ᠪᠠᠭᠠᠷᠢᠨ ᠣᠳᠤᠭ ᠤᠨ ᠨᠣᠳᠤᠭ ᠣᠰᠣ ︵ᠬᠤᠶᠠᠷ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/22
    ᠮᠠᠨ ᠤ ᠮᠡᠳᠡᠭᠡᠵᠢ ᠪᠠᠷ᠂ ᠣᠳᠦ ᠶᠢᠨ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠨᠣᠳᠣᠭᠯᠠᠵᠦ ᠪᠠᠶᠢᠭ᠎ᠠ ᠭᠠᠵᠠᠷ ᠪᠣᠯ ᠲᠠᠶᠢᠴᠢᠩ ᠬᠦᠷᠣᠨ ᠤ ᠲᠡᠭᠷᠢ ᠶᠢᠨ ᠰᠡᠴᠡᠨ ᠤ ᠨᠠᠢᠮᠠᠳᠣᠭᠠᠷ ᠣᠨ ︵1634 ᠣᠨ︶᠎ ᠳᠤ ︽ᠮᠣᠩᠭᠤᠯ ᠤᠨ ᠮᠠᠯ ᠮᠠᠯᠵᠢᠬᠤ ᠨᠣᠳᠤᠭ ᠤᠨ ᠬᠢᠵᠠᠭᠠᠷ︾᠎ ᠢ ᠵᠢᠷᠣᠭᠯᠠᠨ ᠲᠣᠭᠳᠭᠠᠬᠤ ᠦᠶ᠎ᠠ ᠳᠤ ᠲᠣᠭᠳᠠᠭᠠᠭᠰᠡᠨ ᠨᠣᠳᠤᠭ ᠶᠤᠮ᠃ ᠲᠡᠭᠡᠪᠡᠯ ᠲᠣᠮᠳᠠᠳᠦ ᠣᠯᠣᠰ ᠤᠨ ᠲᠡᠣᠭᠡᠨ ᠲᠡᠭᠡᠷ᠎ᠠ ︽ᠮᠢᠩ ᠣᠯᠣᠰ ᠤᠨ ᠦᠶ᠎ᠠ ᠶᠢᠨ ᠮᠣᠩᠭᠤᠯ︾ ᠬᠡᠵᠦ ᠨᠡᠷᠡᠶᠢᠳᠴᠦ ᠪᠠᠶᠢᠭ᠎ᠠ ᠦᠶ᠎ᠠ ᠳᠤ᠂ ᠪᠠᠭᠠᠷᠢᠨ ᠨᠣᠳᠤᠭ ᠨᠢ ᠬᠡᠯᠡᠯᠭᠡᠨ ᠦᠭᠡᠢ ᠣᠳᠦ ᠶᠢᠨ ᠡᠨᠡ ᠨᠣᠳᠤᠭ ᠲᠤ ᠨᠣᠳᠣᠭᠯᠠᠵᠦ ᠪᠠᠶᠢᠭᠰᠡᠨ ᠦᠭᠡᠢ ᠶᠤᠮ᠃ ᠡᠶᠢᠮᠣ ᠠᠴᠠ ᠪᠢᠳᠠ ᠪᠠᠭᠠᠷᠢᠨ ᠣᠳᠤᠭ ᠤᠨ ᠲᠡᠷᠨ ᠦᠶ᠎ᠠ ᠶᠢᠨ ᠨᠣᠳᠤᠭ ᠣᠰᠣ ᠶᠢ ᠲᠣᠳᠣᠷᠬᠠᠶᠢᠯᠠᠶ᠎ᠠ ᠬᠡᠪᠡᠯ ᠡᠩ ᠲᠡᠷᠢᠬᠦᠨ ᠳᠤ ᠲᠡᠣᠭᠡᠨ ᠳᠠᠬᠢ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠡᠬᠢ ᠡᠬᠦᠰᠣᠯ ᠢ ᠲᠣᠳᠣᠷᠬᠠᠶᠢᠯᠠᠬᠤ ᠴᠢᠬᠤᠯᠠᠳᠠᠢ᠃ ᠣᠴᠢᠷ ᠨᠢ ᠪᠢᠳᠠᠨᠠᠷ ᠤᠨ ᠶᠠᠷᠢᠵᠦ ᠪᠦᠬᠦᠢ ᠪᠠᠭᠠᠷᠢᠨ ᠣᠳᠤᠭ ᠪᠣᠯ ᠲᠠᠷᠣᠢ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠴᠢᠬᠤᠯᠨ ᠪᠦᠷᠢᠯᠳᠣᠬᠦᠨ ᠬᠡᠰᠡᠭ ᠨᠢ ᠪᠣᠯᠣᠨ᠎ᠠ᠃     ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾ ᠬᠡᠳᠡᠭ ᠨᠢ ᠲᠠᠷᠣᠢ ᠮᠣᠩᠭᠤᠯ ᠤᠨ ᠲᠡᠣᠭᠡᠨ ᠲᠣᠯᠭᠤᠷ ᠪᠢᠴᠢᠭ ᠲᠡᠭᠡᠷ᠎ᠠ ᠠᠯᠢ ᠡᠷᠳᠠ ᠪᠢᠴᠢᠭᠳᠡᠭᠰᠡᠭᠡᠷ ᠢᠷᠡᠭᠰᠡᠨ ᠨᠡᠷᠡᠰ ᠶᠤᠮ᠃      ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠬᠢᠨ ᠠᠯᠢ ᠡᠷᠳᠠ ᠠᠴᠠ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠪᠦᠷᠢᠯᠳᠣᠬᠦᠨ ᠤ ᠲᠣᠬᠠᠢ ᠰᠣᠳᠣᠯᠣᠯ ᠢ ᠠᠩᠬᠠᠷᠣᠯ ᠳᠠᠭᠠᠨ ᠠᠪᠣᠭᠰᠠᠭᠠᠷ ᠢᠷᠡᠭᠰᠡᠨ ᠶᠤᠮ᠃ ᠮᠣᠩᠭᠤᠯ ᠪᠢᠴᠢᠭ ᠲᠤ ᠨᠡᠪᠳᠡᠷᠡᠭᠰᠡᠨ ᠵᠦᠪᠯᠡᠯᠳᠦ ᠬᠤᠯᠪᠣᠭᠠᠳᠦ ᠣᠯᠣᠰ ᠤᠨ ᠠᠯᠳᠠᠷᠳᠦ ᠮᠣᠩᠭᠤᠯᠴᠢ ᠡᠷᠳᠡᠮᠳᠡᠨ ᠪᠡ᠊᠂ ᠶ᠊᠂ ᠸᠯᠠᠳᠢᠮᠢᠷᠣᠽᠣᠸ᠋᠂ ᠮᠣᠩᠭᠤᠯ ᠤᠨ ︽ᠡᠷᠳᠠᠨᠢ ᠲᠣᠪᠴᠢ︾ ︵ᠬᠢᠳᠠᠳ ᠣᠷᠴᠢᠭᠤᠯᠭ᠎ᠠ︶᠎ ᠶᠢ ᠦᠨᠳᠣᠰᠣᠯᠡᠵᠦ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠪᠦᠷᠢᠯᠳᠣᠬᠦᠨ ᠤ ᠲᠠᠶᠢᠯᠪᠣᠷᠢᠯᠠᠬᠤ ᠪᠠᠷ ᠣᠷᠣᠯᠳᠣᠪᠡ᠃ ᠲᠠᠷᠠᠭ᠎ᠠ ᠨᠢ ᠶᠠᠫᠣᠨ ᠣᠯᠣᠰ ᠤᠨ ᠳ᠋ᠣᠺᠲ᠋ᠣᠷ ᠸᠠᠳᠠ ᠺᠢᠶᠣᠰᠢ ᠮᠦᠨ ᠡᠨᠡ ᠠᠰᠠᠭᠤᠳᠠᠯ ᠤᠨ ᠲᠣᠬᠠᠢ ᠲᠠᠶᠢᠯᠪᠣᠷᠢ ᠬᠢᠵᠦ ᠦᠡᠭᠭᠡᠷᠡᠪᠡ᠃ ᠬᠡᠪᠡᠴᠦ ᠲᠠᠳᠠᠨᠠᠷ ᠪᠦᠷ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠪᠦᠷᠢᠯᠳᠣᠬᠦᠨ ᠢ ᠲᠣᠳᠣᠷᠬᠠᠶᠢᠯᠠᠵᠦ ᠴᠢᠳᠠᠭᠰᠡᠨ ᠦᠭᠡᠢ ᠪᠢᠯᠨ᠃ ᠡᠨᠡ ᠬᠤᠶᠠᠷ ᠠᠯᠳᠠᠷᠳᠦ ᠡᠷᠳᠡᠮᠳᠡᠨ ᠠᠴᠠ ᠲᠠᠷᠠᠭ᠎ᠠ᠂ ᠡᠨᠡᠬᠦ ᠠᠰᠠᠭᠤᠳᠠᠯ ᠳᠤ ᠨᠡᠯᠢᠶᠡᠳ ᠲᠠᠪᠰᠢᠯᠳᠠ ᠦᠵᠡᠬᠦᠯᠥᠭᠰᠡᠨ ᠡᠷᠳᠡᠮᠳᠡᠨ ᠪᠣᠯ ᠠᠮᠧᠷᠢᠺᠠ ᠣᠯᠣᠰ ᠤᠨ ᠰᠧᠷᠷᠦ᠋ᠰ ᠠᠪᠣᠭᠠᠢ ᠪᠣᠯᠣᠨ᠎ᠠ᠃ ᠲᠡᠷᠨ ᠠᠷᠪᠡᠨ ᠨᠠᠢᠮᠠᠳᠣᠭᠠᠷ ᠵᠠᠭᠤᠨ ᠤ ᠮᠣᠩᠭᠤᠯ ᠤᠨ ᠪᠠᠭᠠᠷᠢᠨ ᠲᠡᠣᠭᠡᠴᠢᠨ ᠷᠠᠰᠫᠤᠩᠰᠤᠭ ᠤᠨ ᠵᠣᠬᠢᠶᠠᠭᠰᠡᠨ ︽ᠪᠣᠯᠣᠷ ᠡᠷᠢᠭᠡ︾᠎ ᠶᠢ ᠦᠨᠳᠣᠰᠣᠯᠡᠨ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠨᠡᠷᠡᠶᠢᠳᠣᠯ ᠢ ᠵᠦᠪ ᠶᠠᠷᠢᠵᠠᠢ᠃ ᠡᠨᠡ ᠨᠢ ᠲᠠᠷᠣᠢ ᠮᠣᠩᠭᠤᠯ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠳᠠᠬᠢ ᠴᠢᠬᠤᠯᠠᠴᠢᠯᠠᠭᠤᠰᠢᠳᠠᠢ ᠡᠬᠢᠯᠡᠯᠳᠠ ᠪᠣᠯᠬᠤ ᠨᠢ ᠲᠠᠮᠵᠢᠭ ᠦᠭᠡᠢ᠃ ᠣᠴᠢᠷ ᠨᠢ ᠰᠧᠷᠷᠦ᠋ᠰ ᠠᠴᠠ ᠡᠮᠣᠨ᠎ᠠ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠨᠡᠷᠡᠶᠢᠳᠣᠯ ᠢ ᠲᠣᠳᠣᠷᠬᠠᠢ ᠵᠢᠭᠠᠵᠦ ᠭᠠᠷᠭᠠᠭᠰᠡᠨ ᠬᠦᠮᠣᠨ ᠪᠠᠷᠤᠭ ᠦᠭᠡᠢ ᠪᠠᠶᠢᠯ᠎ᠠ᠃ ᠰᠧᠷᠷᠦ᠋ᠰ ᠠᠪᠣᠭᠠᠢ ᠬᠡᠯᠡᠯᠭᠡᠨ ᠦᠭᠡᠢ ᠮᠣᠩᠭᠤᠯ ᠲᠣᠯᠭᠤᠷ ᠪᠢᠴᠢᠭ ᠢ ᠠᠰᠢᠭᠯᠠᠵᠦ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠨᠡᠷᠡᠶᠢᠳᠣᠯ ᠢ ᠵᠢᠭᠠᠵᠦ ᠭᠠᠷᠭᠠᠭᠰᠡᠨ ᠶᠠᠪᠣᠳᠠᠯ ᠨᠢ ᠬᠦᠮᠣᠰ ᠤᠨ ᠦᠡᠭᠭᠡᠷᠡᠭᠰᠡᠨ ᠤ ᠰᠣᠳᠣᠯᠣᠯ ᠲᠠᠢ ᠠᠳᠠᠯᠢᠳᠬᠠᠪᠡᠯ᠂ ᠰᠢᠪᠳᠣᠯᠣᠯᠳᠠ ᠶᠢᠨ ᠴᠢᠨᠠᠷᠳᠠᠢ ᠢᠯᠠᠯᠳᠠ ᠬᠡᠵᠦ ᠬᠡᠯᠡᠵᠦ ᠪᠣᠯᠬᠤ ᠪᠣᠯᠪᠠᠴᠦ ᠮᠢᠨᠦ ᠦᠵᠡᠬᠦ ᠪᠠᠷ ᠰᠧᠷᠷᠦ᠋ᠰ ᠠᠪᠣᠭᠠᠢ ᠰᠣᠳᠣᠯᠣᠯᠳᠠ ᠶᠢᠨ ᠦᠷ᠎ᠠ ᠳ᠋ᠦᠡᠭ ᠨᠢ ᠲᠡᠣᠭᠡᠨ ᠮᠠᠲ᠋ᠧᠷᠢᠶᠠᠯ ᠤᠨ ᠡᠬᠢ ᠰᠣᠷᠪᠣᠯᠵᠢ ᠶᠢᠨ ᠠᠰᠠᠭᠤᠳᠠᠯ ᠲᠡᠭᠡᠷ᠎ᠠ ᠮᠦᠨ ᠴᠦ ᠬᠦᠢᠴᠡᠳ ᠦᠭᠡᠢ ᠲᠠᠯ᠎ᠠ ᠪᠠᠶᠢᠭᠰᠠᠭᠠᠷ ᠶᠤᠮ᠃      ᠮᠣᠩᠭᠤᠯᠴᠢ ᠡᠷᠳᠡᠮᠳᠡᠨ ᠤ ᠪᠢᠴᠢᠭᠰᠡᠨ ᠲᠡᠣᠭᠡ ᠰᠣᠳᠣᠷ ᠤᠨ ᠲᠣᠳᠣᠷ᠎ᠠ ︽ᠪᠣᠯᠣᠷ ᠡᠷᠢᠭᠡ︾᠎ ᠳᠤ ᠯᠨ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠨᠡᠷᠡᠶᠢᠳᠣᠯ ᠢ ᠬᠠᠮᠤᠭ ᠡᠷᠳᠠ ᠲᠣᠭᠠᠴᠢᠨ ᠲᠣᠷᠠᠳᠣᠭᠰᠡᠨ ᠪᠢᠰᠢ ᠶᠤᠮ᠃ ᠡᠳᠣᠭᠡ ᠪᠣᠯᠳᠠᠯ᠎ᠠ ᠪᠢᠳᠠᠨ ᠳᠤ ᠮᠡᠳᠡᠭᠳᠡᠭᠰᠡᠨ ᠮᠣᠩᠭᠤᠯ ᠰᠣᠷᠪᠣᠯᠵᠢ ᠪᠢᠴᠢᠭ ᠤᠨ ᠲᠣᠳᠣᠷ᠎ᠠ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠪᠦᠷᠢᠯᠳᠣᠬᠦᠨ ᠤ ᠨᠢᠭᠡ ᠪᠣᠯᠬᠤ ᠵᠠᠷᠣᠳ ᠠᠶᠢᠮᠠᠭ ᠤᠨ ᠲᠡᠭᠡᠳᠦ ᠯᠠᠮ᠎ᠠ ᠬᠦᠣᠰᠢ ᠶᠢᠨ ᠪᠢᠴᠢᠭᠰᠡᠨ ︽ᠠᠯᠳᠠᠨ ᠬᠦᠷᠳᠣᠨ ᠮᠢᠩᠭᠠᠨ ᠬᠡᠬᠡᠰᠣᠳᠦ︾ ︵1739︶ ᠪᠣᠯᠪᠠᠴᠦ ᠬᠠᠷᠢᠨᠴᠦ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠲᠣᠬᠠᠢ ᠬᠠᠮᠤᠭ ᠡᠷᠳᠠ ᠲᠣᠳᠣᠯᠠᠨ ᠵᠢᠭᠠᠭᠰᠡᠨ ᠵᠣᠬᠢᠶᠠᠯ ᠪᠣᠯᠣᠨ᠎ᠠ᠃ ᠬᠠᠷᠢᠨ ︽ᠪᠣᠯᠣᠷ ᠡᠷᠢᠭᠡ︾᠎ ᠨᠢ ︽ᠠᠯᠳᠠᠨ ᠬᠦᠷᠳᠣᠨ ᠮᠢᠩᠭᠠᠨ ᠬᠡᠬᠡᠰᠣᠳᠦ︾᠎ ᠶᠢ ᠦᠨᠳᠣᠰᠣᠯᠡᠨ ᠲᠡᠬᠦᠨ ᠠᠴᠠ ᠬᠠᠭᠤᠯᠪᠣᠷᠢᠯᠠᠨ ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ ᠶᠢᠨ ᠨᠡᠷᠡᠰ ᠢ ᠲᠣᠳᠣᠯᠠᠨ ᠲᠣᠷᠠᠳᠣᠭᠰᠡᠨ ᠵᠣᠬᠢᠶᠠᠯ ᠪᠣᠶᠦ᠃ ︽ᠠᠯᠳᠠᠨ ᠬᠦᠷᠳᠣᠨ ᠮᠢᠩᠭᠠᠨ ᠬᠡᠬᠡᠰᠣᠳᠦ︾᠎ ᠤᠨ  ᠲᠡᠮᠳᠡᠭᠯᠡᠯ ᠢ ᠦᠨᠳᠣᠰᠣᠯᠡᠪᠡᠯ᠂ ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ ᠬᠡᠮᠡᠭᠴᠢ ᠢᠨᠣ᠄ ᠪᠠᠭᠠᠷᠢᠨ᠂ ᠵᠠᠷᠣᠳ᠂ ᠪᠠᠶᠠᠣᠳ᠂ ᠬᠤᠨᠭ᠍ᠬᠢᠷᠠᠳ᠂ ᠦᠵᠢᠶᠡᠳ ᠲᠠᠪᠤ ᠪᠣᠯᠣᠮᠣᠢ᠃ ᠡᠬᠦᠨ ᠠᠴᠠ ᠦᠵᠡᠬᠦ ᠳᠤ ᠪᠠᠭᠠᠷᠢᠨ ᠣᠳᠤᠭ ᠬᠡᠵᠦ ᠮᠠᠨ ᠤ ᠬᠡᠯᠡᠳᠡᠭ ᠨᠢ ᠲᠠᠷᠣᠢ ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ ᠶᠢᠨ ᠪᠦᠷᠢᠯᠳᠣᠬᠦᠨ ᠬᠡᠳᠡᠭ ᠢ ᠮᠡᠳᠡᠵᠦ ᠪᠣᠯᠬᠤ ᠶᠤᠮ ᠲᠡᠭᠡᠪᠡᠺ ᠬᠠᠯᠬ᠎ᠠ ᠲᠠᠪᠣᠨ ᠣᠳᠤᠭ ᠢ ᠬᠡᠷᠬᠢᠨ ᠬᠤᠪᠢᠶᠠᠬᠤ ᠪᠠ ᠲᠡᠬᠦᠨ ᠤ ᠣᠭ ᠢᠷᠡᠯ ᠨᠢ ᠶᠠᠭᠤ ᠬᠡᠭᠴᠢ ᠶᠢ ᠣᠶᠢᠯᠠᠭᠴᠢᠬᠠᠪᠡᠯ ᠪᠢᠳᠠ ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ ᠶᠢᠨ ᠨᠢᠭᠡ ᠪᠦᠷᠢᠯᠳᠣᠬᠦᠨ ᠪᠣᠯᠬᠤ ᠪᠠᠭᠠᠷᠢᠨ ᠣᠳᠤᠭ ᠤᠨ ᠪᠠᠶᠢᠳᠠᠯ ᠢ ᠣᠶᠢᠯᠠᠭᠠᠬᠤ ᠳᠤ ᠲᠡᠮᠡᠢ ᠬᠦᠴᠢᠷ ᠦᠭᠡᠢ ᠶᠤᠮ᠃      ᠮᠢᠩ ᠣᠯᠣᠰ ᠤᠨ ᠦᠶ᠎ᠠ ᠶᠢᠨ ᠮᠣᠩᠭᠤᠯ ᠬᠢᠳᠠᠳ ᠲᠣᠯᠭᠤᠷ ᠪᠢᠴᠢᠭ ᠲᠤ ︽ᠬᠠᠯᠬ᠎ᠠ︾ ᠬᠡᠵᠦ ᠪᠠᠶᠢᠳᠠᠭ ᠨᠢ ᠮᠣᠩᠭᠤᠯ ᠢ ᠲᠠᠬᠢᠨ ᠮᠠᠨᠳᠣᠭᠤᠯᠣᠭᠰᠡᠨ ᠲᠠᠶᠠᠨ ᠬᠠᠭᠠᠨ ︵1479-1517 ᠣᠨ ᠬᠦᠷᠳᠡᠯ᠎ᠠ ᠰᠠᠭᠤᠷᠢᠨ ᠳᠤ ᠰᠠᠭᠤᠵᠦ ᠪᠠᠶᠢᠪᠡ︶᠎ ᠤ ᠦᠶ᠎ᠠ ᠳᠠᠬᠢ ᠮᠣᠩᠭᠤᠯ ᠤᠨ ᠵᠢᠷᠭᠤᠭᠠᠨ ᠲᠦᠮᠡᠨ ᠡᠷᠣᠭᠡ ᠶᠢᠨ ᠨᠢᠭᠡ ᠪᠣᠯᠬᠤ᠂ ᠲᠠᠶᠠᠨ ᠬᠠᠭᠠᠨ ᠤ ᠬᠦᠪᠡᠬᠦᠨ ᠠᠯᠴᠦ ᠪᠣᠯᠣᠳ ᠪᠠ ᠬᠡᠷᠡᠰᠡᠨᠵᠨ ᠬᠤᠶᠠᠷ ᠤᠨ ᠡᠵᠡᠯᠡᠨ ᠪᠠᠶᠢᠭᠰᠡᠨ ᠠᠶᠢᠮᠠᠭ ᠪᠣᠯᠣᠨ᠎ᠠ᠃ ᠬᠤᠶᠢᠨ᠎ᠠ ᠠᠯᠴᠦ ᠪᠣᠯᠣᠳ᠂ ᠭᠤᠪᠢ ᠶᠢᠨ ᠦᠪᠣᠷ ᠲᠤ ᠨᠡᠬᠦᠳᠡᠯᠯᠡᠨ ᠢᠷᠡᠭᠰᠡᠨ ᠠᠴᠠ ᠠᠷᠦ᠂ ᠦᠪᠣᠷ ᠬᠠᠯᠬ᠎ᠠ ᠬᠡᠮᠡᠭᠳᠡᠬᠦ ᠪᠣᠯᠵᠦ᠂ ︽ᠡᠷᠳᠠᠨᠢ ᠶᠢᠨ ᠲᠣᠪᠴᠢ︾᠎ ᠳᠤ ︽ᠠᠷᠪᠡᠨ ᠬᠤᠶᠠᠷ ᠬᠠᠯᠬ᠎ᠠ ︾ ᠬᠡᠮᠡᠬᠦ ᠨᠡᠷ᠎ᠠ ᠡᠬᠦᠰᠴᠠᠢ᠃ ︽ᠠᠷᠪᠡᠨ ᠬᠤᠶᠠᠷ ᠬᠠᠯᠬ᠎ᠠ︾ ᠬᠡᠳᠡᠭ ᠨᠢ ᠬᠠᠯᠬ᠎ᠠ ᠲᠦᠮᠡᠨ ᠶᠠᠪᠣᠭᠠᠨ ᠳᠠᠭᠠᠨ ᠦᠪᠣᠷ ᠲᠠᠪᠣᠨ ᠣᠳᠤᠭ ᠪᠠ ᠠᠷᠦ ᠲᠣᠯᠣᠭᠠᠨ ᠣᠳᠤᠭ ᠬᠠᠯᠬ᠎ᠠ ᠪᠣᠯᠣᠭᠰᠡᠨ ᠢ ᠦᠨᠳᠣᠰᠣᠯᠡᠨ ᠰᠠᠭᠠᠡᠭ ᠰᠡᠴᠡᠨ ᠤ ᠲᠣᠮᠢᠶᠠᠯᠠᠨ ᠦᠬᠦᠯᠡᠭᠰᠡᠨ ᠵᠣᠶᠢᠯ ᠪᠣᠯᠬᠤ ᠠᠴᠠ ᠪᠢᠰᠢ ᠬᠠᠷᠢᠨ ᠬᠠᠯᠬ᠎ᠠ ᠲᠦᠮᠡᠨ ᠠᠩᠬ᠎ᠠ ᠲᠣᠭᠳᠠᠩᠭᠤᠳᠠ ᠪᠠᠨ ᠠᠷᠪᠡᠨ ᠬᠤᠶᠠᠷ ᠣᠳᠤᠭ ᠪᠠᠶᠢᠭᠰᠡᠨ ᠪᠢᠰᠢ ᠶᠤᠮ᠃ ᠲᠡᠭᠡᠪᠡᠯ ᠡᠨᠡᠬᠦ ︽ᠠᠷᠪᠡᠨ ᠬᠤᠶᠠᠷ ᠣᠳᠤᠭ ᠬᠠᠯᠬ᠎ᠠ︾᠎ ᠨᠢ ᠴᠣᠬᠤᠮ ᠬᠡᠵᠢᠶ᠎ᠠ ᠬᠡᠷᠬᠢᠨ ᠪᠦᠷᠢᠯᠳᠦᠭᠰᠡᠨ ᠪᠠ ᠰᠡᠬᠦᠯᠡᠷ ᠪᠠᠰᠨ ᠬᠡᠷᠬᠢᠨ ︽ᠲᠠᠪᠣᠨ ᠣᠳᠤᠭ︾ ᠪᠠ ︽ᠲᠣᠯᠣᠭᠠᠨ ᠣᠳᠤᠭ︾ ᠪᠣᠯᠵᠦ ᠬᠤᠪᠢᠶᠠᠭᠳᠠᠭᠰᠡᠨ ᠢ ᠮᠣᠩᠭᠤᠯᠴᠢ ᠲᠡᠣᠭᠡᠴᠢᠳ ᠣᠳᠦ ᠪᠣᠯᠳᠠᠯ᠎ᠠ ᠲᠣᠳᠣᠯᠠᠨ ᠦᠬᠦᠯᠡᠵᠦ ᠡᠰᠨ ᠴᠢᠳᠠᠵᠣᠬᠤᠢ᠃ ᠵᠦᠪᠬᠡᠨ ᠦᠪᠡᠷ ᠦᠪᠡᠷ ᠤᠨ ᠦᠵᠡᠯᠳᠠ ᠪᠠᠨ ᠪᠠᠷᠢᠮᠳᠠᠯᠠᠭᠰᠠᠭᠠᠷ ᠪᠠᠶᠢᠨ᠎ᠠ᠃ ᠬᠡᠳᠡᠯ᠎ᠠ ᠪᠢᠳᠠ ᠮᠣᠩᠭᠤᠯ ᠲᠣᠯᠭᠤᠷ ᠪᠢᠴᠢᠭ ᠠᠴᠠ ᠲᠡᠬᠦᠨ ᠤ ᠴᠠᠭ ᠦᠶ᠎ᠠ ᠶᠢ ᠶᠡᠭᠡ ᠲᠦᠯᠣᠪ ᠮᠡᠳᠡᠵᠦ ᠪᠣᠯᠬᠤ ᠶᠤᠮ᠃ ︽ᠠᠯᠳᠠᠨ ᠬᠦᠷᠳᠣᠨ ᠮᠢᠩᠭᠠᠨ ᠬᠡᠬᠡᠰᠣᠳᠦ︾᠎ ᠳᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠭ᠎ᠠ ᠶᠢ ᠦᠨᠳᠣᠰᠣᠯᠡᠪᠡᠯ᠂ ᠲᠠᠶᠠᠨ ᠬᠠᠭᠠᠨ ᠤ ᠲᠠᠪᠣᠳᠣᠭᠠᠷ ᠠᠯᠴᠦ ᠪᠣᠯᠣᠳ ᠠᠷᠪᠡᠨ ᠬᠤᠶᠠᠷ ᠬᠦᠷᠢᠶᠡᠨ ᠤ ᠬᠠᠯᠬ᠎ᠠ ᠠᠴᠠ ᠰᠠᠯᠣᠨ᠂ ᠭᠤᠪᠢ ᠶᠢᠨ ᠦᠪᠣᠷ ᠲᠤ ᠢᠷᠡᠵᠦ ᠵᠠᠷᠣᠳ᠂ ᠪᠠᠭᠠᠷᠢᠨ᠂ ᠬᠤᠨᠭ᠍ᠬᠢᠷᠠᠳ᠂ ᠪᠠᠶᠣᠳ᠂ ᠦᠵᠢᠶᠡᠳ ᠵᠡᠷᠭᠡ ︽ᠬᠠᠯᠬ᠎ᠠ ᠲᠠᠪᠣᠨ ᠣᠳᠤᠭ︾᠎ ᠢ ᠡᠵᠡᠯᠡᠨ ᠰᠠᠭᠤᠵᠠᠢ᠃ ︽ᠪᠣᠯᠣᠷ ᠡᠷᠢᠭᠡ︾ ᠪᠠ ᠵᠢᠴᠢ ᠲᠡᠬᠦᠨ ᠤ ᠰᠡᠬᠦᠯᠡᠷ ᠪᠢᠴᠢᠭᠳᠡᠭᠰᠡᠨ ᠮᠣᠩᠭᠤᠯ ᠲᠣᠯᠭᠤᠷ ᠪᠢᠴᠢᠭ ᠲᠤ ᠴᠦᠮ ᠲᠡᠭᠡᠷᠡᠬᠢ ᠦᠵᠡᠯᠳᠠ ᠶᠢ ᠨᠢᠭᠡᠳᠴᠦ ᠪᠠᠶᠢᠨ᠎ᠠ᠃ ᠡᠬᠦᠨ ᠠᠴᠠ ᠦᠵᠡᠬᠦ ᠳᠤ᠂ ᠲᠠᠶᠠᠨ ᠬᠠᠭᠠᠨ ᠤ ᠦᠶ᠎ᠠ᠂ ᠦᠭᠡᠷ᠎ᠠ ᠪᠠᠷ ᠬᠡᠯᠡᠪᠡᠯ 15 ᠳ᠋ᠣᠭᠠᠷ ᠵᠠᠨ ᠤ ᠰᠡᠬᠦᠯᠴᠢ ᠠᠴᠠ 16 — 17 ᠳ᠋ᠣᠭᠠᠷ ᠵᠠᠭᠤᠨ ᠤ ᠡᠬᠢᠨ ᠤ ᠦᠶ᠎ᠠ ᠳᠤ ︽ᠪᠠᠷᠠᠭᠤᠨ ᠭᠠᠷᠣᠨ ᠭᠤᠷᠪᠡᠨ ᠲᠦᠮᠡᠨ ᠡᠷᠣᠭᠡ︾᠎ ᠶᠢᠨ ᠨᠢᠭᠡ ᠪᠣᠯᠬᠤ ᠬᠠᠯᠬ᠎ᠠ ᠨᠢ ᠨᠢᠭᠡᠨᠳᠠ ︽ᠠᠷᠪᠡᠨ ᠬᠤᠶᠠᠷ ᠬᠦᠷᠢᠶ᠎ᠠ︾᠎ ᠲᠠᠢ ᠪᠣᠯᠣᠭᠰᠡᠨ ᠪᠠᠶᠢᠪᠡ᠃ ᠡᠨᠡ ᠨᠢ ᠲᠠᠷᠣᠢ ︽ᠠᠷᠪᠡᠨ ᠬᠤᠶᠠᠷ ᠣᠳᠤᠭ︾ ᠮᠦᠨ᠃       ᠰᠡᠬᠦᠯᠡᠷ ᠨᠢ ᠡᠨᠡᠬᠦ ︽ᠠᠷᠪᠡᠨ ᠬᠤᠶᠠᠷ ᠬᠦᠷᠢᠶᠡᠨ︾᠎ ᠤ ᠣᠳᠤᠭ ᠨᠢ ᠬᠤᠪᠢᠷᠠᠯᠳᠠ ᠭᠠᠷᠴᠦ᠂ ᠲᠠᠶᠠᠨ ᠬᠠᠭᠠᠨ ᠤ ᠬᠤᠶᠢᠴᠢᠰ ᠠᠯᠴᠦ ᠪᠣᠯᠣᠳ ᠤᠨ ᠬᠦᠪᠡᠬᠦᠨ ᠬᠤᠷᠠᠭᠴᠢ ᠬᠠᠰᠡᠷ ᠤᠨ ᠲᠠᠪᠣᠨ ᠬᠦᠪᠡᠬᠦᠨ ᠲᠣᠰᠪᠣᠷᠢ ᠨᠢᠭᠡ ᠬᠦᠷᠢᠶ᠎ᠠ ᠪᠣᠯᠵᠠᠢ᠃ ᠡᠨᠡᠬᠦ ᠲᠠᠪᠣᠨ ᠬᠦᠷᠢᠶ᠎ᠠ ᠨᠢ ᠲᠠᠷᠣᠢ ︽ᠦᠪᠣᠷ ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾ ᠪᠣᠯᠣᠨ ᠪᠦᠷᠢᠯᠳᠣᠵᠠᠢ᠃ ᠨᠦᠬᠦᠭᠡ ︽ᠲᠣᠯᠣᠭᠠᠨ ᠬᠦᠷᠢᠶ᠎ᠠ︾᠎ ᠨᠢ ᠲᠠᠶᠠᠨ ᠬᠠᠭᠠᠨ ᠤ ᠣᠳᠬᠤᠨ ᠬᠦᠪᠡᠬᠦᠨ ᠬᠡᠷᠡᠰᠡᠨᠵᠨ ᠶᠢᠨ ᠲᠣᠯᠣᠭᠠᠨ ᠬᠦᠪᠡᠬᠦᠨ ᠎ ᠳᠤ ᠬᠠᠷᠢᠶᠠᠯᠠᠭᠳᠠᠪᠡ᠃      ᠬᠠᠯᠬ᠎ᠠ ᠶᠢᠨ ᠲᠠᠶᠢᠵᠢ ᠵᠠᠮᠪᠡ ︵ᠱᠠᠮᠪᠠ ᠵᠠᠰᠠᠭ︶᠎ ᠶᠢᠨ ᠵᠣᠬᠢᠶᠠᠭᠰᠡᠨ ︽ᠠᠰᠠᠷᠠᠭᠴᠢ ᠨᠡᠷᠡᠳᠦ ᠶᠢᠨ ᠲᠡᠣᠭᠡ︾ ︵1667︶᠎ ᠶᠢ ᠦᠨᠳᠣᠰᠣᠯᠡᠪᠡᠯ ᠬᠡᠷᠡᠰᠡᠨᠵᠨ ᠨᠢ ᠬᠠᠷᠠᠭᠴᠢᠨ ᠲᠠᠬᠢᠶ᠎ᠠ ᠵᠢᠯ ︵1513︶ ᠲᠦᠷᠣᠵᠦ᠂ ᠰᠢᠷ᠎ᠠ ᠪᠡᠴᠢᠨ ᠵᠢᠯ ︵1548︶᠎ ᠳᠤ ᠨᠠᠰᠣ ᠪᠠᠷᠠᠵᠠᠢ᠃ ᠡᠬᠦᠨ ᠠᠴᠠ ᠦᠵᠡᠬᠦ ᠳᠤ ︽ᠲᠣᠯᠣᠭᠠᠨ ᠣᠳᠤᠭ ᠬᠠᠯᠬ᠎ᠠ︾ ᠪᠠ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠨᠢ ᠶᠡᠭᠡ ᠲᠦᠯᠣᠪ ᠡᠨᠡ ᠬᠤᠭᠤᠴᠠᠭᠠᠨ ᠳᠤ ᠪᠦᠷᠢᠯᠳᠦᠭᠰᠡᠨ ᠪᠠᠶᠢᠨ᠎ᠠ᠃      ᠮᠠᠨ ᠤ ᠬᠡᠯᠡᠳᠡᠭ ᠬᠤᠷᠠᠭᠴᠢ ᠬᠠᠰᠡᠷ ᠤᠨ ᠲᠠᠪᠣᠨ ᠬᠦᠪᠡᠬᠦᠨ ᠨᠢ ᠲᠠᠷᠣᠢ᠄ ᠣᠣᠭᠠᠨ ᠬᠦᠪᠡᠬᠦᠨ ᠣᠪᠠᠰᠢ ᠣᠶᠢᠵᠠᠩ ︵ᠵᠠᠷᠣᠳ ᠣᠳᠤᠭ ᠢ ᠡᠵᠡᠯᠡᠵᠠᠢ︶᠂ ᠲᠡᠳ᠋ ᠬᠦᠪᠡᠬᠦᠨ ᠰᠣᠪᠣᠬᠠᠢ ᠲᠠᠷᠬᠠᠨ ︵ᠪᠠᠭᠠᠷᠢᠨ ᠣᠳᠤᠭ ᠢ ᠡᠵᠡᠯᠡᠵᠠᠢ︶᠂ ᠭᠤᠳᠠᠭᠠᠷ ᠬᠦᠪᠡᠬᠦᠨ ᠣᠪᠠᠨ ᠪᠣᠶᠢᠮᠣ ︵ᠬᠤᠨᠭ᠍ᠬᠢᠷᠠᠳ ᠣᠳᠤᠭ ᠢ ᠡᠵᠡᠯᠡᠵᠠᠢ︶᠂ ᠲᠦᠳᠣᠭᠡᠷ ᠬᠦᠪᠡᠬᠦᠨ ᠲᠣᠭᠰᠢᠨ ᠰᠣᠨᠢᠨ ᠲᠠᠶᠢᠴᠢᠩ ︵ᠪᠠᠶᠣᠳ ᠣᠳᠤᠭ ᠢ ᠡᠵᠡᠯᠡᠵᠠᠢ︶᠂ ᠲᠠᠪᠣᠳᠣᠭᠠᠷ ᠬᠦᠪᠡᠬᠦᠨ ᠱᠣᠳᠬᠠᠨ ᠵᠣᠷᠢᠭᠳᠦ ︵ᠦᠵᠡᠶᠡᠳ ᠣᠳᠤᠭ ᠢ ᠡᠵᠡᠯᠡᠵᠠᠢ︶ ᠪᠣᠯᠣᠨ᠎ᠠ᠃ ᠲᠡᠭᠡᠷ᠎ᠠ ᠲᠣᠷᠠᠳᠣᠭᠰᠡᠨ ︽ᠬᠠᠯᠬ᠎ᠠ︾ ᠬᠡᠭᠴᠢ ᠨᠡᠷ᠎ᠠ ᠨᠢ ᠠᠶᠢᠮᠠᠭ ᠪᠦᠯᠦᠭ ᠤᠨ ᠨᠡᠷᠡᠶᠢᠳᠣᠯ ᠪᠣᠯᠵᠦ ᠬᠤᠴᠣᠷᠣᠭᠰᠡᠨ ᠨᠢ ᠲᠠᠷᠣᠢ ᠲᠠᠶᠠᠨ ᠬᠠᠭᠠᠨ ᠤ ᠦᠶ᠎ᠠ ᠳᠤ ᠭᠠᠷᠣᠭᠰᠡᠨ ᠶᠠᠪᠣᠳᠠᠯ ᠪᠢᠯᠨ᠃      ᠬᠡᠪᠡᠴᠦ ︽ᠬᠠᠯᠬ᠎ᠠ︾ ᠬᠡᠳᠡᠭ ᠦᠭᠡ ᠨᠢ ᠠᠯᠢ ᠡᠷᠳᠠ ︽ᠮᠣᠩᠭᠤᠯ ᠤᠨ ᠨᠢᠭᠤᠴᠨ ᠲᠣᠪᠴᠢᠶᠠᠨ︾᠎ ᠳᠤ ᠪᠢᠴᠢᠭᠳᠡᠭᠰᠡᠨ ᠠᠴᠠ ᠨᠠᠰᠢ ᠪᠢᠴᠢᠭ ᠰᠣᠳᠣᠷ ᠲᠤ ᠠᠯᠢ ᠣᠯᠠᠨ ᠬᠠᠷᠠᠭᠳᠠᠳᠠᠭ ᠪᠠᠶᠢᠪᠡ᠃ ︽ᠨᠢᠭᠤᠴᠨ ᠲᠣᠪᠴᠢᠶᠠᠨ︾᠎ ᠳᠤ ᠭᠠᠷᠳᠠᠭ ᠲᠡᠷᠡᠬᠦ ︽ᠬᠠᠯᠬ᠎ᠠ ᠭᠤᠣᠯ︾ ᠬᠡᠳᠡᠭ ᠨᠢ ᠲᠠᠷᠣᠢ ᠪᠣᠶᠢᠷ ᠨᠠᠭᠤᠷ ᠲᠤ ᠴᠢᠳᠬᠤᠵᠦ ᠪᠠᠶᠢᠬᠤ ᠲᠡᠷᠨ ᠭᠤᠣᠯ ᠢ ᠵᠢᠭᠠᠵᠦ ᠪᠠᠶᠢᠬᠤ ᠶᠤᠮ᠃       ᠶᠠᠫᠣᠨ ᠣᠯᠣᠰ ᠤᠨ ᠳ᠋ᠣᠺᠲ᠋ᠣᠷ ᠸᠠᠳᠠ ᠺᠢᠶᠣᠰᠢ ᠠᠪᠣᠭᠠᠢ ︽ᠠᠷᠪᠡᠨ ᠬᠤᠶᠠᠷ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠨᠣᠳᠣᠭᠰᠢᠯ ᠢ ᠡᠬᠦᠨ ᠢᠶᠠᠷ ᠦᠨᠳᠣᠰᠣᠯᠡᠨ ᠶᠠᠷᠢᠵᠠᠢ᠃ ᠲᠡᠬᠦᠨ ᠤ ᠦᠵᠡᠬᠦ ᠪᠠᠷ ︽ᠠᠷᠪᠡᠨ ᠬᠤᠶᠠᠷ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠲᠣᠳᠣᠷ᠎ᠠ ᠠᠷᠦ ᠮᠣᠩᠭᠤᠯ ᠳᠤ ᠪᠠᠶᠢᠬᠤ ᠲᠣᠯᠣᠭᠠᠨ ᠣᠳᠤᠭ ᠪᠣᠯ ᠡᠨᠡᠬᠦ ᠭᠤᠣᠯ ᠎ ᠤᠨ ᠪᠠᠷᠠᠭᠤᠨ᠎ᠠ ᠬᠡᠷᠣᠯᠣᠨ ᠭᠤᠣᠯ ᠤᠨ ᠣᠷᠣᠰᠬᠠᠯ ᠲᠠᠭᠠᠣ ᠭᠠᠵᠠᠷ ᠲᠤ ᠬᠦᠭᠵᠢᠨ ᠮᠠᠨᠳᠣᠵᠦ᠂ ᠦᠪᠣᠷ ᠮᠣᠩᠭᠤᠯ ᠳᠤ ᠪᠠᠶᠢᠭ᠎ᠠ ᠲᠠᠪᠣᠨ ᠣᠳᠣᠭᠹ ᠨᠢ ᠡᠨᠡᠬᠦ ᠭᠤᠣᠯ ᠎ ᠠᠴᠠ ᠵᠡᠬᠦᠨᠰᠢ ᠬᠢᠨᠭ᠍ᠭᠠᠨ ᠲᠠᠪᠠᠭ᠎ᠠ ᠶᠢ ᠰᠣᠨᠳᠠᠯᠠᠭᠰᠡᠨ ᠦᠷᠭᠡᠨ ᠠᠭᠤᠳᠠᠮ ᠨᠣᠳᠤᠭ ᠲᠡᠪᠢᠰᠭᠡᠷ ᠲᠤ ᠠᠵᠦ ᠲᠦᠷᠣᠨ ᠬᠦᠭᠵᠢᠨ ᠮᠠᠨᠳᠣᠭᠰᠡᠨ ᠪᠣᠯᠬᠤᠷ ᠡᠳᠡᠭᠡᠷ ᠠᠶᠢᠮᠠᠭ ᠪᠦᠯᠦᠭ ᠤᠨ ᠨᠡᠷᠡᠶᠢᠳᠣᠯ ᠨᠢ ᠲᠠᠷᠣᠢ ᠠᠳᠠᠯᠢ ᠨᠡᠷ᠎ᠠ ᠲᠠᠢ ᠭᠤᠣᠯ ᠣᠷᠣᠰᠬᠠᠯ ᠠᠴᠠ ᠢᠷᠡᠭᠰᠡᠨ ᠬᠡᠳᠡᠭ ᠢ ᠲᠦᠰᠣᠪᠯᠡᠵᠦ ᠪᠣᠯᠬᠤ ᠶᠤᠮ᠃       ︽ᠮᠣᠩᠭᠤᠯ ᠤᠨ ᠨᠡᠬᠦᠳᠡᠯ ᠮᠠᠯᠵᠢᠯ ᠤᠨ ᠲᠡᠮᠳᠡᠭᠯᠡᠯ︾᠎ ᠳᠤ ᠬᠠᠯᠬ᠎ᠠ ᠶᠢᠨ ᠲᠣᠳᠣᠭᠠᠳᠦ ᠭᠠᠳᠠᠭᠠᠳᠦ ᠵᠠᠰᠠᠭ ᠢ ᠴᠦᠮ ᠠᠷᠦ ᠮᠣᠩᠭᠤᠯ ᠳᠤ ᠣᠷᠣᠭᠤᠯᠣᠨ ᠲᠡᠮᠳᠡᠭᠯᠡᠵᠠᠢ᠃ ᠡᠨᠡᠬᠦ ᠬᠡᠯᠡᠵᠦ ᠪᠠᠶᠢᠭ᠎ᠠ ᠠᠷᠦ ᠮᠣᠩᠭᠤᠯ ᠬᠡᠳᠡᠭ ᠨᠢ ᠲᠠᠷᠣᠢ ᠬᠢᠨᠭ᠍ᠭᠠᠨ ᠲᠠᠪᠠᠭᠠᠨ ᠤ ᠠᠷᠦ ᠲᠠᠯ᠎ᠠ ᠶᠢ ᠡᠵᠡᠯᠡᠨ ᠰᠠᠭᠤᠵᠦ ᠪᠦᠬᠦᠢ ᠡᠳᠣᠭᠡ ᠶᠢᠨ ᠬᠦᠯᠣᠨ ᠪᠣᠶᠢᠷ ᠶᠢᠨ ᠭᠠᠵᠠᠷ ᠲᠠᠬᠢ ᠠᠶᠢᠮᠠᠭ ᠪᠦᠯᠦᠭ ᠢ ᠵᠢᠭᠠᠵᠦ ᠪᠠᠶᠢᠨ᠎ᠠ᠃ ᠡᠬᠦᠨ ᠠᠴᠠ ᠪᠢᠳᠠ ᠬᠠᠯᠬ᠎ᠠ ᠣᠳᠤᠭ ᠤᠨ ᠣᠣᠯ ᠤᠨ ᠨᠣᠳᠤᠭ ᠢ ᠰᠡᠳᠬᠢᠨ ᠮᠡᠳᠡᠵᠦ ᠪᠣᠯᠣᠨ᠎ᠠ ︵︽ᠵᠡᠬᠦᠨ ᠠᠽᠢᠶ᠎ᠠ ᠶᠢᠨ ᠲᠡᠣᠭᠡ ᠰᠣᠳᠣᠯᠣᠯ — ᠮᠣᠩᠭᠤᠯ ᠤᠨ ᠬᠡᠰᠡᠭ︾᠎ ᠲᠤ ᠦᠵᠨ︶᠃ ᠸᠠᠳᠠ ᠺᠢᠶᠣᠰᠢ ᠳ᠋ᠣᠺᠲ᠋ᠣᠷ ᠠᠴᠠ ︽ᠠᠷᠪᠡᠨ ᠬᠤᠶᠠᠷ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠣᠭ ᠨᠣᠳᠣᠭᠰᠢᠯ ᠪᠣᠯ ᠬᠠᠯᠬ᠎ᠠ ᠭᠤᠣᠯ ᠤᠨ ᠣᠷᠣᠰᠬᠠᠯ ᠲᠠᠭᠠᠣ ᠣᠷᠣᠨ ᠮᠦᠨ ᠬᠡᠳᠡᠭ ᠢ ᠶᠠᠷᠢᠶᠠᠨ ᠦᠭᠡᠢ ᠵᠦᠪ ᠶᠤᠮ᠃ ᠡᠨᠡ ᠪᠣᠯ ᠮᠢᠩ ᠣᠯᠣᠰ ᠤᠨ ᠦᠶ᠎ᠠ ᠶᠢᠨ ᠣᠴᠢᠷ ᠬᠡᠵᠦ ᠦᠵᠡᠵᠦ ᠪᠠᠶᠢᠯ᠎ᠠ᠃       ᠡᠨᠡ ᠨᠢ ᠶᠠᠭ ᠳ᠋ᠣᠺᠲ᠋ᠣᠷ ᠸᠠᠳᠠ ᠺᠢᠶᠣᠰᠢ ᠠᠪᠣᠭᠠᠢ ᠶᠢᠨ ᠲᠣᠷᠠᠳᠣᠭᠰᠡᠨ ᠮᠠᠳᠦ᠂ ᠬᠠᠯᠬ᠎ᠠ ᠶᠢᠨ ᠣᠯᠠᠨ ᠣᠳᠤᠭ ᠨᠢ ᠨᠢᠭᠡ ᠦᠶ᠎ᠠ ᠬᠠᠯᠬ᠎ᠠ ᠭᠤᠣᠯ ᠤᠨ ᠣᠷᠣᠰᠬᠠᠯ ᠲᠠᠭᠠᠣ ᠨᠣᠳᠣᠭᠰᠢᠵᠦ ᠪᠠᠶᠢᠭᠰᠡᠨ ᠶᠤᠮ᠂ ᠡᠶᠢᠮᠣ ᠠᠴᠠ ᠪᠠᠭᠠᠷᠢᠨ ᠣᠳᠤᠭ ᠨᠢ ᠴᠦ ᠲᠡᠳᠡᠭᠡᠷ ᠣᠯᠠᠨ ᠣᠳᠤᠭ ᠤᠨ ᠲᠣᠳᠣᠷ᠎ᠠ ᠪᠠᠶᠢᠭᠰᠡᠨ ᠨᠢ ᠲᠠᠮᠵᠢᠭ ᠦᠭᠡᠢ᠃ ᠶᠣᠸᠠᠨ ᠣᠯᠣᠰ ᠤᠨ ᠦᠶ᠎ᠠ ᠳᠤ ᠪᠠᠭᠠᠷᠢᠨ ᠨᠢ ᠬᠠᠯᠬ᠎ᠠ ᠳᠤ ᠬᠠᠷᠢᠶᠠᠯᠠᠭᠳᠠᠬᠤ ᠦᠭᠡᠢ ᠪᠠᠶᠢᠵᠠᠢ᠃ ᠬᠠᠷᠢᠨ ︽ᠪᠠᠭᠠᠷᠢᠨ ᠤ ᠲᠦᠮᠡᠨ ᠡᠷᠣᠭᠡ︾ ᠬᠡᠵᠦ ᠨᠡᠷᠡᠶᠢᠳᠦᠭᠳᠡᠵᠦ ᠪᠠᠶᠢᠵᠠᠢ᠃ ᠴᠢᠩᠬᠢᠰ ᠬᠠᠭᠠᠨ ᠤ ᠦᠶ᠎ᠠ ᠶᠢᠨ ᠪᠠᠭᠠᠷᠢᠨ ᠤ ᠨᠣᠳᠣᠭᠰᠢᠵᠦ ᠪᠠᠶᠢᠭᠰᠡᠨ ᠣᠷᠣᠨ ᠪᠣᠯ ᠡᠷᠴᠢᠰ ᠭᠤᠣᠯ ᠤᠨ ᠲᠡᠭᠡᠷ᠎ᠠ ᠣᠷᠣᠰᠬᠠᠯ ᠲᠠᠭᠠᠣ ᠂ ᠵᠡᠬᠦᠨᠰᠢ ᠠᠯᠳᠠᠢ ᠠᠭᠤᠯᠨ ᠠᠴᠠ ᠬᠡᠳᠣᠷᠡᠬᠦ ᠦᠭᠡᠢ ᠪᠠᠶᠢᠵᠦ᠂ ᠡᠷᠴᠢᠰ ᠭᠤᠣᠯ ᠲᠠᠭᠠᠣ ᠶᠢᠨ ᠬᠢᠷᠬᠢᠰ ᠤᠨ ᠣᠯᠠᠨ ᠠᠶᠢᠮᠠᠭ ᠤᠨ ᠬᠡᠪᠴᠢᠶᠡᠨ ᠳᠤ ᠪᠠᠭᠳᠠᠵᠦ ᠪᠠᠶᠢᠯ᠎ᠠ ᠬᠡᠳᠡᠭ ᠢ ᠲᠡᠭᠡᠷ᠎ᠠ ᠨᠢᠭᠡᠨᠳᠠ ᠲᠣᠷᠠᠳᠣᠭᠰᠡᠨ ᠪᠢᠯᠨ᠃ ᠲᠡᠭᠡᠪᠡᠯ ᠪᠠᠭᠠᠷᠢᠨᠴᠣᠳ ᠨᠢ ᠠᠯᠢ ᠦᠶ᠎ᠠ ᠳᠤ ᠠᠯᠳᠠᠢ ᠠᠭᠤᠯᠨ ᠶᠢ ᠲᠠᠪᠠᠵᠦ ᠬᠠᠯᠬ᠎ᠠ ᠭᠤᠣᠯ ᠤᠨ ᠣᠷᠣᠰᠬᠠᠯ ᠲᠠᠭᠠᠣ ᠣᠷᠣᠨ ᠳᠤ ᠢᠷᠡᠵᠦ᠂ ᠲᠠᠷᠠᠭ᠎ᠠ ᠨᠢ ᠪᠠᠰᠨ ︽ᠦᠪᠣᠷ ᠲᠡᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠨᠢᠭᠡ ᠪᠣᠯᠵᠦ ᠬᠤᠪᠢᠷᠠᠭᠰᠡᠨ ᠲᠣᠬᠠᠢ ᠮᠣᠩᠭᠤᠯ ᠲᠣᠯᠭᠤᠷ ᠪᠢᠴᠢᠭ ᠎ ᠲᠤ ᠬᠡᠳᠣᠶᠢᠪᠡᠷ ᠲᠣᠳᠣᠷᠬᠠᠢ ᠲᠣᠷᠠᠳᠣᠭᠰᠡᠨ ᠦᠭᠡᠢ ᠪᠣᠯᠪᠠᠴᠦ ᠡᠨᠡᠬᠦ ᠠᠰᠠᠭᠤᠳᠠᠯ ᠢ ᠰᠢᠨᠵᠢᠯᠡᠨ ᠲᠣᠳᠣᠯᠠᠬᠤ ᠳᠤ ᠠᠷᠪᠡᠨ ᠭᠤᠷᠪᠠᠳᠣᠭᠠᠷ ᠵᠠᠭᠤᠨ ᠤ ᠰᠡᠬᠦᠯᠴᠢ᠂ ᠠᠷᠪᠡᠨ ᠲᠦᠷᠪᠡᠳᠣᠭᠡᠷ ᠵᠠᠭᠤᠨ ᠤ ᠡᠬᠢᠨ ᠤ ᠦᠶ᠎ᠠ ᠳᠤ ᠬᠢᠷᠬᠢᠰᠴᠣᠳ ᠤᠨ ᠵᠡᠬᠦᠨ ᠡᠮᠣᠨᠠᠰᠢ ᠨᠡᠬᠦᠳᠡᠯᠯᠡᠭᠰᠡᠨ ᠶᠠᠪᠣᠳᠠᠯ ᠨᠢ ᠨᠢᠭᠡ ᠴᠢᠬᠤᠯᠨ ᠰᠦᠪᠡᠭᠴᠢ ᠪᠣᠯᠬᠤ ᠶᠤᠮ ᠃       ᠬᠢᠷᠬᠢᠰᠴᠣᠳ ᠤᠨ ᠵᠡᠬᠦᠨ ᠡᠮᠣᠨᠠᠰᠢ ᠨᠡᠬᠦᠳᠡᠯᠯᠡᠭᠰᠡᠨ ᠶᠠᠪᠣᠳᠠᠯ ᠢ ᠬᠡ ᠴᠢᠦ ᠲᠣᠣ᠂ ᠯᠢ ᠸᠧᠨ ᠲᠢᠶᠠᠨ᠂ ᠬᠠᠨ ᠿᠣ᠋ ᠯᠢᠨ ᠨᠠᠷ ᠤᠨ ᠰᠣᠳᠣᠯᠣᠯ ᠳᠤ ᠨᠢᠭᠡᠨᠳᠠ ᠲᠣᠷᠠᠳᠴᠠᠢ᠃ ᠬᠠᠨ ᠿᠣ᠋ ᠯᠢᠨ ᠠᠪᠣᠭᠠᠢ ᠶᠢᠨ ᠰᠣᠳᠣᠯᠣᠭᠰᠡᠨ ᠢ ᠦᠨᠳᠣᠰᠣᠯᠡᠪᠡᠯ᠂ ᠪᠠᠷᠤᠭ ᠠᠷᠪᠡᠨ ᠭᠤᠷᠪᠠᠳᠣᠭᠠᠷ ᠵᠠᠭᠤᠨ ᠤ ᠰᠡᠬᠦᠯᠴᠢ ᠪᠠᠷ ᠴᠦᠭᠡᠨ ᠪᠣᠰᠣ ᠬᠢᠷᠬᠢᠰᠴᠣᠳ ᠨᠢ ᠲᠣᠷᠣᠨ᠎ᠠ ᠵᠦᠭ ᠲᠤ ᠨᠡᠬᠦᠳᠡᠯᠯᠡᠨ ᠢᠷᠡᠪᠡ᠃ ᠵᠢᠱᠢᠶᠡᠯᠡᠪᠡᠯ᠄ ᠲᠠᠶᠢᠴᠢᠩ ᠶᠣᠩᠰᠣᠨ ᠨᠣᠶᠠᠨ ᠤ ᠣᠷᠪᠠᠯᠭᠠᠨ ᠢ ᠲᠠᠷᠣᠩᠭᠤᠶᠢᠯᠠᠭᠰᠡᠨ ᠤ ᠬᠤᠶᠢᠨ᠎ᠠ᠂ ᠬᠤᠪᠢᠯᠠᠢ ᠬᠠᠭᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠵᠦ ᠨᠠᠶᠠᠨ ᠤ ᠬᠠᠭᠤᠴᠢᠨ ᠨᠣᠳᠤᠭ ᠠᠴᠠ ︵ᠬᠢᠨᠭ᠍ᠭᠠᠨ ᠲᠠᠪᠠᠭᠠᠨ ᠠᠴᠠ ᠵᠡᠬᠦᠨᠰᠢ᠂ ᠰᠣᠩᠭᠠᠷᠠᠢ ᠮᠦᠷᠡᠨ ᠤ ᠲᠡᠭᠡᠷ᠎ᠠ ᠣᠷᠣᠰᠬᠠᠯ ᠲᠠᠭᠠᠣ ᠭᠠᠵᠠᠷ︶ ᠴᠦᠭᠡᠨ ᠪᠣᠰᠣ ᠬᠢᠷᠬᠢᠰᠴᠣᠳ ᠢ ᠨᠡᠬᠦᠯᠭᠡᠪᠡ᠃ ᠲᠠᠳᠠᠨᠠᠷ ᠤᠨ ᠣᠯᠠᠩᠬᠢ ᠨᠢ ︽ᠣᠢ ᠶᠢᠨ ᠢᠷᠭᠡᠳ︾ ᠶᠤᠮ᠃ ᠬᠡᠪᠡᠴᠦ ᠪᠠᠭᠠᠷᠢᠨ ᠣᠳᠤᠭ ᠲᠠᠳᠠᠨᠠᠷ ᠤᠨ ᠲᠣᠳᠣᠷ᠎ᠠ ᠪᠠᠶᠢᠨ᠎ᠠ ᠬᠡᠰᠡᠨ ᠪᠣᠳᠠᠳᠦ ᠬᠠᠷᠬᠠᠨ ᠣᠯᠳᠠᠭᠰᠡᠨ ᠦᠭᠡᠢ ᠴᠦ ᠬᠢᠷᠬᠢᠰᠴᠣᠳ ᠤᠨ ᠣᠯᠠᠨ ᠠᠶᠢᠮᠠᠭ ᠪᠦᠯᠦᠭ ᠤᠨ ᠵᠡᠬᠦᠨᠰᠢ ᠨᠡᠬᠦᠳᠡᠯᠯᠡᠭᠰᠡᠨ ᠭᠠᠵᠠᠷ ᠤᠨ ᠪᠠᠶᠢᠴᠨ ᠪᠠ ᠮᠢᠩ ᠣᠯᠣᠰ ᠤᠨ ᠦᠶ᠎ᠠ ᠶᠢᠨ ᠪᠠᠭᠠᠷᠢᠨ ᠣᠳᠤᠭ ᠤᠨ ᠠᠵᠦ ᠲᠦᠷᠣᠨ ᠠᠮᠢᠳᠣᠷᠠᠵᠦ ᠪᠠᠶᠢᠭᠰᠡᠨ ᠨᠣᠳᠤᠭ ᠣᠰᠣ ᠶᠢᠨ ᠪᠠᠶᠢᠳᠠᠯ ᠠᠴᠠ ᠦᠵᠡᠪᠡᠯ ᠶᠡᠭᠡᠯ᠎ᠠ ᠬᠤᠯᠪᠣᠭᠳᠠᠯ ᠲᠠᠢ ᠰᠢᠭ᠋ ᠶᠤᠮ᠃       ᠪᠢᠳᠠ ᠡᠬᠦᠨ ᠢ ᠦᠨᠳᠣᠰᠣᠯᠡᠪᠡᠯ ︽ᠲᠠᠪᠣᠨ ᠣᠳᠤᠭ ᠬᠠᠯᠬ᠎ᠠ︾᠎ ᠶᠢᠨ ᠨᠢᠭᠡ ᠨᠢ ᠪᠣᠯᠣᠭᠰᠡᠨ ᠪᠠᠭᠠᠷᠢᠨ ᠣᠳᠤᠭ ᠨᠢ ᠲᠠᠷᠣᠢ ᠮᠢᠩ ᠣᠯᠣᠰ ᠤᠨ ᠯᠢᠶᠣᠣ ᠳ᠋ᠦᠡᠭ ᠤᠨ ᠨᠣᠶ᠋ᠬᠠᠨ ᠤ ᠵᠠᠬᠢᠷᠭ᠎ᠠ ᠳᠠᠬᠢ ᠭᠤᠸᠠᠩ ᠨᠢᠩ ᠸᠧᠢ ︵ᠡᠳᠣᠭᠡ ᠤᠨ  ᠯᠢᠶᠣᠣᠨᠢᠩ ᠮᠣᠵᠢ ᠶᠢᠨ ᠬᠠᠢ ᠴᠸᠡᠭ ᠰᠢᠶᠠᠨ︶᠎ ᠳᠤ ᠪᠠᠶᠢᠬᠤ ᠳ᠋ᠦᠡᠭ ᠴᠠᠩ᠂ ᠳ᠋ᠦᠡᠭ ᠱᠸᠡᠭ ᠵᠡᠷᠭᠡ ᠴᠠᠶᠢᠵᠨ ᠶᠢᠨ ᠬᠢᠵᠠᠭᠠᠷ ᠤᠨ ᠭᠠᠳᠠᠨ᠎ᠠ ᠨᠣᠳᠣᠭᠯᠠᠵᠦ ᠪᠠᠶᠢᠵᠠᠢ᠃ ᠪᠠᠭᠠᠷᠢᠨ ᠣᠳᠤᠭ ᠤᠨ ᠨᠣᠳᠣᠭᠰᠢᠨ ᠰᠠᠭᠤᠭᠰᠡᠨ ᠡᠨᠡ ᠭᠠᠵᠠᠷ ᠨᠢ ᠮᠢᠩ ᠣᠯᠣᠰ ᠤᠨ ᠬᠢᠵᠠᠭᠠᠷ ᠠᠴᠠ ᠪᠠᠷᠠᠭᠤᠨ ᠲᠦᠷᠪᠡᠨ ᠵᠠᠭᠤ ᠭᠠᠷᠣᠢ ᠵᠠᠶᠢᠳᠠᠢ ᠪᠠᠶᠢᠭᠰᠡᠨ ᠶᠤᠮ᠃ ︽ᠸᠠᠨ ᠯᠢ ᠡᠣ ᠬᠦᠡᠭ ᠯᠣ᠋︾ ᠬᠡᠭᠴᠢ  ᠪᠢᠴᠢᠭ ᠲᠤ ᠦᠬᠦᠯᠡᠭᠰᠡᠨ ᠢ ᠦᠨᠳᠣᠰᠣᠯᠡᠪᠡᠯ᠂ ᠪᠠᠭᠠᠷᠢᠨ ᠣᠳᠤᠭ ᠤᠨ ᠰᠣᠪᠣᠬᠠᠢ ᠶᠢᠨ ᠬᠤᠶᠠᠳᠣᠭᠠᠷ ᠬᠦᠪᠡᠬᠦᠨ ᠪᠠᠭᠠᠳᠣᠷ ᠤᠨ ᠣᠳᠤᠭ ᠨᠢ ︽ᠬᠠᠭᠤᠴᠢᠨ ᠯᠢᠶᠣᠣ ᠶᠠᠩ ᠠᠴᠠ ᠣᠮᠠᠷᠠᠰᠢ ᠬᠤᠶᠠᠷ ᠭᠤᠣᠯ ᠤᠨ ᠲᠣᠮᠳᠠ ᠬᠠᠪᠢ︾᠎ ᠪᠠᠷ ᠪᠠᠶᠢᠭᠰᠡᠨ ᠪᠠᠶᠢᠨ᠎ᠠ᠃ ᠮᠣᠩᠭᠤᠯᠴᠣᠳ ᠡᠨᠡ ᠬᠠᠪᠢ ᠶᠢ ᠠᠬᠠᠢ ᠡᠯᠡᠰᠣᠨ ᠬᠡᠳᠡᠭ᠃ ᠡᠳᠣᠭᠡ ᠣᠯᠠᠭᠠᠡᠬᠠᠳᠠ ᠬᠡᠮᠡᠨ ᠬᠤᠪᠢᠷᠠᠭᠤᠯᠣᠭᠰᠡᠨ ᠣᠣᠯ ᠤᠨ ᠵᠣᠣ ᠣᠳᠠ ᠴᠢᠭᠤᠯᠭᠠᠨ ᠤ ᠬᠤᠶᠠᠷ ᠪᠠᠭᠠᠷᠢᠨ ︵ᠵᠡᠬᠦᠨ ᠪᠠᠷᠠᠭᠤᠨ ᠪᠣᠶᠦ ᠪᠠᠰᠨ ᠶᠡᠭᠡ ᠪᠠᠭ᠎ᠠ ᠪᠠᠭᠠᠷᠢᠨ ᠬᠡᠳᠡᠭ︶᠎ ᠨᠢ ᠣᠳᠦ ᠴᠦᠮ ᠰᠢᠷ᠎ᠠ ᠮᠦᠷᠡᠨ ᠤ ᠬᠤᠶᠢᠳᠦ ᠵᠠᠬ᠎ᠠ ᠪᠠᠷ ᠨᠣᠳᠣᠭᠰᠢᠵᠦ ᠪᠠᠶᠢᠨ᠎ᠠ᠃ ᠡᠨᠡ ᠪᠣᠯ ᠬᠤᠶᠢᠳᠦ ᠠᠯᠳᠠᠨ ᠣᠯᠣᠰ ᠤᠨ ᠲᠡᠭᠷᠢ ᠶᠢᠨ ᠰᠡᠴᠡᠨ ᠤ ᠣᠨ ᠳᠤ ᠵᠠᠭᠠᠭ ᠬᠤᠪᠢᠶᠠᠨ ᠲᠣᠬᠢᠷᠠᠭᠤᠯᠣᠭᠰᠡᠨ ᠨᠣᠳᠤᠭ ᠮᠦᠨ᠃  
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠤ ᠰᠤᠶᠤᠯ ᠲᠡᠦᠬᠡ