ ᠤᠨ ᠡᠭᠦᠳᠡᠨ ᠤ ᠦᠨᠳᠦᠷ ᠨᠢ ᠭᠤᠷᠪᠠᠨ ᠳᠤᠬᠤᠢ ᠢᠯᠡᠭᠦᠦ᠂ ᠦᠷᠭᠡᠨ ᠨᠢ ᠬᠤᠶᠠᠷ ᠳᠤᠬᠤᠢ ᠬᠠᠭᠠᠰ ᠤᠷᠴᠢᠮ ᠪᠠᠶᠢᠵᠤ᠂ ᠡᠮᠦᠨ᠎ᠡ ᠵᠦᠭ ᠪᠤᠶᠤ ᠵᠡᠭᠦᠨ ᠡᠮᠦᠨ᠎ᠡ ᠰᠢᠭ ᠬᠠᠨᠳᠤᠭᠤᠯᠤᠭᠰᠠᠨ ᠪᠤᠯᠬᠤᠷ ᠰᠠᠯᠬᠢ ᠰᠢᠭᠤᠷᠭᠠᠨ ᠢ ᠬᠠᠯᠬᠠᠯᠠᠳᠠᠭ᠃      ᠮᠤᠩᠭᠤᠯ ᠭᠡᠷ ᠤᠨ ᠳᠤᠳᠤᠷᠠᠬᠢ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠢ ᠬᠠᠮᠢᠭ᠎ᠠ ᠶᠠᠭᠠᠬᠢᠵᠤ ᠳᠠᠯᠪᠢᠳᠠᠭ ᠳᠤᠭᠳᠠᠭᠰᠠᠨ ᠤᠯᠠᠮᠵᠢᠯᠠᠯᠳᠤ ᠶᠤᠰᠤ ᠵᠢᠷᠦᠮ ᠪᠠᠶᠢᠳᠠᠭ᠃ ᠮᠤᠩᠭᠤᠯ ᠭᠡᠷ ᠢᠶᠠᠨ ᠪᠠᠷᠢᠵᠤ ᠪᠦᠷᠢᠶᠡᠰᠦᠯᠡᠵᠤ ᠪᠠᠷᠠᠮᠠᠭᠴᠠ ᠭᠡᠷ ᠤᠨ ᠳᠤᠳᠤᠷᠠᠬᠢ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠢᠶᠠᠨ ᠳᠤᠬᠢᠷᠠᠭᠤᠯᠳᠠᠭ᠃ ᠢᠩᠬᠢᠭᠦ ᠳᠡᠭᠡᠨ ᠬᠠᠮᠤᠭ ᠤᠨ ᠳᠦᠷᠦᠭᠦᠨ ᠳᠤᠨᠢ ᠮᠤᠩᠭᠤᠯ ᠭᠡᠷ ᠤᠨ ᠳᠦᠪ ᠭᠦᠢᠰᠤ ᠪᠤᠯᠬᠤ ᠭᠠᠵᠠᠷ ᠢ ᠭᠤᠯᠤᠮᠳᠠ ᠶᠢᠨ ᠤᠷᠤᠨ ᠭᠡᠵᠤ ᠳᠤᠯᠭ᠎ᠠ ᠪᠠᠨ ᠳᠤᠯᠳᠠᠭ᠃ ᠮᠤᠩᠭᠤᠯᠴᠤᠳ ᠳᠤᠯᠭ᠎ᠠ ᠳᠤᠭᠤᠭ᠎ᠠ ᠳᠠᠯᠪᠢᠬᠤ ᠳᠠᠭᠠᠨ ᠳᠡᠷᠢ ᠳᠡᠭᠰᠢᠳᠬᠡᠨ ᠢ ᠤᠨᠴᠠ ᠠᠩᠬᠠᠷᠳᠠᠭ᠃ ᠭᠡᠷᠪᠡ ᠪᠠᠭ᠎ᠠ ᠵᠡᠷᠭᠡ ᠬᠠᠵᠠᠭᠠᠢ ᠪᠠᠶᠢᠭᠰᠠᠨ ᠴᠦ ᠪᠠᠷᠠᠭᠤᠨ ᠬᠤᠶᠢᠰᠢ ᠪᠠᠨ ᠬᠠᠵᠠᠶᠢᠯᠭᠠᠬᠤ ᠠᠴᠠ ᠪᠢᠰᠢ ᠭᠡᠷ ᠤᠨ ᠵᠡᠭᠦᠨ ᠡᠮᠦᠨ᠎ᠡ ᠵᠦᠭ ᠪᠤᠶᠤ ᠡᠭᠦᠳᠡᠨ ᠦᠭᠡᠳᠡ ᠬᠠᠵᠠᠶᠢᠯᠭᠠᠬᠤ ᠶᠢ ᠤᠨᠴᠠ ᠴᠡᠭᠡᠷᠯᠡᠳᠡᠭ᠃ ᠡᠶᠢᠮᠦ ᠠᠴᠠ ︽ᠪᠠᠶᠠᠨ ᠠᠶᠢᠯ ᠤᠨ ᠳᠤᠭᠤᠭ᠎ᠠ ᠨᠢ ᠪᠠᠷᠠᠭᠤᠨ ᠬᠤᠶᠢᠰᠢ ᠪᠠᠨ ᠭᠡᠯᠳᠡᠭᠡᠢ︾ ᠭᠡᠳᠡᠭ ᠠᠷᠠᠳ ᠤᠨ ᠠᠮᠠᠨ ᠶᠠᠷᠢᠶ᠎ᠠ ᠪᠠᠶᠢᠳᠠᠭ᠃ ᠡᠭᠦᠨ ᠤ ᠤᠴᠢᠷ ᠨᠢ ᠭᠠᠯ ᠳᠤᠭᠤᠭᠠᠨ ᠤ ᠪᠤᠶᠠᠨ ᠭᠡᠰᠢᠭ ᠢ ᠡᠭᠦᠳᠡᠨ ᠳᠡᠰᠢ ᠬᠠᠷᠠᠭᠤᠯᠵᠤ ᠭᠠᠳᠠᠭᠰᠢ ᠠᠯᠳᠠᠵᠤ ᠪᠤᠯᠬᠤ ᠦᠭᠡᠢ ᠎ ᠶᠢ ᠬᠢᠴᠢᠶᠡᠭᠰᠡᠨ ᠭᠡᠨ᠎ᠡ᠃ ᠳᠤᠯᠭ᠎ᠠ ᠪᠠᠨ ᠳᠤᠯᠵᠤ ᠳᠤᠯᠠᠭᠠᠨ ᠤ ᠭᠦᠷᠢᠶ᠎ᠡ ᠶᠢ ᠳᠠᠯᠪᠢᠭᠰᠠᠨ ᠤ ᠳᠠᠷᠠᠭ᠎ᠠ ᠭᠡᠷ ᠤᠨ ᠳᠤᠭᠤᠢ ᠵᠠᠢ ᠳᠤ ᠰᠢᠷᠢᠳᠡᠭ᠂ ᠢᠰᠡᠭᠡᠢ ᠪᠠᠨ ᠳᠠᠪᠢᠰᠦᠨ᠎ᠡ᠃ ᠪᠠᠷᠠᠭ᠎ᠠ ᠰᠢᠷᠡᠭᠡ ᠦᠭᠡᠢ ᠬᠠᠩᠭᠠᠢ ᠭᠡᠷ ᠲᠤ ᠪᠤᠯ ᠭᠤᠯᠤᠮᠳᠠ  ᠎ ᠶᠢᠨ ᠭᠦᠷᠢᠶ᠎ᠡ ᠠᠴᠠ ᠭᠡᠷ ᠤᠨ ᠬᠠᠶᠠᠭ᠎ᠠ ᠭᠦᠷᠳᠡᠯᠡᠬᠢ ᠵᠠᠢ ᠳᠤ ᠡᠩ ᠨᠡᠶᠢᠳᠡᠮ ᠳᠤᠨᠢ ᠳᠡᠪᠢᠰᠴᠤ᠂ ᠪᠠᠷᠠᠭ᠎ᠠ ᠰᠢᠷᠡᠭᠡ ᠲᠠᠢ ᠭᠡᠷ ᠪᠤᠯ ᠠᠪᠳᠠᠷ᠎ᠠ ᠪᠠ ᠤᠷᠤ ᠰᠢᠷᠡᠭᠡᠨ ᠤ ᠨᠠᠭᠠᠳᠤ ᠳᠠᠯ᠎ᠠ ᠪᠠᠷ ᠳᠤᠭᠤᠶᠢᠯᠠᠭᠤᠯᠵᠤ ᠳᠡᠪᠢᠰᠳᠡᠭ ᠃     ᠮᠤᠩᠭᠤᠯ ᠭᠡᠷ ᠤᠨ ᠬᠤᠶᠢᠮᠤᠷ ᠳᠠᠯ᠎ᠠ ᠠᠴᠠ ᠡᠬᠢᠯᠡᠨ ᠭᠡᠷ ᠤᠨ ᠪᠠᠷᠠᠭᠤᠨ ᠬᠤᠶᠢᠨ᠎ᠠ᠂ ᠪᠠᠷᠠᠭᠤᠨ ᠳᠠᠯ᠎ᠠ᠂ ᠪᠠᠷᠠᠭᠤᠨ ᠡᠮᠦᠨᠡᠳᠤ ᠳᠠᠯ᠎ᠠ ᠳᠤ ᠳᠠᠯᠪᠢᠬᠤ ᠶᠠᠭᠤᠮᠠᠰ ᠨᠢ ᠪᠦᠷ  ᠯᠡ ᠡᠷᠡᠭᠳᠠᠶᠢᠴᠤᠳ ᠤᠨ ᠡᠳ᠋ᠯᠡᠵᠤ ᠭᠡᠷᠡᠭᠯᠡᠳᠡᠭ ᠵᠦᠢᠯᠡᠰ ᠪᠠᠶᠢᠳᠠᠭ᠃ ᠳᠡᠶᠢᠮᠦ ᠠᠴᠠ ᠡᠷᠳᠡᠨ ᠤ ᠰᠢᠨ᠎ᠡ ᠭᠡᠷ ᠮᠢᠯᠢᠶᠠᠬᠤ ᠢᠷᠦᠭᠡᠯ ᠳᠤ᠄ ︽ᠪᠠᠷᠠᠭᠤᠨ ᠠᠪᠳᠠᠷ᠎ᠠ ᠶᠢ ᠨᠡᠭᠡᠭᠡᠵᠤ ᠦᠵᠡᠪᠡᠯ ᠪᠠᠷᠠᠰ ᠤᠨ ᠠᠷᠠᠰᠤ ᠁ ᠪᠢᠴᠢᠭ ᠳᠠᠩᠰᠠ᠂ ᠱᠠᠭ᠎ᠠ ᠰᠢᠳᠠᠷ᠎ᠠ᠂ ᠪᠦᠭᠡ ᠶᠢᠨ ᠵᠤᠳᠤᠭ᠂ ᠡᠪ ᠎ ᠤᠨ ᠴᠠᠪᠠᠤ᠂ ᠬᠤᠷᠳᠤᠨ ᠮᠤᠷᠢᠨ ᠤ ᠬᠤᠰᠤᠭᠤᠷ ᠁ ᠴᠦᠮ ᠪᠦᠷᠢᠨ︾ ᠭᠡᠵᠤ ᠪᠠᠶᠢᠳᠠᠭ᠃ ᠡᠨᠡ ᠨᠢ ᠪᠠᠷᠠᠭᠤᠨ ᠳᠠᠯ᠎ᠠ ᠪᠠᠷ ᠢᠶᠠᠨ ᠪᠦᠰᠡᠳᠠᠢ ᠭᠦᠮᠦᠨ ᠤ ᠡᠳ᠋ᠯᠡᠵᠤ ᠭᠡᠷᠡᠭᠯᠡᠳᠡᠭ ᠶᠠᠭᠤᠮ᠎ᠠ ᠭᠡᠤᠮ᠎ᠡ ᠳᠠᠯᠪᠢᠳᠠᠭ ᠵᠤᠷᠰᠢᠯ ᠨᠢ ᠡᠷᠳᠡᠨ ᠎ ᠠᠴᠠ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠢ ᠭᠡᠷᠡᠴᠢᠯᠡᠵᠤ ᠪᠠᠶᠢᠬᠤ ᠶᠤᠮ᠃     ᠮᠤᠩᠭᠤᠯ ᠭᠡᠷ ᠤᠨ ᠬᠤᠶᠢᠮᠤᠷ ᠳᠠᠯ᠎ᠠ ᠠᠴᠠ ᠭᠡᠷ ᠤᠨ ᠵᠡᠭᠦᠨ ᠬᠤᠶᠢᠨ᠎ᠠ᠂ ᠵᠡᠭᠦᠨᠳᠠᠢ ᠵᠡᠭᠦᠨ ᠡᠮᠦᠨ᠎ᠡ ᠳᠠᠯ᠎ᠠ ᠪᠠᠷ ᠪᠦᠷ ᠴᠦ ᠪᠦᠰᠡᠭᠦᠶᠢᠴᠤᠳ ᠤᠨ ᠵᠠᠷᠤᠵᠤ ᠪᠠᠷᠢᠳᠠᠭ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠢ ᠳᠠᠯᠪᠢᠳᠠᠭ᠃ ᠳᠡᠶᠢᠮᠦ ᠠᠴᠠ ᠰᠢᠨ᠎ᠡ ᠭᠡᠷ ᠎ ᠤᠨ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠢ ︽ᠵᠡᠭᠦᠨ ᠬᠤᠶᠢᠨ᠎ᠠ ᠳᠠᠯᠪᠢᠭᠰᠠᠨ ᠵᠦᠢᠷᠠᠢ ᠬᠤᠶᠠᠷ ᠠᠪᠳᠠᠷ᠎ᠠ ᠳᠤ᠄ ᠨᠤᠭᠤᠭᠠᠨ ᠤᠭ᠍ᠶᠤ ᠶᠢᠨ ᠭᠡ ᠲᠠᠢ᠂ ᠨᠤᠮᠢᠨ ᠡᠷᠳᠡᠨᠢ ᠶᠢᠨ ᠰᠢᠨᠵᠢ ᠲᠠᠢ᠂ ᠴᠤᠯ ᠮᠦᠩᠭᠦᠨ ᠴᠤᠤᠵᠢ ᠲᠠᠢ᠂ ᠴᠢᠳᠬᠤᠮᠠᠯ ᠮᠦᠩᠭᠦᠨ ᠳᠦᠯᠬᠢᠭᠦᠷ ᠎ ᠲᠠᠢ᠂ ᠠᠭᠠᠷᠤ ᠽᠠᠨᠳᠠᠨ ᠮᠤᠳᠤ ᠲᠠᠢ᠂ ᠠᠪᠳᠠᠷ᠎ᠠ ᠶᠢᠨ ᠬᠢᠨ ᠳᠤᠳᠤᠷ᠎ᠠ ᠬᠤᠷᠭᠤᠢ ᠴᠢᠰᠴᠤ ᠬᠤᠷᠢᠨ ᠬᠤᠶᠠᠷ ᠵᠦᠢᠯ᠂ ᠨᠠᠷᠢᠨ ᠡᠳ᠋ᠯᠡᠯ ᠨᠠᠶᠠᠨ ᠨᠠᠢᠮᠠᠨ ᠵᠦᠢᠯ᠂ ᠭᠦᠮᠦᠰᠬᠡᠨ ᠳᠤ ᠳᠦᠷᠬᠢᠭᠦ ᠭᠦᠭᠡ ᠡᠩᠭᠡᠰᠬᠡ᠂ ᠤᠷᠤᠭᠤᠯ ᠳᠤ ᠳᠦᠷᠬᠢᠭᠦ ᠤᠯᠠᠭᠠᠨ ᠡᠩᠭᠡᠰᠭᠡ᠂ ᠪᠠᠷᠢᠬᠤ ᠳᠠᠯᠪᠢᠬᠤ ᠪᠦᠷᠢᠨ ᠳᠡᠭᠦᠰ ᠭᠡᠵᠤ︾ ᠢᠷᠦᠭᠡᠳᠡᠭ ᠪᠢᠯᠡ᠃     ᠮᠤᠩᠭᠤᠯ ᠭᠡᠷ ᠤᠨ ᠪᠠᠷᠠᠭᠤᠨ ᠬᠤᠶᠢᠳᠤ ᠳᠠᠯ᠎ᠠ ᠳᠤ ᠪᠤᠷᠬᠠᠨ ᠤ ᠰᠢᠷᠡᠭᠡ ᠳᠠᠯᠪᠢᠵᠤ᠂ ᠳᠡᠭᠦᠨ ᠤ ᠳᠡᠭᠡᠷ᠎ᠡ ᠪᠤᠷᠬᠠᠨ ᠭᠦᠩᠭᠠᠷᠠᠪᠠ ᠳᠠᠯᠪᠢᠳᠠᠭ᠃ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠪᠤᠷᠬᠠᠨ ᠢᠶᠠᠨ ᠳᠠᠬᠢᠳᠠᠭ ᠭᠦᠨᠳᠤᠳᠤ ᠤᠷᠤᠨ ᠵᠦᠭ ᠨᠢ ᠬᠤᠶᠢᠳᠤ ᠵᠦᠭ ᠶᠤᠮ᠃ ᠭᠡᠳᠡᠯ᠎ᠡ ᠮᠤᠩᠭᠤᠯᠴᠤᠳ ᠤᠨ ᠭᠡᠷ ᠤᠨ ᠪᠠᠷᠠᠭᠤᠨ ᠬᠤᠶᠢᠳᠤ ᠳᠠᠯ᠎ᠠ ᠳᠠᠬᠢᠳᠠᠭ ᠤᠨ ᠤᠴᠢᠷ ᠎ ᠨᠢ᠂ ᠮᠠᠨ ᠤ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠨᠢ ᠪᠠᠷᠠᠭᠤᠨ ᠬᠤᠶᠢᠳᠤ ᠳᠠᠯ᠎ᠠ ᠶᠢ ᠤᠤᠯ ᠤᠨ ᠳᠡᠭᠡᠳᠦᠯᠡᠵᠤ᠂ ᠡᠪᠦᠭᠡ ᠳᠡᠭᠡᠳᠤ ᠶᠢᠨ ᠢᠶᠠᠨ ᠰᠦᠯᠳᠡ ᠰᠢᠳᠦᠭᠡᠨ ᠢᠶᠠᠨ ᠳᠠᠬᠢᠳᠠᠭ ᠭᠦᠨᠳᠤᠳᠤ ᠤᠷᠤᠨ ᠪᠠᠶᠢᠭᠰᠠᠨ ᠠᠴᠠ ᠢᠷᠡᠯᠳᠠᠢ᠃ ᠪᠠᠭᠠᠷᠢᠨᠴᠤᠳ ᠤᠨ ᠪᠠᠷᠠᠭᠤᠨ ᠭᠠᠵᠠᠷ ᠠᠴᠠ ᠵᠠᠯᠠᠵᠤ ᠢᠷᠡᠭᠰᠡᠨ ᠪᠤᠷᠬᠠᠨ ᠱᠠᠰᠢᠨ ᠨᠢ ᠮᠤᠩᠭᠤᠯ ᠭᠡᠷ ᠲᠤ ᠳᠠᠬᠢᠭᠳᠠᠵᠤ ᠪᠤᠯᠤᠭᠰᠠᠨ ᠨᠢ ᠪᠤᠳᠤᠪᠠᠯ ᠭᠤᠷᠪᠠᠨ ᠵᠠᠭᠤᠨ ᠤᠨ ᠤ ᠯᠡ ᠭᠡᠷᠡᠭ᠃ ᠮᠤᠩᠭᠤᠯᠴᠤᠳ ᠤᠨ ᠤᠤᠭᠠᠨ ᠱᠠᠰᠢᠨ ᠪᠦᠭᠡ ᠮᠦᠷᠭᠦᠯ ᠨᠢ ᠪᠤᠷᠬᠠᠨ ᠱᠠᠰᠢᠨ ᠢᠶᠠᠷ ᠤᠷᠤᠯᠠᠭᠳᠠᠭᠰᠠᠨ ᠪᠤᠯᠪᠠᠴᠤ ᠮᠤᠩᠭᠤᠯ ᠤᠨ ᠳᠤᠳᠤᠷᠠᠬᠢ ᠡᠮᠬᠢ ᠵᠠᠮᠪᠠᠷᠠᠭ᠎ᠠ᠂ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠤᠨ ᠳᠠᠯᠪᠢᠬᠤ ᠤᠷᠤᠨ ᠪᠠᠶᠢᠷᠢ ᠶᠢᠨ ᠳᠤᠭᠳᠠᠭᠰᠠᠨ ᠤᠯᠠᠮᠵᠢᠯᠠᠯᠳᠤ ᠶᠤᠰᠤ ᠵᠢᠷᠦᠮ ᠳᠠᠳᠬᠠᠯ ᠨᠢ ᠪᠠᠰᠠ ᠳᠡᠷᠡ ᠭᠡᠪ ᠢᠶᠠᠷ ᠢᠶᠠᠨ ᠪᠠᠶᠢᠵᠠᠢ᠃     ᠮᠤᠩᠭᠤᠯ ᠭᠡᠷ ᠤᠨ ᠬᠤᠶᠢᠳᠤ ᠳᠠᠯ᠎ᠠ ᠳᠤ ᠤᠷᠤᠨ ᠰᠢᠷᠡᠭᠡ ᠭᠡᠵᠤ ᠪᠤᠷᠬᠠᠨ ᠰᠢᠷᠡᠭᠡ ᠪᠤᠯᠤᠨ ᠵᠡᠭᠦᠨ ᠬᠤᠶᠢᠳᠤ ᠬᠠᠨ᠎ᠠ ᠶᠢ ᠳᠠᠭᠠᠭᠤᠯᠤᠨ ᠳᠠᠯᠪᠢᠭᠰᠠᠨ ᠠᠪᠳᠠᠷ᠎ᠠ ᠶᠢᠨ ᠬᠤᠭᠤᠷᠤᠨᠳᠤ ᠪᠠᠶᠢᠳᠠᠭ᠃ ᠤᠷᠤᠨ ᠰᠢᠷᠡᠭᠡ ᠶᠢ ᠤᠯᠠᠩᠬᠢ ᠎ ᠳᠠᠭᠠᠨ ᠡᠭᠦᠳᠡ ᠡᠷᠦᠭᠡ ᠪᠤᠰᠬᠠᠵᠤ᠂ ᠠᠷᠠᠯ ᠦᠢᠯᠡᠰ ᠡᠬᠢᠯᠡᠵᠤ ᠭᠠᠯ ᠭᠤᠯᠤᠮᠳᠠ ᠡᠭᠦᠰᠭᠡᠮᠡᠭᠴᠡ ᠭᠡᠯᠬᠢᠵᠤ ᠳᠠᠯᠪᠢᠳᠠᠭ ᠃ ᠤᠷᠤᠨ ᠰᠢᠷᠡᠭᠡ ᠶᠢᠨ ᠪᠠᠶᠢᠳᠠᠯ ᠨᠢ ᠡᠷᠳᠡᠨ ᠤ ᠢᠷᠦᠭᠡᠯ ᠮᠠᠭᠳᠠᠭᠠᠯ ᠳᠤ ᠪᠠᠶᠢᠳᠠᠭᠴᠢᠯᠠᠨ ︽ᠨᠠᠷᠠᠰᠤᠨ ᠮᠤᠳᠤ ᠤᠷᠠᠯᠠᠵᠤ ᠬᠢᠭᠰᠡᠨ᠂ ᠨᠠᠷᠢᠨ ᠰᠠᠶᠢᠬᠠᠨ ᠰᠠᠶᠢᠯᠵᠤ ᠬᠢᠭᠰᠡᠨ᠂ ᠪᠤᠳᠠ ᠴᠡᠴᠡᠭ ᠤᠨ ᠰᠡᠭᠡᠭᠡ ᠲᠠᠢ᠂ ᠪᠤᠰᠤᠭ᠎ᠠ ᠵᠢᠭᠠᠰᠤᠨ ᠬᠤᠸᠠᠷ ᠲᠠᠢ᠂ ᠳᠤᠯᠢ ᠮᠦᠩᠭᠦᠨ ᠨᠢᠭᠤᠷ ᠲᠠᠢ᠂ ᠳᠤᠪᠤᠷᠤᠤ ᠳᠠᠪ ᠤᠨ ᠴᠢᠮᠡᠭ ᠲᠠᠢ᠂ ᠠᠴᠢᠳᠤ ᠳᠦᠷᠪᠡᠨ ᠭᠦᠯ ᠲᠠᠢ ᠂ ᠠᠷᠤ ᠳᠠᠯ᠎ᠠ ᠪᠠᠷ ᠢᠶᠠᠨ ᠳᠦᠰᠢᠯᠭᠡ ᠲᠠᠢ︾ ᠰᠢᠷᠡᠭᠡ ᠪᠠᠶᠢᠳᠠᠭ᠃ ᠡᠨᠡ ᠤᠷᠤᠨ ᠰᠢᠷᠡᠭᠡᠨ ᠤ ᠳᠠᠭᠠᠷᠠᠭᠤᠯᠤᠭᠰᠠᠨ ᠭᠤᠷᠪᠠᠨ ᠶᠠᠩᠵᠤ ᠶᠢᠨ ᠬᠤᠤᠰ ᠡᠮᠵᠢᠶᠡᠷᠳᠠᠢ ᠭᠤᠶᠢᠳᠠ ᠰᠠᠶᠢᠬᠠᠨ ᠬᠠᠳᠬᠤᠮᠠᠯ ᠲᠠᠢ᠂ ᠭᠤᠳᠤᠰ ᠰᠢᠷᠢᠳᠡᠭ ᠢ ᠭᠡᠳᠦᠨ ᠳᠠᠪᠬᠤᠷ ᠳᠡᠪᠢᠰᠦᠭᠡᠳ ᠳᠡᠪᠡᠯ ᠬᠤᠪᠴᠠᠰᠤ ᠭᠦᠨᠵᠢᠯᠡ ᠳᠡᠪᠢᠰᠭᠡᠷ ᠢᠶᠠᠨ ᠬᠤᠷᠢᠶᠠᠳᠠᠭ ᠶᠤᠮ᠃ ᠤᠷᠤ ᠪᠠᠷᠠᠭ᠎ᠠ ᠪᠠᠨ ᠬᠤᠷᠢᠶᠠᠬᠤ ᠳᠠᠭᠠᠨ ᠳᠡᠪᠡᠯ ᠳᠡᠷᠯᠢᠭ ᠤᠨ ᠵᠠᠭᠠᠮ᠎ᠠ ᠶᠢ ᠵᠠᠪᠠᠯ ᠪᠠᠷᠠᠭᠤᠨᠰᠢ ᠪᠤᠷᠬᠠᠨ ᠰᠢᠷᠡᠭᠡᠨ ᠤ ᠦᠭᠡᠳᠡ ᠬᠠᠨᠳᠤᠭᠤᠯᠵᠤ᠂ ᠳᠡᠪᠡᠯ ᠤᠨ ᠡᠩᠭᠡᠷ ᠢ ᠳᠡᠭᠡᠳᠤ ᠳᠠᠯ᠎ᠠ ᠳᠤᠨᠢ ᠭᠠᠷᠭᠠᠵᠤ᠂ ᠪᠦᠰᠡᠳᠠᠢ ᠶᠢᠨ ᠬᠢᠨ ᠤ ᠬᠤᠪᠴᠠᠰᠤ ᠶᠢ ᠳᠡᠭᠡᠷ᠎ᠡ ᠳᠠᠯ᠎ᠠ ᠳᠤᠨᠢ ᠬᠤᠷᠢᠶᠠᠨ ᠪᠦᠰᠡᠭᠦᠢ ᠶᠢᠨ ᠬᠢᠨ ᠤ ᠬᠤᠪᠴᠠᠰᠤ ᠬᠤᠨᠠᠷ ᠢ ᠳᠤᠤᠷ᠎ᠠ ᠳᠠᠯ᠎ᠠ ᠳᠤᠨᠢ ᠬᠤᠷᠢᠶᠠᠳᠠᠭ᠃      ᠮᠤᠩᠭᠤᠯ ᠭᠡᠷ ᠤᠨ ᠵᠡᠭᠦᠨ ᠬᠠᠶᠠᠭᠠᠨ ᠳᠤ ᠬᠤᠷᠭᠤ ᠡᠷᠬᠢᠨᠡᠭ ᠳᠠᠯᠪᠢᠳᠠᠭ᠃ ᠬᠤᠷᠭᠤ ᠡᠷᠬᠢᠨᠡᠭ ᠲᠤ ᠭᠡᠳᠦᠨ ᠳᠠᠮᠵᠢᠭᠤᠷᠭ᠎ᠠ ᠳᠤᠬᠢᠷᠠᠭᠤᠯᠵᠤ ᠪᠠᠭᠳᠠᠭᠠᠮᠵᠢ ᠶᠢ ᠨᠢ ᠨᠡᠮᠡᠭᠳᠡᠭᠦᠯᠦᠨ᠂ ᠠᠶᠠᠭ᠎ᠠ ᠱᠠᠵᠠᠩ᠂ ᠳᠤᠭᠤᠭ᠎ᠠ ᠰᠢᠨᠠᠭ᠎ᠠ᠂ ᠰᠠᠪᠠ ᠰᠠᠭᠤᠯᠭ᠎ᠠ᠂ ᠰᠦ ᠰᠠᠭᠠᠯᠢ ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠵᠦᠢᠯ ᠢᠶᠠᠨ ᠳᠠᠯᠪᠢᠳᠠᠭ᠃ ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠵᠦᠢᠯ ᠎ ᠢ ᠬᠤᠷᠭᠤ ᠡᠷᠬᠢᠨᠡᠭ ᠳᠡᠭᠡᠷ᠎ᠡ ᠳᠠᠯᠪᠢᠬᠤ ᠳᠠᠭᠠᠨ ᠪᠦᠷ ᠴᠦ ᠶᠤᠰᠤ ᠵᠢᠷᠦᠮ ᠲᠠᠢ᠃ ᠤᠯᠠᠭᠠᠨ ᠢᠳᠡᠭᠡ᠂ ᠴᠠᠭᠠᠨ ᠢᠳᠡᠭᠡ᠂ ᠤᠰᠤ ᠴᠠᠰᠤ ᠶᠢ ᠬᠤᠯᠢᠵᠤ ᠳᠠᠯᠪᠢᠳᠠᠭ ᠦᠭᠡᠢ᠃ ᠨᠡᠩ ᠴᠦ ᠰᠦ ᠴᠠᠭ᠎ᠠ ᠪᠤᠯᠤᠨ ᠮᠢᠬ᠎ᠠ ᠱᠦᠯᠦ ᠶᠢ ᠴᠤᠭ ᠳᠠᠯᠪᠢᠳᠠᠭ ᠦᠭᠡᠢ᠃      ᠮᠤᠩᠭᠤᠯ ᠭᠡᠷ ᠤᠨ ᠪᠠᠷᠠᠭᠤᠨ ᠡᠮᠦᠨᠡᠭᠦᠷ ᠮᠤᠷᠢᠨ ᠤ ᠡᠳ᠋ᠯᠡᠯ ᠢ ᠳᠠᠯᠪᠢᠳᠠᠭ᠃ ᠢᠩᠬᠢᠭᠦ ᠳᠡᠭᠡᠨ ᠡᠯᠭᠦᠭᠦᠷ ᠵᠤᠬᠢᠶᠠᠵᠤ᠂ ᠮᠤᠷᠢᠨ ᠤ ᠨᠤᠭᠳᠤ ᠬᠠᠵᠠᠭᠠᠷ᠂ ᠳᠠᠰᠢᠭᠤᠷ ᠴᠢᠳᠦᠷ ᠵᠡᠷᠭᠡ ᠶᠢ ᠡᠯᠭᠦᠨ᠎ᠡ᠃ ᠡᠯᠭᠦᠭᠦ ᠳᠡᠭᠡᠨ ᠬᠠᠵᠠᠭᠠᠷ ᠨᠤᠭᠳᠤ ᠶᠢᠨ ᠵᠢᠯᠤᠭᠤ ᠴᠤᠯᠪᠤᠭᠤᠷ ᠢ ᠠᠪᠴᠤ ᠭᠠᠷᠬᠤ ᠮᠠᠶ᠋ᠢᠭ ᠢᠶᠠᠷ ᠰᠠᠶᠢᠬᠠᠨ ᠡᠪᠭᠡᠭᠡᠳ ᠬᠠᠮᠠᠷ ᠢ ᠨᠢ ᠭᠤᠯᠤᠮᠳᠠ ᠤᠷᠤᠭᠤ ᠬᠠᠨᠳᠤᠭᠤᠯᠤᠨ᠎ᠠ᠃ ᠴᠢᠳᠦᠷ ᠢ ᠡᠯᠭᠦᠭᠦ ᠳᠡᠭᠡᠨ ᠳᠡᠭᠡᠭ ᠢ ᠨᠢ ᠳᠡᠭᠡᠭᠡᠭᠯᠡᠭᠡᠳ ᠡᠮᠦᠨ᠎ᠡ ᠬᠠ ᠪᠠᠷ ᠨᠢ ᠠᠯᠠᠭ᠎ᠠ ᠎ ᠶᠢ ᠨᠢ ᠬᠤᠶᠢᠰᠢ ᠬᠠᠨᠳᠤᠭᠤᠯᠤᠨ ᠡᠯᠭᠦᠳᠡᠭ ᠶᠤᠰᠤᠳᠠᠢ᠃ ᠡᠮᠡᠭᠡᠯ ᠢ ᠳᠠᠯᠪᠢᠬᠤ ᠳᠠᠭᠠᠨ ᠡᠮᠦᠨ᠎ᠡ ᠪᠦᠭᠦᠷᠭᠡ ᠶᠢ ᠨᠢ ᠵᠠᠪᠠᠯ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠵᠤ᠂ ᠰᠠᠭᠤᠳᠠᠯ ᠳᠠᠯ᠎ᠠ ᠶᠢ ᠨᠢ ᠪᠤᠷᠬᠠᠨ ᠰᠢᠳᠦᠭᠡᠨ ᠤ ᠵᠦᠭ ᠬᠠᠨᠳᠤᠭᠤᠯᠤᠨ ᠳᠠᠯᠪᠢᠨ᠎ᠠ᠃ ᠭᠡᠷᠪᠡ ᠬᠠᠵᠠᠭᠠᠷ᠂ ᠴᠢᠳᠦᠷ᠂ ᠨᠤᠭᠳᠤ᠂ ᠳᠠᠰᠢᠭᠤᠷ ᠢ ᠨᠢ ᠰᠠᠯᠭᠠᠬᠤ ᠦᠭᠡᠢ ᠴᠤᠭ ᠲᠤᠨᠢ ᠳᠠᠯᠪᠢᠪᠠᠯ ᠬᠠᠵᠠᠭᠠᠷ ᠨᠤᠭᠳᠤ ᠶᠢ ᠨᠢ ᠡᠮᠦᠨ᠎ᠡ ᠪᠦᠭᠦᠷᠭᠡᠨ ᠳᠤᠨᠢ ᠡᠯᠭᠦᠭᠡᠳ ᠵᠦᠪ ᠳᠠᠯ᠎ᠠ ᠶᠢᠨ ᠭᠦᠯᠢᠮ ᠢ ᠨᠢ ᠳᠠᠭᠠᠭᠤᠯᠵᠤ ᠡᠯᠭᠦᠨ᠎ᠡ᠃ ᠴᠢᠳᠦᠷ ᠢ ᠨᠢ ᠡᠮᠡᠭᠡᠯ ᠤᠨ ᠪᠤᠷᠤᠭᠤ ᠳᠠᠯ᠎ᠠ ᠶᠢᠨ ᠭᠠᠨᠵᠤᠭᠠᠨ ᠤ ᠭᠤᠭᠴᠤᠭ᠎ᠠ ᠳᠤ ᠡᠯᠭᠦᠨ᠎ᠡ᠂ ᠬᠠᠷᠢᠨ ᠵᠦᠭ ᠳᠠᠯ᠎ᠠ ᠎ ᠳᠤ ᠭᠠᠨᠵᠤᠭᠠᠯᠠᠬᠤ ᠶᠢ ᠴᠡᠭᠡᠷᠯᠡᠳᠡᠭ᠃ ᠮᠤᠩᠭᠤᠯ ᠭᠡᠷ ᠤᠨ ᠪᠠᠷᠠᠭᠤᠨ ᠡᠮᠦᠨ᠎ᠡ ᠬᠠᠭᠠᠯᠭ᠎ᠠ ᠶᠢᠨ ᠠᠷᠤ ᠳᠤ ᠶᠡᠷᠦᠨᠢ ᠶᠠᠭᠤᠮ᠎ᠠ ᠳᠠᠯᠪᠢᠳᠠᠭ ᠦᠭᠡᠢ᠃ ᠡᠭᠦᠳᠡᠨ ᠵᠠᠢ ᠳᠤ ᠱᠠᠯᠠ ᠳᠠᠪᠢᠰᠴᠤ ᠶᠠᠭᠤᠮ᠎ᠠ ᠭᠡᠤᠮ᠎ᠡ ᠳᠠᠯᠪᠢᠳᠠᠭ ᠦᠭᠡᠢ᠃      ᠪᠠᠭᠠᠷᠢᠨᠴᠤᠳ ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠠᠵᠤ ᠠᠮᠢᠳᠤᠷᠠᠯᠭ᠎ᠠ ᠬᠢᠵᠤ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠠᠩᠬ᠎ᠠ ᠠᠯᠬᠤᠮ ᠨᠠᠮᠤᠭ ᠳᠠᠷᠢᠶ᠎ᠠ ᠳᠠᠷᠢᠬᠤ ᠪᠤᠯᠵᠤ᠂ ᠠᠮᠤ ᠭᠦᠨᠡᠰᠤ ᠬᠤᠷᠢᠶᠠᠵᠤ ᠨᠦᠭᠡᠴᠡᠯᠡᠭᠦ ᠪᠤᠯᠤᠭᠰᠠᠨ ᠠᠴᠠ ᠬᠤᠶᠢᠰᠢ ᠪᠤᠷᠭᠠᠰᠤ ᠎ ᠪᠠᠷ ᠪᠦᠮᠪᠦᠭᠡᠷ ᠭᠡᠯᠪᠡᠷᠢᠳᠠᠢ ᠭᠡᠷ ᠢ ᠡᠭᠦᠳᠴᠤ᠂ ᠡᠪᠦᠯᠵᠢᠶ᠎ᠡ ᠭᠡᠮᠡᠨ ᠨᠡᠷᠡᠶᠢᠳᠴᠠᠢ᠃ ᠡᠪᠦᠭᠡᠳ ᠨᠠᠰᠤᠳᠠᠨ ᠨᠠᠷ ᠡᠨᠡᠭᠦ ᠡᠪᠦᠯᠵᠢᠶ᠎ᠡ ᠶᠢᠨ ᠰᠠᠭᠤᠷᠢᠨ ᠳᠤ ᠳᠤᠯᠠᠭᠠᠪᠳᠤᠷ ᠡᠪᠦᠯᠵᠢᠵᠤ᠂ ᠡᠪᠡᠰᠤ ᠡᠬᠢᠯᠡᠨ ᠨᠦᠭᠡᠴᠡᠯᠡᠨ᠂ ᠪᠤᠷᠭᠠᠰᠤ ᠨᠠᠶᠢᠯᠵᠠᠭᠤᠷ ᠎ ᠢᠶᠠᠷ ᠳᠦᠭᠦᠮ ᠳᠦᠳᠡ ᠬᠠᠰᠢᠶ᠎ᠠ ᠰᠠᠷᠠᠪᠴᠢ ᠪᠤᠰᠬᠠᠨ ᠡᠪᠦᠯ ᠬᠠᠪᠤᠷ ᠤᠨ ᠬᠠᠬᠢᠷ ᠭᠦᠢᠳᠡᠨ ᠤᠯᠠᠷᠢᠯ ᠳᠤ ᠮᠠᠯ ᠠᠬᠤᠢ ᠎ ᠪᠠᠨ ᠰᠠᠶᠢᠨ ᠰᠠᠶᠢᠬᠠᠨ ᠤᠨ ᠳᠤ ᠤᠷᠤᠭᠤᠯᠬᠤ ᠠᠷᠠᠯ ᠪᠠᠷᠢᠯ ᠲᠠᠢ ᠪᠤᠯᠤᠭᠰᠠᠨ ᠶᠤᠮ᠃ ᠡᠨᠡ ᠨᠢ ᠪᠠᠭᠠᠷᠢᠨᠴᠤᠳ ᠤᠨ ᠤᠷᠤᠨ ᠰᠠᠭᠤᠴᠠ ᠳᠤ ᠭᠠᠷᠤᠭᠰᠠᠨ ᠪᠠᠰᠠ ᠨᠢᠭᠡ ᠬᠤᠪᠢᠷᠠᠯᠳᠠ ᠪᠤᠯᠬᠤ ᠶᠤᠮ᠃ ᠡᠨᠡ ᠵᠠᠭᠤᠨ  ᠎ ᠤ ᠳᠦᠷᠦᠭᠦᠴᠢ ᠪᠤᠯᠳᠠᠯ᠎ᠠ ᠪᠠᠭᠠᠷᠢᠨᠴᠤᠳ ᠡᠶᠢᠮᠦᠷᠭᠦ ᠤᠷᠤᠨ ᠰᠠᠭᠤᠴᠠ ᠶᠢ ᠡᠭᠦᠳᠦᠨ ᠳᠡᠯᠭᠡᠷᠡᠭᠦᠯᠵᠤ᠂ ᠡᠪᠦᠯ ᠳᠡᠭᠡᠨ ᠰᠠᠭᠤᠷᠢᠰᠢᠵᠤ᠂ ᠬᠠᠪᠤᠷ ᠵᠤᠨ ᠨᠠᠮᠤᠷ ᠤᠳᠤᠷᠯᠠᠵᠤ ᠪᠠᠶᠢᠪᠠ᠃ ᠡᠨᠡᠭᠦ ᠡᠪᠥᠯᠵᠢᠶ᠎ᠡ᠂ ᠬᠠᠪᠤᠷᠵᠢᠶ᠎ᠠ᠂ ᠵᠤᠰᠠᠯᠠᠩ᠂ ᠨᠠᠮᠤᠷᠵᠢᠶ᠎ᠠ ᠵᠡᠷᠭᠡ ᠶᠢᠨ ᠤᠯᠠᠷᠢᠯ ᠢ ᠳᠠᠭᠠᠵᠤ ᠤᠷᠤᠨ ᠰᠠᠭᠤᠴᠠ ᠪᠠᠨ ᠳᠤᠬᠢᠷᠠᠭᠤᠯᠤᠨ ᠠᠵᠤ ᠳᠦᠷᠦᠨ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠨᠢ ᠪᠠᠷᠤᠭ ᠡᠨᠡ ᠵᠠᠭᠤᠨ ᠤ ᠳᠦᠴᠢᠭᠡᠳ ᠤᠨ ᠪᠤᠯᠳᠠᠯ᠎ᠠ ᠪᠠᠭᠠᠷᠢᠨ ᠤ ᠬᠤᠶᠢᠳᠤ ᠪᠡᠶ᠎ᠡ ᠶᠢᠨ ᠰᠤᠪᠤᠷᠭ᠎ᠠ ᠰᠤᠮᠤ ᠤᠷᠴᠢᠮ ᠤᠨ ᠮᠠᠯᠴᠢᠳ ᠨᠢ ᠵᠤᠨ ᠳᠠᠭᠠᠨ ᠡᠪᠡᠰᠤ ᠪᠡᠯᠴᠢᠭᠡᠷ ᠰᠠᠶᠢᠳᠠᠢ ᠰᠠᠶᠢᠬᠠᠨ ᠬᠠᠨ ᠠᠭᠤᠯᠠ ᠶᠢᠨ ᠬᠤᠷᠮᠤᠢ ᠪᠠᠷ ᠵᠤᠰᠠᠵᠤ᠂ ᠮᠠᠯ ᠤᠨᠤᠭ᠎ᠠ ᠪᠠᠨ ᠭᠦᠴᠦ ᠳᠠᠷᠭᠤ ᠲᠠᠢ ᠠᠳᠤᠭᠤᠯᠠᠵᠤ ᠪᠠᠶᠢᠵᠠᠢ᠃      ᠪᠠᠭᠠᠷᠢᠨ ᠤ ᠸᠠᠩ ᠭᠦᠩ᠂ ᠪᠠᠶᠠᠳ ᠨᠤᠶᠠᠳ᠂ ᠳᠡᠭᠡᠳᠤ ᠳᠠᠪᠬᠤᠷᠭᠠᠳᠠᠨ ᠨᠠᠷ ᠡᠬᠢᠯᠡᠵᠤ ᠪᠠᠶᠢᠰᠢᠩ ᠪᠠᠷᠢᠯᠭ᠎ᠠ ᠪᠠᠷᠢᠵᠤ᠂ ᠰᠦᠮ᠎ᠡ ᠭᠡᠶᠢᠳ ᠴᠤᠭᠴᠠᠯᠠᠭᠰᠠᠨ ᠨᠢ ᠴᠢᠩ ᠭᠦᠷᠦᠨ ᠤ ᠡᠶᠡᠪᠡᠷ ᠵᠠᠰᠠᠭᠴᠢ ᠬᠠᠭᠠᠨ ᠤ ᠳᠠᠪᠤᠳᠤᠭᠠᠷ ᠤᠨ ᠎ ᠤ ᠰᠢᠷ᠎ᠠ ᠬᠤᠯᠤᠭᠠᠨ᠎ᠠ ᠵᠢᠯ ︵1648︶ ᠰᠡᠴᠡᠨ ᠳᠡᠭᠡᠳᠤ ᠤᠯᠤᠰ ᠭᠦᠷᠦᠨ ᠤ ᠶᠡᠭᠡ ᠭᠦᠩᠵᠤ ᠶᠢ ᠬᠤᠰᠢᠭᠤᠨ — ᠨᠢᠭᠡᠳᠦᠭᠡᠷ ᠦᠶ᠎ᠡ ᠶᠢᠨ ᠵᠠᠰᠠᠭ ᠨᠤᠶᠠᠨ — ᠳᠦᠷᠦ ᠶᠢᠨ ᠵᠢᠶᠦ᠋ᠨ ᠸᠠᠩ ᠰᠡᠪᠳᠡᠨ ᠳᠤ ᠪᠠᠭᠤᠯᠭᠠᠭᠰᠠᠨ ᠎ ᠠᠴᠠ ᠬᠤᠶᠢᠰᠢᠬᠢ ᠶᠢᠨ ᠤᠴᠢᠷ ᠪᠢᠯᠡ᠃ ᠰᠡᠴᠡᠨ ᠳᠡᠭᠡᠳᠤ ᠭᠦᠷᠦᠨ ᠭᠦᠩᠵᠤ ᠪᠠᠭᠠᠷᠢᠨ ᠳᠤ ᠢᠷᠡᠭᠦ ᠳᠡᠭᠡᠨ ᠭᠤᠷᠪᠠᠨ ᠵᠠᠭᠤᠨ ᠡᠷᠦᠭᠡ ᠢᠨᠵᠢ ᠮᠠᠨᠵᠤ᠂ ᠳᠠᠯᠠᠨ ᠬᠤᠶᠠᠷ ᠵᠦᠢᠯ ᠤᠨ ᠤᠷᠠᠴᠤᠳ ᠢ ᠳᠠᠭᠠᠭᠤᠯᠤᠨ ᠳᠦᠮᠡᠨ ᠯᠠᠩ ᠤᠨ ᠦᠪ ᠭᠦᠷᠦᠩᠭᠡ ᠲᠠᠢ ᠢᠷᠡᠵᠠᠢ᠃ ᠰᠡᠴᠡᠨ ᠳᠡᠭᠡᠳᠤ ᠭᠦᠷᠦᠨ ᠭᠦᠩᠵᠤ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠢ ᠶᠡᠭᠡᠯ᠎ᠡ ᠰᠠᠨᠠᠭᠠᠴᠢᠯᠠᠳᠠᠭ ᠪᠤᠯᠬᠤᠷ ᠡᠩᠬᠡ ᠠᠮᠭᠤᠯᠠᠩ ᠬᠠᠭᠠᠨ ᠤ ᠵᠢᠷᠭᠤᠳᠤᠭᠠᠷ ᠤᠨ ︵1667︶᠎ ᠳᠤ ᠪᠠᠭᠠᠷᠢᠨ ᠤ ᠳᠦᠪ ᠪᠤᠯᠤᠭᠰᠠᠨ ᠶᠡᠭᠡ ᠪᠠᠶᠢᠰᠢᠩ ᠪᠠᠯᠭᠠᠰᠤᠨ ᠤ ᠪᠠᠷᠠᠭᠤᠨ ᠦᠵᠦᠭᠦᠷ ᠴᠠᠭᠠᠨᠮᠦ᠋ᠷᠡᠨ ᠭᠤᠤᠯ ᠤᠨ ᠬᠤᠶᠢᠳᠤ ᠭᠦᠪᠡᠭᠡᠨ ᠳᠡᠭᠡᠷ᠎ᠡ ᠳᠡᠭᠦᠰ ᠪᠦᠷᠢᠳᠭᠡᠯᠳᠤ ᠰᠦᠮ᠎ᠡ ᠶᠢ ᠴᠤᠭᠴᠠᠯᠠᠨ ᠪᠠᠶᠢᠭᠤᠯᠵᠠᠢ᠃ ᠡᠨᠡ ᠰᠦᠮ᠎ᠡ ᠶᠢᠨ ᠬᠠᠷᠰᠢ ᠳᠤᠭᠠᠩ ᠵᠠᠭᠤ ᠢᠯᠡᠭᠦᠦ ᠳᠠᠰᠤᠯᠭ᠎ᠠ ᠲᠠᠢ ᠪᠦᠭᠡᠳ ᠦᠵᠡᠮᠵᠢ ᠪᠠᠶᠢᠳᠠᠯ ᠤᠨᠴᠠ ᠰᠦᠷᠯᠢᠭ ᠶᠡᠭᠡᠮᠰᠦᠭ ᠪᠤᠯᠬᠤᠷ ᠳᠡᠭᠦᠨ ᠤ ᠸᠠᠭᠠᠷ ᠳᠤᠭᠤᠰᠬ᠎ᠠ ᠎ ᠶᠢᠨ ᠦᠩᠭᠡ ᠪᠠᠷ ᠨᠢ ᠮᠤᠩᠭᠤᠯᠴᠤᠳ ᠪᠠᠷᠠᠭᠤᠨ ᠭᠦᠭᠡ ᠭᠡᠷ ᠰᠦᠮ᠎ᠡ ᠭᠡᠵᠡᠭᠡᠳᠡᠭ᠃ ᠡᠨᠡᠭᠦ ᠰᠦᠮ᠎ᠡ ᠳᠡᠭᠡᠨ ᠪᠠᠷᠠᠭᠤᠨ ᠭᠠᠵᠠᠷ ᠭᠦᠭᠡᠨᠠᠭᠤᠷ ᠠᠴᠠ ᠡᠷᠳᠡᠨᠢᠭᠠᠪᠴᠤ ᠭᠡᠭᠴᠢ ᠯᠠᠮᠠ ᠶᠢ ᠵᠠᠯᠠᠨ ᠠᠪᠴᠢᠷᠠᠵᠤ ᠪᠠᠭᠠᠷᠢᠨ ᠤ ᠱᠠᠰᠢᠨ ᠤ ᠶᠡᠭᠡ ᠳᠦᠷᠦᠭᠦᠦ ᠪᠤᠯᠭᠠᠪᠠ᠃ ᠡᠨᠡ ᠰᠦᠮ᠎ᠡ ᠳᠤ ᠯᠠᠮᠠ ᠨᠠᠷ ᠡᠳᠦᠷ ᠢᠷᠡᠭᠦᠶ᠎ᠡ ᠤᠯᠠᠰᠢᠷᠠᠭᠰᠠᠨ ᠠᠴᠠ ᠰᠦᠮ᠎ᠡ ᠶᠢᠨ ᠬᠠᠵᠠᠭᠤ ᠳᠤ ᠰᠢᠪᠠᠷ ᠢᠶᠠᠷ ᠭᠡᠷ ᠪᠠᠷᠢᠵᠤ ᠯᠠᠮᠠ ᠨᠠᠷ ᠤᠨ ᠰᠠᠭᠤᠴᠠ ᠪᠤᠯᠭᠠᠪᠠ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠭᠦᠷᠦᠨ ᠭᠦᠩᠵᠤ ᠶᠢ ᠳᠠᠭᠠᠵᠤ ᠢᠷᠡᠭᠰᠡᠨ ᠭᠤᠷᠪᠠᠨ ᠵᠠᠭᠤᠨ ᠡᠷᠦᠭᠡ ᠢᠨᠵᠢ ᠮᠠᠨᠵᠤ ᠨᠢ ᠴᠦ ᠶᠡᠭᠡ ᠪᠠᠶᠢᠰᠢᠩ ᠤᠷᠴᠢᠮ ᠰᠢᠪᠠᠷ ᠭᠡᠷ ᠪᠠᠷᠢᠵᠤ ᠤᠷᠤᠨ ᠰᠠᠭᠤᠴᠠ ᠪᠠᠨ ᠳᠤᠬᠢᠷᠠᠭᠤᠯᠵᠠᠢ᠃ ᠡᠭᠦᠨ ᠤ ᠤᠯᠠᠮ ᠠᠴᠠ ᠪᠠᠭᠠᠷᠢᠨ ᠨᠤᠳᠤᠭ ᠲᠤ ᠸᠠᠭᠠᠷ ᠳᠤᠭᠤᠰᠬ᠎ᠠ ᠶᠢᠨ ᠪᠠᠶᠢᠰᠢᠩ ᠭᠡᠷ᠂ ᠳᠠᠷᠠᠰᠤᠨ ᠤᠷᠤᠢ ᠲᠠᠢ ᠪᠠᠶᠢᠰᠢᠩ ᠭᠡᠷ᠂ ᠰᠢᠪᠠᠷ ᠢᠶᠠᠷ ᠪᠤᠰᠬᠠᠭᠰᠠᠨ ᠪᠠᠶᠢᠰᠢᠩ ᠭᠡᠷ ᠡᠬᠢᠯᠡᠨ ᠳᠡᠯᠭᠡᠷᠡᠵᠤ ᠪᠢᠯᠡ᠃ ᠬᠤᠵᠢᠮ ᠨᠢ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠬᠤᠶᠠᠳᠤᠭᠠᠷ ᠦᠬᠢᠨ ᠦᠯᠡᠮᠵᠢ ᠭᠡᠮᠵᠢᠶᠡᠳᠤ ᠭᠦᠷᠦᠨ ᠭᠦᠩᠵᠤ ᠶᠢ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠭᠤᠴᠢᠨ ᠵᠢᠷᠭᠤᠳᠤᠭᠠᠷ ᠤᠨ ︵1697︶ — ᠤᠯᠠᠭᠴᠢᠨ ᠦᠭᠡᠷ ᠵᠢᠯ ᠤᠨ ᠵᠢᠷᠭᠤᠭᠠᠨ ᠰᠠᠷ᠎ᠠ ᠳᠤ ᠪᠠᠭᠠᠷᠢᠨ ᠤ ᠳᠦᠳᠦᠭᠡᠷ ᠦᠶ᠎ᠡ ᠶᠢᠨ ᠵᠠᠰᠠᠭ ᠳᠦᠷᠦ ᠶᠢᠨ ᠵᠢᠶᠦ᠋ᠨ ᠸᠠᠩ ᠰᠡᠴᠡᠨ ᠳᠡᠭᠡᠳᠤ ᠭᠦᠷᠦᠨ ᠭᠦᠩᠵᠤ ᠶᠢᠨ ᠳᠦᠷᠦᠭᠰᠡᠨ ᠤᠴᠢ ᠪᠤᠯᠬᠤ ᠦᠷᠭᠦᠨ ᠳᠤ ᠪᠠᠭᠤᠯᠭᠠᠨ ᠬᠤᠯᠪᠤᠵᠠᠢ᠃ ᠦᠯᠠᠮᠵᠢ ᠭᠡᠮᠵᠢᠶᠡᠳᠤ ᠭᠦᠷᠦᠨ ᠭᠦᠩᠵᠤ᠂ ᠢᠷᠭᠡᠨ ᠢ ᠮᠤᠩᠬᠠᠷᠠᠭᠤᠯᠬᠤ ᠳᠡᠭᠡᠳᠦᠰ ᠤᠨ ᠳᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠶᠢ ᠠᠪᠢᠶᠠᠰᠳᠠᠢ ᠪᠠᠷ ᠵᠠᠯᠭᠠᠮᠵᠢᠯᠠᠨ ᠪᠠᠭᠠᠷᠢᠨ ᠤ ᠮᠤᠩᠭᠤᠯᠴᠤᠳ ᠢ ᠦᠳᠦᠭᠡᠨ ᠠᠯᠪᠠᠳᠠᠵᠤ ᠪᠤᠷᠬᠠᠨ ᠱᠠᠰᠢᠨ ᠢ ᠶᠡᠭᠡᠪᠡᠷ ᠰᠢᠳᠦᠭᠦᠯᠦᠨ ᠪᠠᠷᠠᠭᠤᠨ ᠭᠦᠭᠡ ᠭᠡᠷ ᠰᠦᠮ᠎ᠡ ᠶᠢᠨ ᠭᠦᠷᠢᠶ᠎ᠡ ᠭᠡᠪᠴᠢᠶ᠎ᠡ ᠶᠢ ᠳᠠᠭᠤᠷᠢᠶᠠᠯᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠳᠦᠴᠢᠨ ᠳᠠᠪᠤᠳᠤᠭᠠᠷ ᠤᠨ ︵1706︶᠎ ᠳᠤ ᠶᠡᠭᠡ ᠪᠠᠶᠢᠰᠢᠩ ᠤᠨ ᠵᠡᠭᠦᠨ ᠡᠮᠦᠨ᠎ᠡ ᠶᠡᠭᠡ ᠭᠡᠮᠵᠢᠶᠡᠨ ᠤ ᠭᠦᠭᠡ ᠸᠠᠭᠠᠷ ᠤᠨ ᠤᠷᠤᠢ ᠲᠠᠢ ᠰᠦᠮ᠎ᠡ ᠪᠠᠶᠢᠭᠤᠯᠵᠤ ᠬᠤᠳᠠᠯᠠ ᠤᠨᠤᠯᠳᠤ ᠰᠦᠮ᠎ᠡ ᠭᠡᠮᠡᠪᠡ᠃ ᠪᠠᠰᠠ ᠰᠦᠮ᠎ᠡ ᠶᠢᠨ ᠵᠡᠭᠦᠨ ᠬᠠᠵᠠᠭᠤ ᠳᠤ ᠭᠡᠭᠡᠨ ᠰᠠᠩ᠂ ᠰᠦᠮ᠎ᠡ ᠶᠢᠨ ᠳᠤᠭᠤᠷᠢᠨ ᠳᠤ ᠯᠠᠮᠠ ᠨᠠᠷ ᠤᠨ ᠰᠠᠭᠤᠬᠤ ᠭᠠᠵᠠᠷ ᠬᠤᠶᠠᠷ ᠵᠠᠭᠤ ᠭᠠᠷᠤᠢ ᠪᠠᠶᠢᠰᠢᠩ ᠭᠡᠷ ᠪᠠᠷᠢᠭᠰᠠᠨ ᠳᠤᠯᠠ ᠯᠠᠮᠠ ᠬᠤᠸᠠᠷᠠᠭ ᠤᠯᠠᠰᠢᠷᠠᠵᠤ᠂ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠢ ᠰᠢᠳᠦᠭᠦ ᠭᠦᠮᠦᠨ ᠡᠳᠦᠷ ᠢᠷᠡᠭᠦᠶ᠎ᠡ ᠨᠡᠮᠡᠭᠳᠡᠭᠰᠡᠨ ᠪᠠᠶᠢᠨ᠎ᠠ᠃      ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠶᠠᠭ ᠰᠠᠶᠢᠬᠠᠨ ᠭᠠᠯᠳᠠᠨ ᠪᠤᠱᠤᠭᠳᠤ ᠶᠢᠨ ᠪᠤᠰᠤᠯᠭ᠎ᠠ ᠭᠠᠷᠴᠤ ᠴᠢᠩ ᠤᠯᠤᠰ ᠢ ᠡᠰᠡᠷᠭᠦᠴᠡᠵᠤ ᠪᠠᠶᠢᠭᠰᠠᠨ ᠪᠠ ᠵᠡᠭᠦᠨ ᠬᠤᠶᠢᠳᠤ ᠬᠢᠯᠢ ᠳᠠᠭᠠᠤ ᠴᠠᠭᠠᠨ ᠤᠷᠤᠰ ᠳᠦᠷᠢᠮᠡᠬᠡᠶᠢᠯᠡᠨ ᠬᠠᠯᠳᠠᠵᠤ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠴᠡᠷᠢᠭ ᠳᠠᠶᠢᠴᠢᠯᠠᠨ ᠭᠠᠯᠳᠠᠨ ᠪᠤᠱᠤᠭᠳᠤ ᠶᠢ ᠳᠠᠶᠢᠯᠠᠵᠤ ᠠᠷᠤ ᠭᠠᠵᠠᠷ ᠢᠶᠠᠷ ᠤᠯᠠᠨᠳᠠ ᠪᠠᠶᠢᠴᠠᠭᠠᠨ ᠶᠠᠪᠤᠭᠰᠠᠨ ᠪᠠᠶᠢᠵᠠᠢ᠃ ᠬᠠᠭᠠᠨ ᠤ ᠰᠠᠭᠤᠴᠠ ᠪᠠᠶᠢᠴᠠ ᠶᠢ ᠳᠦᠭᠦᠮ ᠢ ᠪᠤᠳᠤᠵᠤ᠂ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠳᠠᠪᠢᠳᠤᠭᠠᠷ ᠤᠨ ︵1711︶᠎ ᠳᠤ ᠳᠤᠳᠤᠷ᠎ᠠ ᠭᠠᠳᠠᠷ ᠭᠤᠷᠪᠠᠨ ᠭᠦᠷᠢᠶ᠎ᠡ ᠲᠠᠢ ᠦᠵᠡᠮᠵᠢ ᠪᠠᠶᠢᠳᠠᠯ ᠭᠤᠶᠤ ᠭᠡᠭᠡᠨᠴᠡᠷ ᠰᠦᠷᠯᠢᠭ ᠰᠠᠶᠢᠬᠠᠨ ᠬᠠᠭᠠᠨ ᠤ ︽ᠵᠢᠭᠤᠯᠴᠢᠯᠠᠯ ᠤᠨ ᠤᠷᠳᠤᠨ︾ — ᠸᠠᠭᠠᠷ ᠳᠤᠭᠤᠰᠬ᠎ᠠ ᠶᠢᠨ ᠶᠡᠭᠡ ᠪᠠᠶᠢᠰᠢᠩ ᠢ ᠪᠠᠶᠢᠭᠤᠯᠤᠨ ᠳᠠᠭᠤᠰᠬᠠᠵᠠᠢ᠃ ᠳᠤᠬᠠᠢ  ᠎ ᠶᠢᠨ ᠦᠶ᠎ᠡ ᠎ ᠨᠢ ᠶᠠᠭ ᠴᠢᠩ ᠤᠯᠤᠰ ᠪᠠᠳᠠᠷᠠᠨ ᠮᠠᠨᠳᠤᠵᠤ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠦᠯᠡᠮᠵᠢ ᠭᠡᠮᠵᠢᠶᠡᠳᠤ ᠭᠦᠷᠦᠨ ᠭᠦᠩᠵᠤ ᠪᠠᠭᠠᠷᠢᠨ ᠎ ᠳᠤ ᠮᠤᠷᠳᠠᠵᠤ ᠢᠷᠡᠭᠦ ᠳᠡᠭᠡᠨ ᠬᠤᠶᠠᠷ ᠵᠠᠭᠤᠨ ᠳᠦᠴᠢᠨ ᠡᠷᠦᠭᠡ ᠢᠨᠵᠢ ᠮᠠᠨᠵᠤ ᠳᠠᠭᠠᠭᠤᠯᠤᠨ ᠢᠷᠡᠵᠠᠢ᠃ ᠳᠡᠳᠡᠭᠡᠷ ᠎ ᠤᠨ ᠤᠯᠠᠩᠬᠢ ᠨᠢ ᠤᠷᠳᠤ ᠬᠠᠷᠰᠢ ᠪᠠᠶᠢᠭᠤᠯᠬᠤ ᠡᠯ᠎ᠡ ᠠᠵᠢᠯ ᠳᠦᠷᠦᠯ ᠤᠨ ᠤᠷᠠᠨ ᠮᠡᠷᠭᠡᠵᠢᠯᠳᠡᠨ ᠪᠤᠯᠬᠤᠷ ᠳᠡᠳᠡᠨᠠᠷ ᠎ ᠤᠨ ᠡᠭᠦᠳᠦᠨ ᠪᠠᠶᠢᠭᠤᠯᠤᠭᠰᠠᠨ ᠬᠤᠰᠢᠭᠤᠨ ᠵᠠᠰᠠᠭ ᠸᠠᠩ ᠤᠨ ᠤᠷᠳᠤᠨ᠂ ᠰᠦᠮ᠎ᠡ ᠭᠡᠶᠢᠳ ᠨᠢ ᠪᠦᠷ ᠴᠦ ᠮᠠᠰᠢ ᠰᠦᠷᠯᠢᠭ ᠦᠵᠡᠮᠵᠢᠳᠠᠢ ᠪᠠᠶᠢᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠢᠨᠵᠢ ᠨᠠᠷ ᠤᠨ ᠰᠠᠭᠤᠳᠠᠭ ᠭᠡᠷ ᠡᠷᠦᠭᠡ ᠨᠢ ᠴᠦᠮ ᠳᠤᠳᠤᠷ᠎ᠠ ᠭᠠᠵᠠᠷ ᠤᠨ ᠭᠡᠪ ᠶᠠᠩᠵᠤᠳᠠᠢ ᠸᠠᠭᠠᠷ ᠳᠤᠭᠤᠰᠬ᠎ᠠ ᠶᠢᠨ ᠪᠦᠳᠦᠴᠡ ᠲᠠᠢ ᠦᠨᠳᠦᠷ ᠰᠦᠷᠯᠢᠭ ᠵᠢᠭᠳᠡ ᠳᠡᠭᠰᠢ ᠭᠤᠳᠤᠮᠵᠢ ᠵᠡᠭᠡᠯᠢ ᠪᠤᠯᠤᠨ ᠪᠦᠷᠢᠯᠳᠦᠭᠡᠳ ᠤᠤᠯ ᠠᠴᠠ ᠪᠠᠨ ᠨᠡᠩ ᠴᠦ ᠶᠡᠭᠡᠳᠴᠤ᠂ ᠤᠯᠤᠰ ᠳᠦᠷᠦ ᠶᠢᠨ ᠳᠠᠯ᠎ᠠ ᠪᠠᠷ ᠪᠦᠭᠦ ᠬᠤᠰᠢᠭᠤ ᠶᠢ ᠵᠠᠬᠢᠷᠬᠤ ᠳᠦᠪ᠂ ᠱᠠᠰᠢᠨ ᠰᠤᠷᠳᠠᠬᠤᠨ ᠤ ᠳᠠᠯ᠎ᠠ ᠪᠠᠷ ᠮᠠᠰᠢ ᠴᠢᠬᠤᠯᠠ ᠰᠠᠭᠤᠷᠢᠨ ᠪᠤᠯᠵᠠᠢ᠃      ᠵᠠᠯᠭᠠᠭᠠᠳ ᠪᠠᠰᠠ ︽ᠨᠢᠶᠠᠩ ᠨᠢᠶᠠᠩ ᠤᠨ ᠰᠦᠮ᠎ᠡ︾᠂ ︽ᠢᠤᠢ ᠬᠤᠸᠠᠩ ᠤᠨ ᠰᠦᠮ᠎ᠡ︾ ᠭᠡᠭᠦ ᠵᠡᠷᠭᠡ ᠬᠢᠳᠠᠳ ᠮᠠᠶ᠋ᠢᠭ ᠤᠨ ᠰᠦᠮ᠎ᠡ ᠭᠡᠶᠢᠳ ᠢ ᠬᠤᠶᠢᠨ᠎ᠠ ᠬᠤᠶᠢᠨ᠎ᠠ ᠠᠴᠠ ᠨᠢ ᠪᠠᠶᠢᠭᠤᠯᠵᠠᠢ᠃ ᠡᠨᠡ ᠨᠢ ᠪᠠᠭᠠᠷᠢᠨ ᠨᠤᠳᠤᠭ ᠎ ᠲᠤ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠶᠡᠭᠡᠪᠡᠷ ᠳᠡᠯᠭᠡᠷᠡᠵᠤ ᠭᠦᠭᠵᠢᠭᠡᠳ ᠮᠤᠩᠭᠤᠯ ᠤᠨ ᠡᠷᠳᠡ ᠳᠡᠭᠡᠳᠤ ᠶᠢᠨ ᠰᠢᠳᠦᠭᠡᠨ — ᠪᠦᠭᠡ ᠶᠢᠨ ᠰᠤᠷᠳᠠᠬᠤᠨ ᠡᠴᠦᠰᠯᠡᠯ ᠤᠨ ᠱᠠᠳᠤᠨ ᠳᠤ ᠤᠷᠤᠭᠰᠠᠨ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠪᠠᠭᠠᠷᠢᠨ ᠨᠤᠳᠤᠭ ᠲᠤ ᠬᠢᠳᠠᠳ ᠳᠦᠪᠡᠳ ᠮᠠᠶ᠋ᠢᠭ ᠤᠨ ᠰᠦᠮ᠎ᠡ ᠭᠡᠶᠢᠳ᠂ ᠤᠷᠳᠤᠨ ᠬᠠᠷᠰᠢ᠂ ᠭᠡᠷ ᠪᠠᠶᠢᠰᠢᠩ ᠭᠦᠭᠵᠢᠨ ᠳᠡᠯᠭᠡᠷᠡᠵᠤ ᠪᠠᠶᠢᠬᠤ ᠶᠢ ᠳᠤᠰᠬᠠᠵᠤ᠂ ᠪᠠᠭᠠᠷᠢᠨ ᠨᠤᠳᠤᠭ ᠤᠨ ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠠᠮᠢᠳᠤᠷᠠᠯ ᠨᠢ ᠪᠠᠶᠢᠰᠢᠩᠵᠢᠬᠤ ᠦᠭᠡᠳᠡ ᠬᠠᠨᠳᠤᠵᠤ᠂ ᠰᠠᠭᠤᠷᠢᠰᠢᠬᠤ ᠶᠢᠨ ᠡᠬᠢᠯᠡᠯᠳᠡ ᠶᠢᠨ ᠦᠶ᠎ᠡ ᠪᠤᠯᠤᠭᠰᠠᠨ ᠢ ᠭᠡᠷᠡᠴᠢᠯᠡᠵᠤ ᠪᠠᠶᠢᠬᠤ ᠶᠤᠮ᠃      ᠪᠠᠭᠠᠷᠢᠨᠴᠤᠳ ᠤᠨ ᠤᠷᠤᠨ ᠰᠠᠭᠤᠴᠠ ᠶᠢᠨ ᠭᠦᠭᠵᠢᠯᠳᠡ ᠬᠤᠪᠢᠷᠠᠯᠳᠠ ᠪᠡ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠠᠷᠭ᠎ᠠ ᠪᠠᠷᠢᠯ ᠤᠨ ᠳᠡᠭᠡᠭᠰᠢᠯᠡᠯᠳᠡ ᠶᠢ ᠳᠠᠭᠠᠯᠳᠤᠨ ᠭᠡᠷ ᠤᠨ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠴᠦ ᠰᠡᠳᠬᠢᠭᠦᠢ ᠦᠭᠡᠢ ᠬᠤᠪᠢᠷᠠᠵᠠᠢ᠃ ᠪᠠᠭᠠᠷᠢᠨᠴᠤᠳ ᠤᠤᠯ ᠳᠠᠭᠠᠨ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠤ᠂ ᠠᠶᠠᠨ ᠵᠢᠩ ᠠᠪᠠ ᠭᠦᠷᠦᠭᠡ ᠬᠢᠵᠤ᠂ ᠠᠵᠤ ᠳᠦᠷᠦᠨ ᠠᠮᠢᠳᠤᠷᠠᠵᠤ ᠪᠠᠶᠢᠬᠤ ᠳᠠᠭᠠᠨ ᠮᠤᠩᠭᠤᠯ ᠭᠡᠷ᠂ ᠳᠠᠪᠤᠤ ᠮᠠᠶᠢᠬᠠᠨ ᠳᠤ ᠳᠤᠬᠢᠷᠠᠭᠰᠠᠨ ᠪᠦᠭᠡᠯᠢᠭ ᠠᠪᠰᠠᠷᠬᠠᠨ ᠪᠦᠭᠡᠳ ᠤᠯᠠᠨ ᠭᠡᠷᠡᠭᠴᠡᠭᠡᠳᠠᠢ᠂ ᠠᠴᠢᠶ᠎ᠠ ᠳᠡᠭᠡᠭᠡᠪᠦᠷᠢ ᠳᠤ ᠳᠦᠭᠦᠮ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠢ ᠪᠦᠷ ᠨᠤᠳᠤᠭ ᠤᠨ ᠭᠠᠷᠤᠯᠳᠠ ᠎ ᠳᠠᠭᠠᠨ ᠳᠦᠰᠢᠭᠯᠡᠨ ᠦᠢᠯᠡᠳᠴᠤ ᠪᠠᠶᠢᠵᠠᠢ᠃ ᠡᠭᠦᠨ ᠳᠤ ᠭᠤᠤᠯᠳᠠᠭᠤ ᠠᠯᠳᠠ ᠮᠦᠩᠭᠦ᠂ ᠵᠡᠰ ᠭᠠᠤᠯᠢ᠂ ᠴᠠᠶᠢᠷ ᠳᠤᠭᠤᠯᠭ᠎ᠠ᠂ ᠳᠡᠮᠦᠷ ᠰᠢᠷᠡᠮᠤ᠂ ᠠᠷᠠᠰᠤ ᠰᠢᠷᠢ᠂ ᠶᠠᠰᠤ ᠡᠪᠡᠷ᠂ ᠤᠩᠭᠠᠰᠤ ᠬᠢᠯᠭᠠᠰᠤ ᠪᠠ ᠮᠤᠳᠤ ᠴᠢᠯᠠᠭᠤ ᠭᠡᠭᠦ ᠮᠡᠳᠤ ᠶᠢᠨ ᠪᠠᠶᠢᠭᠠᠯᠢ ᠶᠢᠨ ᠭᠠᠷᠤᠯᠳᠠ ᠮᠠᠯ ᠤᠨ ᠠᠰᠢᠭ ᠰᠢᠮ᠎ᠡ ᠪᠠᠷ ᠳᠦᠭᠦᠭᠡᠢ ᠡᠳ᠋ ᠢᠶᠠᠨ ᠪᠤᠯᠭᠠᠵᠤ ᠪᠠᠶᠢᠳᠠᠭ᠃ ᠵᠢᠱᠢᠶᠡᠯᠡᠪᠡᠯ᠂ ᠠᠯᠳᠠ ᠮᠦᠩᠭᠦ ᠶᠢ ᠵᠡᠰᠠᠯ ᠴᠢᠮᠡᠰᠭᠡ ᠪᠡ ᠠᠶᠠᠭ᠎ᠠ ᠰᠠᠪᠬ᠎ᠠ᠂ ᠬᠢᠳᠤᠭ᠎ᠠ ᠢᠯᠳᠤ ᠵᠡᠷᠭᠡ ᠶᠢᠨ ᠨᠠᠷᠢᠯᠢᠭ ᠤᠷᠠᠯᠠᠯ ᠳᠤ ᠭᠡᠷᠡᠭᠯᠡᠵ᠂ ᠵᠡᠰ ᠭᠠᠤᠯᠢ ᠶᠢ ᠴᠠᠶᠢᠷ ᠳᠤᠭᠤᠯᠭ᠎ᠠ᠂ ᠳᠡᠮᠦᠷ ᠰᠢᠷᠠᠮᠤ ᠶᠢ ᠴᠠᠢ ᠶᠢᠨ ᠳᠠᠪᠤᠷ᠎ᠠ᠂ ᠠᠷᠢᠬᠢᠨ ᠬᠤᠪᠢᠩ᠂ ᠰᠠᠪᠠ ᠰᠠᠭᠤᠯᠭ᠎ᠠ ᠳᠤ ᠭᠡᠷᠡᠭᠯᠡᠵᠤ︔ ᠠᠷᠠᠰᠤ ᠰᠢᠷᠢ ᠪᠠᠷ ᠤᠭᠤᠳᠠ ᠰᠢᠭᠤᠳᠠᠢ᠂ ᠤᠰᠤᠨ ᠬᠤᠪᠤᠭᠤ ᠳᠤ ︔ ᠡᠪᠡᠷ ᠶᠠᠰᠤ ᠪᠠᠷ ᠫᠢᠯᠠ ᠬᠠᠯᠪᠠᠭ᠎ᠠ ᠳᠤ︔ ᠤᠩᠭᠠᠰᠤ ᠬᠢᠯᠭᠠᠰᠤ ᠪᠠᠷ ᠢᠰᠡᠭᠡᠢ ᠰᠢᠷᠢᠳᠡᠭ ᠲᠤ ᠭᠡᠷᠡᠭᠯᠡᠵᠤ ᠪᠠᠶᠢᠵᠠᠢ ᠃ ᠳᠡᠷᠡ ᠦᠶ᠎ᠡ ᠳᠤ ᠪᠠᠭᠠᠷᠢᠨᠴᠤᠳ ᠤᠨ ᠭᠡᠷ ᠭᠦᠷᠢᠶ᠎ᠡ ᠶᠢᠨ ᠪᠠᠶᠢᠳᠠᠯ ᠭᠡᠪᠡᠯ ᠳᠤᠩ ᠳᠦᠭᠦᠮ ᠪᠠᠶᠢᠪᠠ᠃ ᠳᠡᠳᠡ ᠤᠳᠤᠷᠯᠠᠨ ᠮᠠᠯᠯᠠᠵᠤ ᠪᠠᠶᠢᠬᠤ ᠳᠠᠭᠠᠨ ᠬᠠᠩᠭᠠᠢ ᠳᠡᠷᠭᠡ ᠪᠠᠷ ᠢᠶᠠᠨ ᠬᠠᠯᠬᠠᠪᠴᠢ ᠪᠤᠯᠭᠠᠵᠤ ᠬᠠᠨᠳᠤᠭᠰᠠᠨ ᠡᠪᠡᠰᠤ ᠪᠠᠨ ᠭᠤᠤ ᠭᠠᠩᠭ᠎ᠠ ᠶᠢᠨ ᠬᠠᠵᠠᠭᠤ ᠳᠤ ᠤᠨᠠᠭᠤᠯᠢ ᠮᠠᠯᠳᠠᠨ ᠬᠤᠷᠢᠶᠠᠳᠠᠭ ᠪᠠᠶᠢᠵᠠᠢ᠃ ᠡᠶᠢᠮᠦ ᠪᠤᠯᠬᠤᠷ ᠭᠡᠷ ᠳᠡᠷᠭᠡ ᠬᠠᠰᠢᠶ᠎ᠠ ᠭᠦᠷᠢᠶ᠎ᠡ ᠨᠢ ᠳᠤᠩ ᠳᠦᠭᠦᠮ ᠶᠤᠮ᠃ ᠰᠠᠭᠤᠷᠢᠰᠢᠨ ᠨᠤᠳᠤᠭᠯᠠᠵᠤ᠂ ᠤᠳᠤᠷᠯᠠᠨ ᠵᠤᠰᠠᠵᠤ ᠮᠠᠯᠯᠠᠳᠠᠭ ᠪᠤᠯᠤᠭᠰᠠᠨ ᠠᠴᠠ ᠢᠨᠠᠭᠰᠢ᠂ ᠢᠯᠠᠩᠭᠤᠶ᠎ᠠ ᠰᠠᠭᠤᠷᠢᠰᠢᠭᠰᠠᠨ ᠠᠴᠠ ᠢᠨᠠᠭᠰᠢ ᠭᠡᠷ ᠳᠡᠷᠭᠡ᠂ ᠪᠠᠶᠢᠰᠢᠩ ᠪᠠᠷᠢᠯᠭ᠎ᠠ᠂ ᠬᠠᠰᠢᠶ᠎ᠠ ᠭᠦᠷᠢᠶ᠎ᠡ᠂ ᠭᠡᠷ ᠤᠨ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠢ ᠪᠠᠭᠠᠷᠢᠨᠴᠤᠳ ᠳᠤᠩ ᠠᠩᠬᠠᠷᠬᠤ ᠪᠤᠯᠵᠤ ᠪᠢᠯᠡ᠃ ᠳᠡᠷᠡᠴᠢᠯᠡᠨ ᠠᠶᠢᠯ ᠤᠨ ᠬᠠᠰᠢᠶ᠎ᠠ ᠭᠦᠷᠢᠶ᠎ᠡ᠂ ᠭᠡᠷ ᠳᠡᠷᠭᠡ ᠶᠢᠨ ᠰᠠᠶᠢᠨ ᠮᠠᠭᠤ᠂ ᠦᠵᠡᠮᠵᠢ ᠪᠠᠶᠢᠳᠠᠯ ᠨᠢ ᠨᠢᠭᠡᠨ ᠠᠶᠢᠯ ᠤᠨ ᠠᠵᠢᠯᠰᠠᠭ ᠪᠠ ᠠᠯᠵᠠᠭᠤ᠂ ᠭᠦᠭᠵᠢᠯ ᠪᠠ ᠳᠤᠷᠤᠶᠢᠳᠠᠯ ᠢ ᠦᠵᠡᠭᠦ ᠪᠡᠯᠭᠡ ᠳᠡᠮᠳᠡᠭ ᠪᠤᠯᠵᠠᠢ᠃ ᠳᠡᠷᠡ ᠴᠠᠭ ᠠᠴᠠ ᠪᠠᠭᠠᠷᠢᠨᠴᠤᠳ ᠨᠢ ᠭᠡᠷ ᠪᠠᠷᠢᠯᠭ᠎ᠠ᠂ ᠭᠦᠷᠢᠶ᠎ᠡ ᠬᠠᠰᠢᠶᠠᠨ ᠤ ᠡᠪ ᠬᠠᠪᠤ ᠶᠢ ᠨᠢ ᠤᠨᠴᠠ ᠠᠩᠬᠠᠷᠤᠨ ᠴᠢᠬᠤᠯᠠᠴᠢᠯᠠᠵᠤ᠂ ᠭᠡᠷ ᠪᠠᠶᠢᠰᠢᠩ ᠢᠶᠠᠨ ᠳᠤᠭᠤᠷᠢᠭᠤᠯᠤᠨ ᠨᠦᠭᠦᠴᠡᠯ ᠢᠶᠠᠨ ᠠᠰᠢᠭᠯᠠᠨ ᠰᠢᠪᠠᠷ ᠰᠢᠷᠤᠢ᠂ ᠮᠤᠳᠤ ᠴᠢᠯᠠᠭᠤ᠂ ᠭᠦᠷᠦᠮᠡᠯ ᠰᠦᠯᠵᠢᠮᠡᠯ ᠢᠶᠠᠷ ᠨᠠᠷᠢᠯᠢᠭ ᠰᠠᠶᠢᠬᠠᠨ ᠭᠡᠷᠡᠮ ᠬᠠᠰᠢᠶ᠎ᠠ ᠶᠢ ᠦᠪᠡᠷ ᠦᠪᠡᠷ ᠤᠨ ᠭᠡᠷᠡᠭᠴᠡᠭᠡᠨ ᠳᠡᠭᠡᠨ ᠳᠤᠬᠢᠷᠠᠭᠤᠯᠤᠨ ᠪᠠᠷᠢᠳᠠᠭ ᠪᠤᠯᠵᠠᠢ᠃       ᠪᠠᠭᠠᠷᠢᠨᠴᠤᠳ ᠤᠨ ᠭᠦᠷᠢᠶ᠎ᠡ ᠬᠠᠰᠢᠶᠠᠨ ᠤ ᠪᠠᠶᠢᠷᠢᠰᠢᠯ ᠪᠠ ᠪᠠᠷᠢᠬᠤ ᠮᠡᠷᠭᠡᠵᠢᠯ ᠵᠡᠷᠭᠡ ᠳᠤ ᠪᠦᠷ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠲᠠᠢ ᠪᠠᠶᠢᠳᠠᠭ᠃ ᠳᠠᠳᠡᠨᠠᠷ ᠨᠢ ᠦᠪᠡᠷᠰᠡᠳ ᠤᠨ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠭᠡᠷᠡᠭᠴᠡᠭᠡ ᠪᠠᠨ ᠦᠵᠡᠵᠤ ᠭᠡᠷ ᠎ ᠤᠨ ᠭᠦᠷᠢᠶ᠎ᠡ᠂ ᠡᠪᠡᠰᠦᠨ ᠬᠤᠷᠤᠭ᠎ᠠ᠂ ᠮᠠᠯ ᠤᠨ ᠬᠠᠰᠢᠶ᠎ᠠ ᠭᠡᠵᠤ ᠳᠤᠰ ᠳᠤᠰ ᠳᠤᠨᠢ ᠡᠮᠬᠢ ᠵᠠᠮᠪᠠᠷᠠᠭ᠎ᠠ ᠲᠠᠢ ᠳᠤᠬᠢᠷᠠᠭᠤᠯᠤᠭᠰᠠᠨ ᠪᠠᠶᠢᠳᠠᠭ᠃ ᠭᠡᠷ ᠤᠨ ᠭᠦᠷᠢᠶ᠎ᠡ ᠨᠢ ᠳᠠᠷᠤᠢ ᠰᠠᠭᠤᠭ᠎ᠠ ᠠᠶᠢᠯ ᠤᠨ ᠭᠡᠷ ᠪᠠᠶᠢᠰᠢᠩ ᠢᠶᠠᠨ ᠳᠤᠭᠤᠷᠢᠭᠤᠯᠤᠨ ᠶᠠᠮᠠᠷᠪᠠ ᠮᠠᠯ ᠤᠨᠤᠭ᠎ᠠ᠂ ᠰᠠᠯᠬᠢ ᠰᠢᠭᠤᠷᠭᠠᠨ ᠠᠴᠠ ᠬᠠᠮᠠᠭᠠᠯᠠᠬᠤ ᠶᠢᠨ ᠳᠤᠰᠠᠳᠠ ᠰᠢᠪᠠᠷ ᠰᠢᠷᠤᠢ᠂ ᠮᠤᠳᠤ ᠴᠢᠯᠠᠭᠤ ᠪᠤᠶᠤ ᠪᠤᠷᠭᠠᠰᠤ ᠨᠠᠶᠢᠯᠵᠠᠭᠤᠷ ᠤᠨ ᠭᠦᠷᠦᠮᠡᠯ ᠢᠶᠠᠷ ᠪᠠᠶᠢᠭᠰᠠᠨ ᠭᠡᠷᠡᠮ ᠬᠠᠰᠢᠶ᠎ᠠ ᠪᠤᠯᠤᠨ᠎ᠠ᠃ ᠡᠪᠡᠰᠦᠨ ᠬᠤᠷᠤᠭ᠎ᠠ ᠶᠢ ᠤᠯᠠᠩᠬᠢ ᠳᠠᠭᠠᠨ ᠭᠡᠷ ᠭᠦᠷᠢᠶᠡᠨ ᠤ ᠠᠷᠤ ᠪᠠᠷ ᠳᠤᠬᠢᠷᠠᠭᠤᠯᠳᠠᠭ᠃ ᠢᠩᠬᠢᠵᠤ ᠪᠠᠶᠢᠷᠢᠰᠢᠭᠤᠯᠬᠤ ᠶᠢᠨ ᠰᠠᠶᠢᠨ ᠳᠠᠯ᠎ᠠ ᠭᠡᠪᠡᠯ ᠭᠡᠷ ᠭᠦᠷᠢᠶ᠎ᠡ ᠮᠠᠯ ᠤᠨ ᠬᠠᠰᠢᠶ᠎ᠠ ᠰᠠᠷᠠᠪᠴᠢᠨ ᠳᠤ ᠳᠠᠪᠬᠤᠷ ᠨᠦᠮᠦᠷᠢ ᠪᠤᠯᠵᠤ᠂ ᠦᠨᠡᠰᠤ ᠬᠤᠭ ᠤᠨ ᠤᠪᠤᠭᠠᠨ ᠠᠴᠠ ᠵᠠᠶᠢᠳᠠᠢ ᠪᠤᠯᠬᠤᠷ ᠭᠠᠯ ᠢ ᠰᠡᠷᠭᠡᠶᠢᠯᠡᠭᠦ ᠳᠤ ᠴᠦ ᠠᠰᠢᠭᠳᠠᠢ᠂ ᠮᠠᠯ ᠤᠨᠤᠭ᠎ᠠ ᠳᠤ ᠡᠪᠡᠰᠤ ᠦᠭᠭᠦ ᠳᠤ ᠳᠦᠭᠦᠮ ᠵᠡᠷᠭᠡ ᠶᠢ ᠠᠩᠬᠠᠷᠤᠭᠰᠠᠨ ᠳᠤ ᠤᠷᠤᠰᠢᠨ᠎ᠠ᠃ ᠡᠪᠡᠰᠦᠨ ᠬᠤᠷᠤᠭᠠᠨ ᠤ ᠡᠩᠭᠡᠷ ᠲᠤ ᠨᠦᠮᠦᠷᠢ ᠲᠠᠢ ᠪᠤᠯᠬᠤᠷ ᠳᠡᠵᠢᠭᠡᠪᠦᠷᠢ ᠶᠢᠨ ᠪᠠᠭᠤᠷᠢ ᠮᠠᠯ᠂ ᠪᠢᠷᠠᠭᠤ ᠳᠤᠭᠤᠯ᠂ ᠮᠤᠷᠢᠨ ᠤ ᠬᠤᠷᠤᠭ᠎ᠠ ᠵᠡᠷᠭᠡ ᠶᠢ ᠳᠤᠬᠢᠷᠠᠭᠤᠯᠳᠠᠭ᠃ ᠬᠤᠨᠢᠨ ᠬᠤᠷᠤᠭ᠎ᠠ ᠶᠢ ᠭᠡᠷ ᠤᠨ ᠪᠠᠷᠠᠭᠤᠨ ᠳᠠᠯ᠎ᠠ ᠳᠤ᠂ ᠦᠭᠡᠷ ᠤᠨ ᠬᠤᠷᠤᠭ᠎ᠠ ᠶᠢ ᠵᠡᠭᠦᠨ ᠳᠠᠯ᠎ᠠ ᠳᠤ ᠪᠠᠶᠢᠷᠢᠰᠢᠭᠤᠯᠳᠠᠭ᠃ ᠭᠡᠷ ᠤᠨ ᠭᠦᠷᠢᠶᠡᠨ ᠤ ᠭᠠᠳᠠᠨ᠎ᠠ ᠵᠡᠭᠦᠨ ᠪᠠᠷᠠᠭᠤᠨ ᠬᠤᠶᠠᠷ ᠦᠨᠴᠦᠭ ᠠᠴᠠ ᠭᠡᠳᠦᠨ ᠮᠧᠲᠷ ᠬᠢᠷᠢᠳᠠᠢ ᠬᠠᠨᠴᠤᠶᠢᠪᠴᠢ ᠵᠠᠯᠭᠠᠵᠤ ᠡᠷ᠎ᠡ ᠰᠤᠪᠠᠢ ᠪᠤᠳᠠ ᠮᠠᠯ ᠢ ᠰᠤᠯᠠ ᠬᠤᠳᠠᠯᠠᠳᠠᠭ᠃      ᠪᠠᠭᠠᠷᠢᠨᠴᠤᠳ ᠨᠢ ᠮᠠᠯ ᠤᠨ ᠬᠤᠷᠤᠭ᠎ᠠ ᠶᠢ ᠡᠮᠬᠢ ᠵᠢᠷᠦᠮ ᠲᠠᠢ ᠳᠤᠬᠢᠷᠠᠭᠤᠯᠳᠠᠭ ᠪᠦᠭᠡᠳ ᠠᠷᠭᠠᠯ ᠤᠨ ᠬᠠᠰᠢᠶ᠎ᠠ᠂ ᠦᠨᠡᠰᠦᠨ ᠤᠪᠤᠭ᠎ᠠ᠂ ᠬᠤᠭ ᠤᠨ ᠤᠪᠤᠭ᠎ᠠ᠂ ᠮᠤᠷᠢᠨ ᠪᠠᠭᠠᠨ᠎ᠠ᠂ ᠬᠤᠳᠳᠤᠭ᠂ ᠳᠡᠭᠡᠷᠮ᠎ᠡ ᠵᠡᠷᠭᠡ ᠶᠢ ᠴᠦ ᠳᠤᠰ ᠳᠤᠰ ᠲᠤᠨᠢ ᠳᠤᠬᠢᠳᠠᠢ ᠤᠷᠤᠨ ᠳᠤ ᠪᠠᠶᠢᠷᠢᠰᠢᠭᠤᠯᠳᠠᠭ᠃ ᠡᠭᠦᠨ ᠳᠤ ᠠᠷᠭᠠᠯ ᠤᠨ ᠬᠠᠰᠢᠶ᠎ᠠ ᠶᠢ ᠭᠡᠷ ᠠᠴᠠ ᠵᠠᠶᠢᠳᠠᠢ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠪᠤᠶᠤ ᠪᠠᠷᠠᠭᠤᠨ ᠳᠠᠯ᠎ᠠ ᠪᠠᠷ ᠳᠤᠬᠢᠶᠠᠵᠤ᠂ ᠬᠤᠭ ᠤᠨ ᠤᠪᠤᠭ᠎ᠠ ᠶᠢ ᠭᠡᠷ ᠤᠨ ᠠᠰ ᠡᠮᠦᠨ᠎ᠡ ᠤᠪᠤᠭᠠᠯᠠᠵᠤ ᠳᠡᠭᠦᠨ ᠤ ᠬᠤᠶᠠᠷ ᠳᠠᠯ᠎ᠠ ᠳᠤᠨᠢ ᠮᠤᠷᠢᠨ ᠤᠶᠠᠭ᠎ᠠ ᠶᠢ ᠳᠤᠬᠢᠷᠠᠭᠤᠯᠳᠠᠭ᠃ ᠦᠨᠡᠰᠤ ᠶᠢᠨ ᠤᠪᠤᠭ᠎ᠠ ᠶᠢ ᠵᠡᠭᠦᠨ ᠡᠮᠦᠨ᠎ᠡ ᠵᠦᠭ ᠲᠤ ᠭᠡᠷ ᠠᠴᠠ ᠨᠡᠯᠢᠶᠡᠳ ᠵᠠᠶᠢᠳᠠᠢ ᠤᠪᠤᠭᠠᠯᠠᠵᠤ᠂ ᠢᠩ ᠳᠡᠭᠡᠷᠮ᠎ᠡ ᠶᠢ ᠪᠤᠯ ᠭᠡᠷ ᠎ ᠤᠨ ᠪᠠᠷᠠᠭᠤᠨ ᠡᠮᠦᠨ᠎ᠡ ᠨᠦᠮᠦᠷᠢ ᠲᠠᠢ ᠰᠢᠭ ᠭᠠᠵᠠᠷ ᠢ ᠰᠤᠩᠭᠤᠵᠤ ᠳᠤᠰᠬᠠᠢ ᠬᠠᠰᠢᠶ᠎ᠠ ᠪᠠᠷᠢᠵᠤ ᠫᠧᠩ ᠰᠠᠷᠠᠪᠴᠢ ᠳᠠᠷᠤᠳᠠᠭ ᠪᠢᠯᠡ᠃
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠤ ᠰᠤᠶᠤᠯ ᠲᠡᠦᠬᠡ